Svre nøt dvng shóngnøt í vlelúnshìwe

Svre nøt dvng shóngnøt í vlelúnshìwe
   
Vsvng tiqgø taq shóngnøt zøngwe mvsøn, nvrøm vlwe ínìnø padang taqgø svrenøt mvvl lvmwe íe. Kà shvbóng vsvng tiqgø nvng tiqgø shóngnøt vzøm bøwe ínìnø we vsvng gøní nø tasvng lvpat rì zíshìlvm svrenøt rì vmv:ngvm we svng yánglún shìe. 

Dang vrvm taq apnúngshì lvm kamshì bøwe svng yánglún shìe. Wewa mvtaq àngdèò vjú rì cøm vnøn lvm svng gø mà svre we mvtaq dvshà mvhøt lvm shìwvtrì vhøm lvm svng gø mà svrevm we íe.
       
Wedø shóngnøt vjø:ngí shóngshì we vsvngrì taq nvmbat 8 wapè Vtdwed koqkámpè gø vbá we íe. À:ngò lvpat mvshøl taq koqkám vya svng gurshì we høqshaq svmaré tiqmè svng shóngshì yà:ngì we íe.

Vtdwed koqkámpè nø England móngdàn vsvng ínø we rvtø taq koqkám dvcì dvgøng rìnø koqkám dvcì vdòng kèní vsvngrì nvngwa shvzøngshì shvlawe vtóng vlwe íratnø dvgá svmaré tiqgø svng shóngshì we Vtdwed koqkámpè 8 pè wagø nø à:ngò koqkám vya svng gurshì we høqshaq shóngnøt taq nøt mvsøn nvrøm zíshì yà:ngì.

Koqkámpè Vtdwed nø àngò koqkám vya svng 1936 nøng December 10 ni taq gur yàngà. Pàwálvm wani à:ngò shóngnøt vjøng tiqgø svng àngò lvpat, mvsøn nvrøm svng zíshì yá:ngì wegø íe.

Gàmzø koqkám tiqgø wawe nø ngór dvgùng nvng zøngwe, vdá mvgàmwe, írat nø we Koqkám vya svng gorlvm wawe nø jøng jøngni shóngnøt mvsøn nvrøm vjøng vlwe mø:í nìnø kadøgø mvbøn daqlong we íe. Weratnø koqkámpè àngò lvpat mvshøl nø dèni bat høqshaq bøngshvng lú:ngì wegø íe.

Shøn mvyø we taq koqkámpè nø àngò shóngnøt vjøng taqkèní pàdang taqgø mà svre shaqí à:ngò ngór dvgùngrì shvngbe svng zíshì kamshì ráì we tiqgø íyàngì.

Shóngshøngwe vnvmchvngrì nøngmaqò lvpat tvràrì taqgø kadøíwe dvgùngrì, pø, zaqshøprì svng ínìgø shóngnøt vjøng í shvzøm lú:nò we mvtaq kadø íwe svre dvké lvm tvràrì svng ínìgø døngmvn we shóngnøt lòngí dánglún vle lú:nò we svng dvtit tvle svngkà yayáng naròe.