Svrenøt svng kadø tønshì lún lvm

Zìlàngré vnvm vchangrìé nøng maq shvngbe nø ni vrvm svreì we nøtrìí ègømkéìe. Nøngmaq shvnvngø vl we rvmnvng rvmchangrì, wulaq bvnlì vdèrì, bøngterì shvngbe taqø gø àngdè dè nøt vdòng taq svre nøt wawe nø zángshì we wa íe. Vsvng tiq gø taq cvmré lvpat taq kèní svre nøt zángshì rawe írat nø àngdèò lvpat bvnlìrì dang vrvm taq svre nøt svng tønshì ràwe gø pvngyàn vl rawe íe. Svre nøt wawe nø vsvng tiqgøò nvngòn kùngà svng vgám nø vnøn dvzvŕ we íe. Svre nø evl dángte nø àngdè wá mèyøwe bvnlìrì taq jór lún lvm yak longwe íe. Wedø íratnø àngdèò nvngòn kùngàrì kèní dvzaq dvkángshì nø zìdang vhánglún lvm dvpat nø svre nøt svng tønshì lún lvm nø gvzà vchyak we íe. Shaqré mvshølrì taq svre nøt svng eyølshì lvm tvle rvmnvng èwaò nø èzømò wae. Wewa mvtaq àngdè góng àngdè síngshá shìwe nvng nvng àngdè bøn mvyø we rì lúnshì rae wanø gø shálún shìe. Dèdamò nø mè sèreni, sère nøgø mèdèdam ni wawe íe. Jøng jøng taq svre nøt wawe nø àngdè shìni mèjang we taq kèní bøn we nøt íe wae. Welòng svng tønshìnø shvmáng lún lvm dvpat àngdè nvng singwe bvnlì dangrì taq shvmun shì dvzaqshì we í èjang long dvgvp jór lúnshìe wae. Tiq kat kat svre nøt taqkèní shvlanø jòwe tvràrì, nvngòn kùngàrì svng gø gøm ké sháò we íe. Mvjò dø èwa we, mvjò dø dèdamò we nvng mvjò dø èshøn we rì taq wa svre ràwe íe. Svre nøt svng jòwe dang taq gvl sháshì ràe. Scre nøt svng tønshì lún lvm dvpat àngdè nøt mvsønrì língshì vdu we dangrì taq língshàì nø dvzaq shì ràwe íe. Svre nøt svng tøn lún lvm dvpat àngdèò nøt mvsønrì, nvng tvrà àngshvŕrì taq shvmunshàì we taq kèní dvzaq shìrà we nvng àngdèò kám vlømvm vrvmwe vsvngrì taq kèní cvnshì we ígø svre nøt svng tøn shvmáng lúnshì e wawe tvtit tvle svngkà yayáng naròe.