Tiqni taq tiq nari cè rvtø zíshì lvm mvgàmpè Jack Ma taqkèní nvngòn ziwe mòngkà

Tiqni taq tiq nari cè rvtø zíshì lvm mvgàmpè Jack Ma taqkèní nvngòn ziwe mòngkà

Tiqni taq tiq naricè rvtø èzíò nà lvpat nø jøng jøng vlíng longe. Werì nø La nànø dørøm 6 nari taq bvnlì ènvrshì nø yadøng 12 nari taq èyøp we ínìnø we dvhø taq vlwe rvtø nari 6 dàm dvng kadø shèleòe. TV hang cømla èyàngnø shèleò emá?

Jøng jøng taq nàí we rvtø rìsvng kadøwa shvle:ngòe wanø èlán:ò mvdàm téwa vchyak we íe. Vsvngrì mvlúngkaí lá:nòwe nø àngdèò bvnlì svng téwa jórlún lvm dvpat dvzaq dvkángshì rae wa lá:nshì sháòe. Bvnlì wàngrì taq íranigø shølshú vgorì taq døngjá vle wa lá:nsháìe.

La nàò lvpat taq zìdang vhánglvm tvrà mèyàngshì we ínìnø nàò shølshúrìí tvrà mvtóngā werat íe wanø dvdamshì lvm nø mvvl. Àngdèò lvpat vhánglún lvm tvrà svng lashì lvm wawe nø àngdè tiqgøò bvnlì døngjá ni íe.

Nàò dørøm lvp nvrshì rvtø rì svng vjú vldø kadø èlángòe walòng taq cvn longwe íe. Àngdè lvpat taq àngdè bøn mvyø we dang tuqlúnlvm dvpat nø zitnøt vl lvm gvzàni vchyak we íe. Wedø zitnøt nvng mvkrøm nvdøprì nø nàò lvpat tvrà taq zømdàng longe.

La nànø léga, kàrurì rø we dang taq dèzaqshìwe tiqgø éí nìnø vsvngrì mvrdà:ngø kàshøn we taq vlømvm vrvm longe. Anthony Robbins shøn yàngì we taq ladáng nànø tiqni taq tiq nari pazí tiqpvn pvn svng ècvnshì we ínì nø tiqnøng gømrakvt nàò síngrál nøtnø 99.99% dángte høq vháng longe wae.

Nàò chvpdap bvnlì svng shvrúng nøt mèvl we ínìnø we rvtø rìtaq nà nøt shvrúngwe paqzí tiqlòng lòng svng ècvn shì we ínìnø tiqni rvtø taq dvgá bvnlì svng língshì èlún lú:ngòe. Weratnø nà bvnlì taqkèní we vko vkángrì mèlúnò we ínìgø nàí lashì rawe íe. Vsvngrì nvng vzømwe bvnlì rìtaq dèzaqshì. Nàlø:tnò.

Nà shèrúngwe bvnlì svng èláò. Nàí èwàò we chvpdap bvnlì svng téwa jórlúnlvm dvpat vsvngrì nvng vzøm vzap we tvrà étò:ngò. Àngmaq yángkèní paqzírì cvnshì we røtshì werì èwàò. Bvnlì kèní èlo rawe nvrshì rvtø rì taq vjú mvvl we dangrì taq wa rvtø dèbéò we nø nà dvpat rvtø àngdongcè vdòng nøtshøm dvzvŕ we ínìgø welòng taq kèní nàò mèpvng lvpat svng vhángdø tubùmā mvlúnò.

Weratnø bvnlì vtawe rvtø taq pazí lushì shvlawe, nàò nøt shvrúngwe tiqdang dang svng rvtø tiqdongcè èzíò we kvt tiqni rvtø taq nàò lvpat vlíng longwe svng vtoshì lúnlvm ílonge wanø nvngòn ziwe dvtit tvle svngkà yayáng naròe.

Add new comment

7 + 8 =