Tuqrawe rvtø dvpat dvgø shì ràwe

Tuqrawe rvtø dvpat dvgø shì ràwe

  Vsvng tiqgø nøt svng vtiqlvm bøn dvzvŕ we, yaklvm vhøm dvzvŕ we svng èyàngvtnò dvgvp kadø bøn longwe svng mvsháshì we mèpvng lvpat tvrà tiqlòng niíe. Móngdàn dvjàrì, wulaq tvràrì nvng shiqshàn tvrà rì kadø bøn longnø kadø íwe bvnlìrì taq kèní dvkúmshì lvm wawe svng nøt dvbunshìlvm vlwe íe. Vdè Myanmar móngdàn vdòng taq vle á:mìwe nøngrì taqkèní wedø shìwvtrì tiqni mvdàm tiqni luqnø vkøn mvnshì ráì we svnggø vhøm mìe. Vsvngrì taq vlràwe vchyak we tiqlòng nø mòngzøl nø shømløm lvm gø tiqdang taqkèní vbáwe íe. Vdè chøm døngku rvprì dvpat shømløm lvm vshøp shàì we pø zaqshøprì shømlømlvm, wedøni àngdè lvpat svng nøt shømrà zílúnwe tvrà, bvnlì taqgø kám vrvm we svng bøn dvzvŕ mvyøì wewa íe.

   Wedø íratnø yadø bøn rawe rvtø taq nøngmaqí kapà wá vduemá? Jøng jøng taq mèpvng dvpat kagø ígø chyak wa shvlá vtang dvgøā lúnwe vsvngnø mvvl long. Werat nøng maqgø vrvm dvzaq dvkángshì ràwe tvrà 3 dang svng dvtit tvle lvm íe. Àngdè nøt wámshìwe bvnlì tiqlòng svng nøt løpshìnø wá dvzaqshì ràwe. Tiqkvt kvt nøng maqí shvzøm pvran mvlún:ì we bvnchvtrì svng nøt dvbum shà:ì we gø gvzà vle. Kàshvbóng Covid yóga dvjáng zønli long ka kani, karvtø taq zømvmwe svng nøngmaqí dvdam mvsháì. Welong taqwa nøt dvbum shàìnø pàgø màwá shaq vllvm mø:î. Bvnlì tiqlòng svng chvkwa zømnø wá dvzaqshì ràwe svng shvdøm we íe.      2. Àngdè góng àngdè svng kámshìwe èwàò. Yanila vdèmóng vdè rvgaq taq vkøn ráìwe yaklvm shìwvtrì móng dvjà nvng dvjáng zønli àngpvn pvn taqkèní nøng maq shvngbe svng kadø vlrà we svng síngshá lún bøshà we gø íe.  Vsvngrì nvng kadø vtoq vtip ràwe, kadø íwe bvnlìrì svng rvcàngì nø wávdu we wawe rvwalnøt rì taqkèní àngdè tiqgøò nøt kùngà svnggø dvzaqshì lvm nvngòn ziwe íe.

  3. Tiqni nvng tiqni dvpat rvtø shìpvn chvk èwashì. Kadø írawe svng mvshálúnshì we mèpvng rvtø rìdvpat tiqni nvng tiqni svng kadø shvla dø shvle lúnlvm dvpat kadø bvnlì rì taqkèní dvzaqshì lvm warì dvgø shì ràwe íe. Vsvng tiqgø taq mvdøng vchyvknø vlvdu we nø nøt kùnga, dvzaqshì lvm íe. Vsvng tiqgøò nøt dvcip dvcám shì bøwe ínìnø àngò bvnlì, shagóng shiqshàn tvrà nvng dvgá dangrì shvngbe taq gø vnøn lvm wa ílonge. Shøn mvyø we taq kadø íwe shìwvt rvmè vkøn rawe ínìgø vsvng tiqgø taq nøt dvzaqshì nø wá vduwe bvnlì svng tøp tøp wa dvzaq shìwe ínìnø tiqni tiq rvtø taqnø we shìwvtrì vle lúnìnø mòngzølwe jòrwe lvpatrì svng vtoshì lúnlvm íe wanø dvtit tvle svngkà yayáng naròe.