Tvmø bvnlì wàng taq vzèvm rawe pàrat íe?

Tvmø bvnlì wàng taq vzèvm rawe pàrat íe?

Angdè ò chvpdap bvnlì taq angdè shóngshìnø nøtlúmwe rat wáshì we ínì gø tiq rvtø taq nø bvnlì lòngí vzèvm rawe, bvnlì dìlvm mvneshì nø nøt mvlúm rawe, lvgùn kerawe bøn sháshì we íe. Vsvng tiqgø taq yadø bøn sháshì we nø tóng tiqlòng ni írae. Bvnlì wangrì taq vlíng vpo we mv-vl nø todøni rvtø yanggúng wá vdu long kvt bøn we íe.

Téwa kadø íwe bvnlì wàngrì taq bøn sháshìe má wani tvsvng dvløt we mv-vl we bvnlì rì, paqzí mvkrøm mvdøp àngshár rì mv-vl we bvnlìrì, øp kángwe dang taq nvngòn yúmwe bvnlì rìtaq téwa bøn sháò we íe. Bvnlì wawe rvtø rì naq long we ínìgø shvlá zìbè rvmā we mv-vl long kvt we bvnlì wàng vdòng taq nøt dat we mvtaq bvnlì taq gø vzè ke weí nøt mvlúm vm we svng bøn dvzvŕ sháò we íe.

Bvnlì vrvm taq dèzøm shì ralong dvgvp angdè ò síngnøt shánøt, mvkrøm mvdøprì rvmshì lvm dang svng gø mvdøng dvdam shì ràwe íe. Bvnlì wangrì taqkèní angdèò lvpat paqzí kùngàrì vrangshì ràwe svng shvdøm we íe. Wedø ni bvnlì tiqlòng taqgø angdè tiqgø wa shádøm shìwe, mvdaq dømshì we ínìnø we gø nø angdè góng angdè kámshì we dang taq chávle we íe wanø shøn vdu longe.

Bvnlì tiqlòng taqgø tiqgø wa mvdaq we, bøn we taqkèní jórlún lvm nø gvzà yak longe. Wedø íratnø we bvnlì wàngcèrì shvngbe nø bvnlì nvng singwe paqzírì pvnyàn cvnshì lún ràwe íe. Nà tiqgø bvnlì wàng taq vzingke ralong we ínìnø we bvnlì nvng singwe shølshúrì, mø:í ni angdè ò bvnlì døngjá nvng singnø dvtøp shì ràlonge.

We bvnlì nø nà tiqgø dvpat lvpat zìdang vháng lvm dang svng vgám we íemá? Kadø zàn dvtut wáshì vdu we svng dvtøp lvm vchyak we íe. Vránø bvnlì vdòng taq èvl dvgvp angdè taq bøn sháshì we nøt shoklvm, bvnchvtrì svng bvnlì rvmnvng rìkaq màdat vchyàng we wá mvdaq pàwálvm wani yadø íwe nø tiqdá rvmnvng høqshaq nøt nvngòn yúm dvzvŕ we íe.

Laq laqni we bvnlì taq angdè tiqgø kadø gø wáshì lvm mvbyo nø zàn dvtut wáshìlvm kadøgø mvbøn longwe ínìnø we bvnlì taq kèní nvrshì lvm svng dvgø shì ràlonge. We dø nvrshì lvm nøtrat shì we taq gø angdè bvnlì mvtú rì svng shvlá wa dvtøp dángí angdè shvrà taq zàn dvtut bvnlì zángshì lúnwe vsvng mvle dvlú dvgøā ràwe svng síng shá ràe.

Angdè nvrshì bøwe mèpvng we shvrà taq angdèò bøng shvlá gvlshì lúnlvm dvzaqshì ràwe mvtaq angdè shvrà taq zángshì lvm vsvng mvle gø dvpat gø we shvrà svng téwa zìdang dvháng lúnwe, bøng shvlá lún shvlawe dø dvdamā ràwe íe. Shøn mvyø we taq nà tiqgø we bvnlì kèní nvrshì lvm dèdam shì bøwe ínìnø chan vnán, pøq pøq nvn lángshì we dø møí nø bvnlì taq vl we shølshú, rvmnvngrì kaq svng gø shá dvzár weí dvtøp nø vrashì lúnlvm svng shøn mvyø we íe.

Bvnlì wangrì taq vzi vrùng wawe vlrà vrvm, nøt vrá we mv-vl nø mvbyo rawe rvtø vrvm taq bvnlì lángshì lvm svng wa dvdam shàì we dø mø:í nø angdè lvpat nvng kadø vdu vbóng we, lvpat zìdang nvng dvtøp we taqkèní wa angdèí èlàng bøò we bvnlì nvng angdè ò bvnlì àngshár vní lvp dvpat shvla dø wáshì lúnlvm vchyak we svng shvdøm we dvtit dvle shvngkà yayáng naròe.