Vdèò lvpat tvnù manggá svng tuqlún lv́m dvpvt

Vdèò lvpat tvnù manggá svng tuqlún lv́m dvpvt

Lvpat wawe nø wáràwe bv̀nlìrì taq vdángvmwe mv-vl nø tvrà yvnggún díràwe zaqlè wàng tvrà tiqlòng íe wanø shǿn shvlawe gø íe. Vdè tiqgǿ taqkèní wá ràwe nvng wá vduwe bv̀nlìrì nø vtangshaq vl longwe ínø wágø mvtǿmshì we svng yv́nglún shìe.

Wedø rø mvtǿmshìwe bv̀nlìrì nvng wá mvyǿwe bv̀nlìrì dvhø̀ taq vtøplv́m tvràrì vl longwe ínø̀ we tvrà taqni vdèò lvpat tvnù manggá svng diwe tvrà taq vmv̀nvm we gø bǿnsháò wegø íe. Weratnø̀ ni vrv̀mò lvpat taq vdèò dvdamshìwe lvpat tvnù manggárì svng tuqlún lv́m wawe tvrà vyáshì ràwe dangrì svng gø síngshá lv́m vchakwe íe. Wedangrì taq

1 . wáràwe bv̀nlì rì luqluq svng tiq dvshaqí wáshìwe- nøngmaqò lvpat tvrà taq wáràwe bv̀nlì rvmè taq tvrà vmànvm we vsv̀ngrì gvzà yv́nglún shìe. Àngmaq svng èyv̀ngvtnò kvt gvzàni mvhøq mvhè wáshìnø dvzaq dvkángshì we ínìgø àngmaqò bv̀nlìrì taqkèní lúnò we àngshí àngwvtrì nø pà vjúgø mv-vl nø vshø̀ng màshǿng ívmwe dangrì gø gvzàni yv́nglún shìe. Wedangrì sv̀ng èyv̀ngvtnò dvgvp àngmaq nø pàgø màwáshaq vlwe vsvngrì gø mø:í, ínìgø bv̀nlì luqluq svng tiq dvshaqí wàòwerat wedø bø̀nwe tvrà gø íe. Weratnø bv̀nlìrì svng tiqlòng dángbǿò mèpvng tiqlòng wáshìnø we bv̀nlìrì mvdàm taqgø nøt dvtøpshì lúnwe ínø wedø èwàò lòngnø shvlawe dang svng shvdǿmnø nònggwòn zí mvyǿwe gø íe.

2 . tvlú dvgǿ shìràwe- lvpat taq jór nònggwòn vtoshì lúnò vsv̀ngrì nø vdèò bv̀nlìrì mvdàm taq dvzaq dvkángshì we mvtaq dang vrv̀m taqgø tvlú dvgǿshì sháò we vsv̀ngrì íe. Vránø àngmaqnø ni vrv̀m taq shvjangshì we wáshìe. Weratnø vdèò lvpat taq jór nònggwòn lún mvyǿwe ínìnø tvlú dvgǿshì we laqyà gø gv́l shì ràlonge.

3 . Nvrshì rvtø mvgv́l shìwe- lvpat taq jór nònggwòn svng vtoshì lúnò we vsv̀ngrì nø vyv́ng yaqdø̀ng mà nvr nvr dvzaqshì we vsv̀ngrì íe wanø shǿn sháìe. Wedø dvdam shìwe nø dvdàm vléshìwe tvràgø íe. Vdèò bv̀nlìrì mvdàm síngrál nøt kèní mv́n dvzaqshìwe nvng vdèò nvrshì lúnwe rvtø̀ rìtaqgø dvgá tiqdang dang kèní paqzí lashiwe nvng cvnshìwe dangrì taq rvtø̀ zíshìwe gø íe. Vsvng tiqgø taq nvrshì rvtø mvgvlshì we ínìnø vdèí èwàò we bv̀nlìrì mvdàm vnǿn dvzv́r lú:ngò wegø íe. Vdèò bv̀nlì wawe rvtø̀ rì taq nvrshì we rvtø̀ svng lushì sháò we vsv̀ng tiqgǿ dvpvt rvtø̀ yvnggún jór nònggwòn rìsvng gø vtoshì lúnò wegø íe.

4 . shaqnvr màv́m v́m wáshìwe- vsv̀ng tiqgǿ ò lvpat taq làngdø̀m àngni høqshaq bv̀nlì wàngrì taq dvzaqv́m ràwe íratnø̀ vdèò shagóng, nònggwòn kù:ngà dvpvt ratnøgø shagóng shiqshàn tvrà dvpvt ratnø̀gø shaqnvr v́maq we laqyàrì gv́lshì lv́m gø vchakwe sv̀ng shvdǿm mvyǿwe íe.

5 . Dang vrv̀m taq dvcøp dvgǿshì ràwe- vdèò lvpat tvrà bv̀nlìrì vrv̀m taq jór lúnlv́m wawe nø bv̀nlìshì cèrì kèní kut tøp tøpwa dvgǿshì we dangtaq nøt dvtøpshì lv́mgø vchakwe íe. Dang vrv̀m bv̀nlì vrv̀m taq vbamshì wegø wá mvdaq long. Weratnø̀ shóngshø̀ngwe shòlaqré vnvm vchangrì vdèò lvpat tvrà taq jór nònggwòn svng vtoshì lún mvyǿwe vsvngrì nø vdèò lv̀mpvng taq vlwe vsv̀ngrì tiqgǿ vrv̀m kaq svnggø vdu vbóng dø vzø̀m vzvpnø shvladø dvtúwe wáshì ràwe gø íe.