Vdè ò lvpat tvnù manggá rì jór lúnlv́m dvpvt cvndøng ràwe tvrà rì

Vdè ò lvpat tvnù manggá rì jór lúnlv́m dvpvt cvndøng ràwe tvrà rì

Shòlaqré rì tiqgǿ vrv̀m taq dvdamshì we lvpat tvnù manggá rì wawe nø tiqgǿ vrv̀m taq vl long wewa íe. Wedø vdè ò dvdamshì we lvpat tvnù manggá rì sv̀ng jórlún lv́m dvpvt nø lvpat tvrà sv̀ng døngmvn dø di nø̀ dvzaqshì ràwe nv̀ng cv̀ndøng tvrà rì sv̀ng dvtit tvle lv́m íe.

1-         Tiqdá vsv̀ngrì taqkèní cvnshì ràwe.. vdèò dvdamshì we lvpat tvnù manggá rì sv̀ng chvpdvp jór lúnlv́m dvpvt tiqdá vsv̀ngrì ò paqzí ziwe dangrì sv̀ng vtoshì nø nøtcun dvtøp shìwe, lúnshì rawe vko vkángrì mvdàm shvla dø lángshì we taq só:rí vdè ó lvpat tvnù manggá rì sv̀ng jór lún dvzv́r wegø íe. Wedø lvpat tvnù manggá jór lúnlv́m tvrà taq dvzaq dvkángshì we rvtø̀ taq yaklv́m shìwvtrì àngpv̀n pv̀n vkǿn rawe rvtø̀ rv̀mnvng rv̀mchangrì taqkèní paqzí zi, nònggwòn zi rawe dnagrì nø jø̀ng jøngni vdè lvpat tvrà dvpvt tubùmā lúnwe tvrà rì íwerat welòng sv̀ng vpǿ shvring nø cv́n dvgømshì lv́m shvdǿmnø̀ nònggwòn ziwe íe.

2-         Vdè góng vdè kám vlǿmshìwe.. vdè ò dvdamshì we lvpat tvnù manggá rìnø vdè nvng vsvr we shvrà, rvtø tiqyv̀ng taq vl longwe íratnø̀ tiqkvt kvt nøt vtiqlv́m tvrà rì, nøt mvsø̀n kù:ngà vnǿn lv́m tvrà rì gø vhǿm sháshì we íe. Werat nø vdè ò lvpat tvnù manggá wawe sv̀ng nø vdè tiqgø taqkèní shvng shvng wa síngshá shì lúnlv́m nvng kadø íwe bv̀nlìrì sv̀ng nø wá vdu longe, wá màdu wawe dangrì sv̀ng gø shvng shvng wa nøtratshì taq só:rí vdè góng sv̀ng vdè kámshì nø wá dvzaqshì lv́m gø gvzàni vchvk we íe.

3-         Bv̀nlì dvlàrì sv̀ng chvkwa gvlshìnø̀ wá dvzaqshì rawe.. vdèò dvdamshì we lvpat tvnù manggá sv̀ng jórlún lv́m dvpat rà vchvk we dangrì sv̀ng tvlú dvgǿshì ràlonge. Vdè taqkèní kapà rì tvlú wá vdu longe wawe dangrì sv̀ng cun dvtøpshì nø̀ we tvrà sv̀ng jór lúnlv́m dvpat nøt dvtøp shìnø̀ àng dvtang tang wá dvzaqshì ràlonge.

4-         Kadvgvp gø cvnshì ràwe.. vsv̀ng tiqgǿ ò lvpat tvrà yv̀ngùng taq cvnshì we tvrà rìsv̀ng nø nvr mvdaq long. Vdè lvpat taq téwa yakwe bv̀nlì tvrà wawe nø we vdè ò lvpat tvnù manggá sv̀ng jórlún lv́m tvrà ni ílonge. Weratnø̀ vdè kadø íwe shvrà taq v́l vduwe ínìgø bv̀nlìrì mvdàm vzingshì we, lvgùn we dangrì mv-vl dø shvlá vtang dvzaqshì lúnlv́m íwe sv̀ng shvdǿm we íe.               

Wedø vzàng lvp lvpat taq jórlún lv́m ratnø̀ yakwe shìwvtrì àngpv̀n pv̀n rìkaq sv̀ng nø jøng jøngni vhǿ:mshì rawe írat nøt mvsø̀n kù:ngà vnǿn lv́m tvrà rì kaqsv̀ng gvsat mvngan ràlongwe gø íe. Vsv̀ng tiqgǿ ò lvpat tvrà taq nøt dat lv́mdø íwe tiq tvrà cè taqkèní wa nøt tang nøt datwe mvwá shì lv́m nø vchvk mvdø̀ng tiqlòng ni ílonge. Tiqkvt kvt kratcǿm we tvrà rì vhǿmshì rawe ínìgø nvpni wawe rvtø̀ tiq rvtø taq vrá nøt dvkángshì nø dvzaq dvkángshì ràwe íe.

Pv̀nyv̀n dvzaq dvkángshì we vsv̀ng tiqgǿ ò nvpni wawe rvtø rì nø jór nònggwòn sv̀ng tuqlún we tvrà ni ílonge. Wedø mǿ:í nø nøt mvsø̀n kù:ngà vnǿnvm we tiqshvrà taq ènvr bǿò we ínìnø kadøgø lvpat tvrà taq jór lúnlv́m mv-vl long. Nvpni wawe rvtø nø nà, ngà shvngbe dvpat jór nònggwòn lúnlv́m dvpat èsaì we íe wanø shvdøm we nònggwòn zikà dvtit tvle we íe.