Vdè góng vdè ò lvpat kratcǿm we tvrà

Vdè góng vdè ò lvpat kratcǿm we tvrà

Vdèò lvpat tvrà kratcǿm we tvrà wawe nø vtang kèní svre dvké we tiqtvrà íe. Tiqkvt kvt vdè góng vdè gø mvdǿm shìnø vdè ò lvpat tvrà vmvng we gø bǿnsháò we íe.

Lvpat taq mòngzø̀l we, rvyù rvyóngwe nøt mvsø̀nrì nø vdè yángkèní øpkáng lv́m gvzà yvkwe gø íe. Tiqdá vsv̀ng tiqgǿ gǿ taq mǿíni dvrè tiqpv̀n pv̀n taq nøt vhwám we bǿn sháòe.

Nøngmaq ò lvpat tvrà rì taq vmvn we, kratcǿm we àng mvtúri àngpv̀n pv̀n vl longe. Tiqgǿ gǿ kaqsvng chávle shóngnøt vyuqvm we mǿí nìnø tiqpv̀n pv̀n taq nøt løpshìvm nø nøt vwáng shìlv́m yak we, vrù rapv̀n taq ya bø̀n we, vjú mv-vl dangrì taq nøt vlín we dø íwe nøt mvsø̀n laqyàrì ratnø̀ vdèò lvpat tvràrì taq kratcǿm nø vmv́ng sháò wegø íe.

Tiqgǿ gǿ kaqsvng chá vle shóngnøt vyuq we taq àng nvng vtoq vtiq we rvtø̀ taq nøt byo we, àng mvwám shì rawe rvtø̀ rì taq nøt yòlwe àng yv́ng svng nøt tuqwe dø írawe kvt vdè ò dòngnøt mvsø̀n rì svng vdèí øpkáng lúnlv́m gvzà yakwe gø íe.

Vdè lvpat svng àng shóngshì dø gvsøp gvzàm lún bǿòe. Vdè nvng màdu we, vdè kaq svng shóngnøt vjø̀ng mvzí lúnwe rvmjà rì nvng vzø̀m lv́m vdu longwe rvtø̀ rì taq lvpat taq kratcǿm sháòe.

Social Media nvng Game rì taq wa nøt vyuq nø ya bø̀n longwe kvt gø vyáng yaqdø̀ng welòng taq wa rvtø̀ dvzø shìnø online mvdàmø wa nøt løpshì weí vdèò nøt mvsø̀n shvngbe nø welòng taq róng kebǿò we íe.

Wekvt shø̀nggvn lvpvt nvng gø vsvr vmnø̀ wedø Social media nvng game rì ò vshuq bǿn dvzv́r sháòe. Facebook dø íwe Social mvdàmø wa nøt vyuqwe vsvngrì taq lvpatrì àngpv̀n pv̀n, tóng laqyàrì àngpv̀n pv̀n nø vdèò vgo mv́rcì svng gvyaq dvzv́r sháòe.

Jø̀ng jǿng taq online wawe mvdàm vsv̀ngrì ò lvpat tvràrì shvlanø̀ vnvpwe tiqtvrà svng wa dvtú nø vsv̀ngrì ò nøt kaq svng vyuq dø wá dvzv́r we gø gvzà vl longrat íe. Werì svng yv̀ngbǿì wekvt vdèò lvpat rì nvng shvbóng shàì nø nøt mvshø̀m we, nøt yòlwe nøtrì bǿn dvzv́ròe.

Vsv̀ngrì dvhø̀ taq bø̀ngshvng we, bø̀ng tewe dvgùngrì lún mvyǿwe nøtrì taqkèní gǿmke lúngò nø vdèí jø̀ng jǿngni wá vduwe dangrì vmáng sháò wegø íe. Jø̀ng jǿng nøngmaqò lvpatrì taq mòngzø̀l lòng vtoshì lúnlv́m dvpvt nø chvpdvp lvpvt kèní dvzaqshì we taqkèní wa lúnshì rawe íe.

Online wawe nø lvpvt vjø̀ng tiqlòng mǿí long. Cúnshàì we lvpat rvtø̀ àngdong taq vdè shóngshì we vsvngrì nvng mòngzø̀l dø v́llún lv́m gvzà vchvkwe íe.

Vdèò rvmjàrì nvng mòngzø̀l dø lvpat taq byo byocè v́l lún lv́m vchvke. Vdèò nøt mvsø̀n chávle shvrúngwe nøt tiqlòng ratnø vdè ò lvpat tvrà mà shvmánshì lv́m vyáshì ràwe íe.