Vdè góng vdè shóngshì ràwe

Vdè góng vdè shóngshì ràwe

Vsv̀ngtiqgǿ taq vdè góng vdè shóngshì lúne má wakà røtshì shvla longe. Jø̀ng jǿng taq vdè góng vdè shóngshì lúnlv́m gvzà yakwe gø íe. Lvpat taq vdè góng vdè wa kám shvlá vtang, vdè ò kà táā lún vtangwe rv̀mnvng, shvring lún vtangwe rv̀mnvng ni íe.

Nøngmaq tiqgǿ nvng tiqgǿ taq tiqdá vsv̀ngrì kaq shvláwa kàshǿn vtoqshàìe. Kàshø̀nwe taq vléshì we mv-vl lv́m shǿn vyá shàìe. Tiqdá vsv̀ngrì kaqsvng mòngzø̀lnø byodø v́l dvzv́r mvyǿìe. Vsv̀ngrì taqkèní vdè kaqsvng la shòng radø v́l sháìe. Wedø íwe taq vdè góng vdè ò mòngzø̀l we tvrà vtoshì lúnìe má walòng svng gø dvtøp shì shvlawe íe.

Vdè góng vdè shvng shóngshì ràe. Tiqdá vsv̀ngirì taqkèní vdè svng màto rawekvt pàwágø vdè góng vdè svng mvrà shvrishì lv́m mv-vl long. Vdè góng vdè kaqsvng mà shvlawe tvrà kèní wa mvrà shvri shìnø dvcipshì lv́m wá mvdaq we gø íe.

Lvpat taq vdègóng vdè vsv̀ngrì nvng màbóngdø dvdamnøtrì, vnvpwe mv̀rshv̀mrì rìn vrá vlwe íe. Weratnø̀ vdègóng vdè shóngshì we nø shvlá vtangwe cì tiqlòng gø íe. Lvpat taq nøt cv̀mlv́m dø íwe àngdang dangrì vl longe. Kadvgvp gø vdè nøt svng dvcv́mshì lv́m mv-vl. Lvpat taq kadvgvp gø vdu vbóng dø wa bø̀nlv́m wanø kadvgvp gø dvdamshì mvdaq.

Vdè nø vdè mvrà lashì we wagø wáshì mvdaq, ngàò góng ngà mànvp, vgo mv́rcì gø mà shvla, ngà nø vsv̀ngrì dvhø̀ taq pàgø zǿm mvdàng wanø nøt gv́lshì mvdaq wegø íe.

Tiqdá vsv̀ng rìò màshvla we tvrà rì svngnø vtoā dá:ngí vdè góng svng vdè nø vrá vtoshì mvlún we gø bǿn sháshì we íe.

Vsv̀ngrì tiqgǿ vrv̀m nø vdè shvnvng kèní vsvrvm nø̀ làngdø̀m taq vdè tiqgǿ wa ngámshì vdu rawe gø íe. Vdè taq vkǿn rawe shìwvtrì shvngbe svng vdè taqkèní wa pvran ra longwe ínø̀ vdè tiqgóng wani vdè nøt svng øpkángshì lún we gø íe.

Vdè góng svng vdè mvshóng shì lúnwe dángte tiqdá vsvngí vdè kaqsvng kadø gø mvshóngshì long. Weratnø vdè tiqgóng svng nø vdè wani vpǿshì rà we íe. Lvpat taq kø̀mzøpwe vsvng wawe nø mv-vl long. Weratnø vdè góng vdè gø nøt mvsø̀n kù:ngà vnǿn lv́m mv-vl dvzaq dvkángshì rà longe.