Vdè nvng vtoq vtipwe rømnvng luq lúnlvm mvdøngnø kapà íemá?

Vdè nvng vtoq vtipwe rømnvng luq lúnlvm mvdøngnø kapà íemá?

Vsvng tiqgøò lvpvt taq á:maq lvm, góng gwárì nvng vl lvm shvràrì shvzøng shìlvm dvpvt nà ngà shangbe nø dvzaq dvkángshàìwe íe. We dang nvng singnø wulaq bvnlìrì nvng vsvng nvng vtoq vtipwe bvnlìrì gø dang vrvm dvpvt ràvchvkwe íe.

Shøn mvyøwe taq vsvng tiqgø taq vdèò shvnvng gòr gòr rømnvngrì nvng vdu vbóngdø vtoq vtip shìshálvm gø mvdøng vchyak we íe. Wedø vtoq vtipwe dang taq tiqdá vsvngrì taq kèní vdèsvng vdèkaq la vpøradø mø:íni yáng mvtàmò dø wáshìwe dø mø:ínø vdèò nøt laqyà shvlá vjøngtaq kèní vtoq vtipshìwe lòng taq kèní wa vsvng nvng vdu vbóngwe vtoq vtipshì lòngsvng lúnshìwe svng shvdømwe íe. Tiqkvt kvt nøngmaq dvhøtaq vsvngò lvmpangø vl vdurawe , vsvngí yáng mvtàmvm rawe, shvyømvm rawerì svng gø vhøm sháìe. Wedø tiq dvchá vdèò rømnvng, àngrì angyang, àngní àngnvm dvhørì taqøgø tasvng vpø shvring kéìnøwa ngàngdøngwe vtoq vtip lvm yangúng svng vtoshì lúnshìwe íe. Adámvgàmwe, dvshàwe, paqzí shawe, mvshawe, shíngràlnøt vlwe ,mvlwe rìtaqwa nøtvyuqìnø vtoq vtipwe ínìnø welòngnø ngàngdøngwe vtoq vtip lvm mvbøn lòngwe íe.

Vsvng kaqsvng yáng mvtàmvmwe í mvdøng mvmvnwe kàshønrì, yàpènø ngàí kadø vlònìgø kámpèíe wanø mvkang vyá wawe nø vdègóng svng vdè vyàpèíe. Tiqdá vsvng kaq mvdøng mvmvn dø ewálúnòwe ínìgø vdègóng svng nø kadøgø mashì màshvla daqweíe.

Rømnvngrì nvng vtoq vtipe wawe nø nøt mvsøn taq kèní vtoq vtipwe írvtnø tiqdá vsvngrì taq kèní vdè svng la vpøshvring daqdø wáshì mvràwe mvtaq yáng mvtàmvm lvm døgø wáshì mvdaq. Vsvngrì nvng vtoq vtip shìshálvm taq vdè nøt mvsøn laqyà vjøng taq kèní vtoq vtipwe taqkèníwa tiqdá vsvng rømnvngrì taq kèní kámvlømvm rawe ínø ngàngdøng nø mòngzølwe rømnvng lvpvt svng vtoshì weíe wàngnø dvtit tvle shìwe shvngkà yayáng naròe.