Vháng vlún lvm tvrà

Vháng vlún lvm tvrà

Cún shàì we lvpat taq vháng vlún mvyø we, vdá mvgàm mvyø we rìnø vsvng gø vrvm ò shóngshì we tvrà tiqlòng ni íe. Ínì gø we tvrà taq chvpdap dvzaq dvkángshì lvm dang taq nø nvngòn vnønì we gø íe. Tiqdá vsvng vháng vlún vmwe svng wa yàngìnø àngdè tiqgóng chvpdap dvzaqshì lvm dang taqnø vná shàì we vlìe.

Wewa mvtaq vsvng tiqmaq taq írani àngdè tiqgóng vháng vlún lvm tarà taq mvwá shì we mvtaq tiqdá vsvngrì vháng lvm tvrà svng høq shaq mvnúr nøtí vbam shì vsvngrì gø vl we íe. 1. Àngdèí lá vshøpshì bøwe pø gvmsùngrì svng náng shì shá ràwe Vsvng gø vrvm taq nø àngdè dèzaq shìwe bvnlì taq cvnnø shvng gvmsùng lún vshøp shì we wa íe.

We pø gvmsùngrì svng lángshì we dang taq gø ràwe, vchyak we dang taq lángshì lvm tvrà svng gø pvràn shì shárà longe. Ti kvt kvt gvmsùng rìsvng àngdè dvpat vjú mvvl we, rà vchyak we gø mvvl we dangrì taq dvcøm sháìe. Wedø wáshì sháì we laqyàrì svng nø cvn cvn ni língshì, vwáng shì ràwe svng shvdøm we íe.

Shøn mvyø we taq vsvng tiqgøò lvpat taq pø gvmsùngrì nø kadángte zømdàng nø rà vchyak we lòsvng dvdamshì shálvm svng shøn mvyø we íe. Wedø íratnø vsvng gø vrvm nø gvmsùng lawe rvtø taq nángshì shá lvm gø vchyak we nvng we náng shì we taq gø manggá gvlshì ràwe svng shøn mvyø we íe.

2. Gvmsùng svng té vzìng radø èwàò Vháng vmwe vsvngrì dø vl mvyø we ínìnø pø, gvmsùng vl nø wa bøn daq longe. Pø, gvmsùngrì lúnlvm dvpat nø bvnlì wá dvzaqshì ràwe ínø wedø lúnshì rawe gvmsùng rìsvng gø téwa vzìng lún luqlún lvm dvpat wáshì ràwe íe. Rúngdàng èwa we ínø pà tiqpvn gø bøn lvm mvvl long.

Wedø íratnø gvmsùng lúnshì lvm bvnlì tvrà svng vzàng wá dvzaqshì ràlonge we mèpvng we àngdèí lá èlún bøò gvmsùng rìsvng té luq lúnlvm dvzaqshì ràwe svng shøn mvyø we íe. Yadang taq àngdè ò bvnlì tiqlòng taq wa mø:í nø dvgá bvnlì rì taqgø share rì zángshì weí gvmsùng lá shvla we svng shøn mvyø we íe.

3. Bvnlì mvkrøm mvdøprì vl lún lvm dvzaqshì ràwe Bvnlì tiqlòng taq nvmlat èzáng shìwe dvgvp shvlá zìbè mvluq we, vko vkángrì àngdèí dèdamò dø mvlún shìwe ínìgø we rvtø taq gvmsùng mvdàm bvnlì mvkrøm mvdøprì téwa lún lvm svng wá dvzaqshì ràlonge. Pàwálvm wani nà taq bvnlì mvkrøm mvdøprì vl long mvbat nà zømdàng we shvrà téwa vl mvbat ílonge.

Íratnø bvnlì tiqlòng mvdàm taq èrip vmwe ínìnø we bvnlì taq kèní mvkrøm mvdøprì lánø vshøp shì shálvm mvdøng vchyak we íe. Vsvng tiqgøò lvpat taq bvnlì tiqpvn taq wa mø:í nø dvgá bvnlì pvnrì taqkèní gø mvkrøm mvdøprì lu shì lvm shálvm gvzà vchyake. Ínì gø we dang taq tiqlòng taq gø chyak wa zømshì we mvvl nø mvdàm ram wa wáshì dø wáshì mvdaq.

Àngdè taq vlwe bvnlì mvkrøm mvdøprì wawe taq we paqzí rìsvng àngdèò lvpat taq chvpdap vjú vldø lángshì lúnwe vlrà longe. 4. Àngdè shóng wámshì we dangrì taq shvrúng nøng vl ràwe Kapà dang taq ínì gø jøng jøngni àngdè bøn mvyøwe, shá mvyø we ínì nø shvrúng nøt wawe vlrà we íe. Kadø íwe paqzí pvn taq ínì gø shvrúng nøt mvvl we tiqgø dvpat nø síngshá lvm yakwe íe.

Vsvng tiqgø taq tiqdang dang taqnø shvrúng nøt wawe gvlshì ràlonge. Pàwálvm wani we shvrúng nøt kèní wa vsvng tiqgø svng zitnøt zílún we íe. 5. Shá ká ká dvpéshì we wá mvdaq Vsvng tiqmaq taq mvsháò we dangrì taq sháò dø dvpé shìnø vlwe gø yánglún shìe. Wedø íwe vsvngrì nø chvpdap taq wásháò we mvvl we mvtaq shvngøt dvtú we dangrì taq gø chùn chùn wa cvnwe mvwá shìrì íe.

We dø íwe nøt laqyàrì mvlíng shì dángte nø we vsvng nø vháng vlún lvm dang taq yak longe. 6. Vsvng nvng vzøm we dang taq shvlá vtang dvzaqshì ràwe Yadø vsvngrì dvhø tasvng dvløt shøngjung kewe bat taq vsvng nvng vtoq vtip we, vzøm vzap we dangrì taq shvlá lvm gø laqni vchyak longe.

Kadø íwe wulaq bvnlìrì taq ínì gø tiqgø nvng tiqgø, bvnlì tiqlòng nvng tiqlòng nø vzøm vzap we taqkèní wa vháng vlún lvm lúnshì we svng shvdøm we íe. Wedø íratnø vsvng tiqgø taq vsvngrì nvng vtoq vtip we, vzøm vzap we wawe nø bàngzì tiqlòng dø ni cvn long we íe. 7. Svre nøt mègvl shìni Svre nøt rat nø vko vkángrì cøm vmáng sháò we mvtaq àngdèò vháng vlún lvm dangrì taq gø mà shvla dø vbam shi dvzvŕ lúngòe.

Àngdè nø ka zìdang taq èrip we ínìgø bvnchvtrì pvranwe dang taq nø nøt mvsøn kùngà rì zángshì ràwe wa íe. Bvnchvtrì, shìwvtrì vhømshì rawe nø nàò nøt mvsøn kùngà rìsvng vhán vlún dvzvŕ we svng gø døm shá ràe. Werat nø mvdàm kaq shønshì bøì we dangrì nø vsvng tiqgø zìdang vháng vlún lvm dang taq cvndøng ràwe nvng gvlshì ràwe nøt laqyà rì írat nø yadangrì taq zøm shàì nø dvzaq shàì we taqkèní gø vrvmò lvpat rì vháng laqlúnì wang dvtit dvle shvngkà yayáng naròe.