Vlé shìlvm svng mè sèreni

Vdè Myanmar móngdàn taq vlì we vsvngrì mvlúng kaq svng èyàngvtnò dvgvp angdèò angsø angcèrì taqkèní tiqpvn pvn wá vléshì we vlra dvgvp dam zúshìnø shvngøt sháì we svng yánglún shìe. Wedø shvngøt dvtú we gwørwàng vdòng kèní téráì we làngrérì svre nøt zángshì nø dang angpvn pvn taq wá mvkam shìwe í søm vnøn dvzvŕ rawe svng yánglún shìe.

Vléshì lvm svng wa svre nøt kèní pàdang taq ínì gø svre nøt í wá mvkam shìwe svng bøng dvzvŕ we íe. Wedø írat nøt dèzvŕvt nò nø wa wá sháò we wá kamshì we svng bøn dvzvŕ e. Wedø wáshì lòngsvng nvng gøp kàò vshuq wanø shvbóng sháì e.

Wedø bøn weò ang lvjøm nø angdè góng àngdè kámnøt mv vl we, svre nøt kèní angdè svng gøm kewe rat Gvray í vzíshaq íwe nøngmaq gø vrvmò nvngòn kùngàrì taq vnøn dvzvŕ ìwe íe. Vsvng lvpat tiqlòng taq màlé shì we nø mv vl long, màlé shìwe dvrá vjì, mvshì we cìsvra wawe mv vl wawe dø tiq dvchá nøng maq gø vrvm taq gø angdè nvng singwe bvnlì døngjá rílúngì dvgvp vlé shì we nø vl lvm wa ílonge.

Angdè lvpat taq tiq boq cègø mènà léshì dvrwe vsvng tiqgø nø pàgø mvwa dvrwe vsvng ni íe wanø paqzí vdèrì taqkèní shønwe kà vl we íe. Bvnlì ewa we tiqgø taq welòng bvnlì nvng singnø mvkrøm mvdøp lún mvbáwe, síngshá mvbá we dvgvp vleshì we wá vdu lvm wa íe. Werì taqkèní cvnshì nø wa jo nø shvla we tvrà svng vto shì lúnìe.

Vdè góng vdè dvløt shàì nø zàn dvtut mèpvng svng màlé shìlvm dvzaq dvkáng shìràe. Wedø wáshì lúnlvm dvpat nø angdèí wá vlè shì bøwe rì kaq svng gø vto shì kámshì lúnlvm vchyak e. Vto shì nø kámshì we svng wá mèlúnò dángte nø kàdø gø vlíng vpo lvm svng wá lún lvm mv vl long.

Làngré lvpat taq angdè nvng sing we bvnli døngjárì taq dvzøm shì we rvtø vlé shìlvm svng laq màsvreì, vlé shì lvm svng nøt taq mè mèzáng ni wawe taq vdú vna wawe svng shøn mvyø we mø:í. Bvnlì shì wá mèpvngò dvgvp vzàng sundvdam nø wáshì ràwe svng shvdøm we íe. Wedø tiq dvchá angdèí walvm bvnlì welòng nø angdè dvpat mø:í ni tiqdá vsvng dvpat vjú ziwe í má? Mø:í má walòng svng dvtøp lvm wáshì ràe.

Wedø dètøp bøò mèpvng vjú ziwe shvla we bvnlì ínì nø rvtø mè sa ni chapdap èwào. Ewaò we vdòng taq jòwe vléshì we dangrì svng nàí èyàng lúngò nø síng shá lún lúngòe. Èwàò we taq vléshì we taqkèní cvnshì nø téwa shvla we paqzí rì lúnshì lònge.

Vsvng wawe nø bvnlì èwàò mvbat vléshì mvbat, cvn shì mvbat wáshì nøwa làng døm taq jórwe manggá svng lúngshì we wa íe.

Mvn Gvray ígø nøng maq gø vrvm svng síngrál nøt wawe paqzí jejú svng vzí shaq ínø we jejú gømpaq svng vdè lvpat taq chvpdap láng shàì we í vdè góng vdè svng kámshì ìnø àngdèò lvpat taq wá vdu we bvnlì døngjárì dang vrvm taq dvzaq shàì. Vlé shì lvm svng laq mà svreì wawe dvtit dvle shvngkà yayáng naròe.