Vléshì we tvrà vdòng taq wa vdǿng kewe tvrà

Vléshì we tvrà vdòng taq wa vdǿng kewe tvrà

Vsv̀ng tiqgø vrv̀m taq vléshì we tvrà wawe nø wedøni vl longe. Vléshì we tvrà wawe sv̀ng àngkvt kvt vlé shìwe nv̀ng tiqkvt kvt wa vlé shìwe dang taq wa vsháy vmwe íe. Weratnø vléshì we tvrà sv̀ng wá vléshì rawe rvtø̀ taq vdè nø vdè mvrà shvri shì nø vsv̀ngrì dvhø̀ taq mv́r dvcv́mshì we nv̀ng vzàng kaq sv̀ng dìlv́m tvrà rì taq høqshaq svre nøt zángshì vmwe, pàdang taq gø wá mvkamshì vmwe høqshaq lvpat sv̀ng vcǿm zíshì we tvrà nø mvbǿn daqwe ni íe.

Vdè tiqgǿ taqkèní nø pàgø mvrà na íe wanø èwà bǿò we bv̀nlì  taqkèní tiqdá vsv̀ngrì kaq sv̀ng zá vtøp dvzv́r sháò we tiqkvt kvt bǿn sháò we íe. Wedø írawe rvtø̀ taq vdè nøt mvsø̀nrì sv̀ng we dang taq wa løpshì nø nøt dvzá shìwe, vzàng lvpsv̀ng dìlv́m, dvzaq shì lv́m tvrà rì taqgø kratcǿm we nv̀ng lv́pat sv̀nggø zá vnǿn dvzv́r sháò we íe.

Vsv̀ng wawe nø vléshì sháò we vsv̀ngrì wa ínìgø we tvrà sv̀ng vléshì we sháshì nvng nvng dvtut shvnv́ngshì nø̀ wá shvnv́ngshì we vsv̀ngrì mònggv̀n taq gvzà vlwe gø íe. Vdè tiqgǿ taq lvpat tvnù mvnggá chvkwa mv-vl nø̀ vhú vhwaq wáshìwe í wedø íwe mvrà rì vlé shìsháò we vsv̀ngrì gø gvzà vl longe. We kvt vdè góng vdè mvrà chut mvlúnshì we tvrà rì bǿn sháò we ínø̀ we dang rì sv̀ng síngshá shìlv́m shvdǿm wegø íe.

Tiqdá vsv̀ngrì taqkèní vdè sv̀ng shvdǿm nø paqzí ziwe dangrì taqkèní gø dvtøpshì nø vlíng vpo shìlún lv́m gø vchvk we íe. Vsv̀ng tiqgǿ nv̀ng tiqgǿ taq wá vléshì we tvrà rì màbóng longwe ínø̀ we dangrì taq síngshá shì nø nøt língshì we ínìnø vdè lvpat tvrà taq jø̀ng jǿngni vháng vlún lv́m ílonge.

Vsv̀ng tiqgǿ ò lvpat taq àngboq boq vléshì we mvwá shì lv́m nv̀ng vlé shìvmwe tvrà rì sv̀ng gø vto shì lúnwe í shvla we tvrà rì sv̀ng cvnshì nø vwáng shì lúnlv́m dvzaqshì ràwe dang shvdǿm nø nònggwòn ziwe íe.