Vléshìwe tvràrì taq vshø̀ng màshǿng ívmwe rvtø̀

Vléshìwe tvràrì taq vshø̀ng màshǿng ívmwe rvtø̀

Nøngmaq shvngbe lvpat taq dvzaq dvkáng shaì wenø vdè lvpvt taq jórlún lv́m dvpvt, bø̀ngté lv́m dvpvt, vdá mvgàm lv́m dvpvt nvng vsvngrì ò zìdang nvng vbóng lúnlv́m dvpvt wawe manggá kèní dvkángshàì we íe.

Nøngmaq ò dvzaq dvkáng shàìwe tvràrì taq jór nònggwòn lún lú:ngì dvgvp nøt byowe tvrà svng vtoshì lú:nì wedø tiqdvchá wedø dvzaq dvkáng shàì we tvràrì taq vshø̀ng màshǿng ívmwe rvtø̀rì taqgø nøt mvngø̀r lv́mrì vhǿ:mì wegø íe. Wedø vdèò lvpvt zìdangrì vhángwe zìdang taq vl vdu rawe rvtø taq nøt mvsø̀nrì gø vháng lúnwe ínø̀ cǿm vnǿn rawe rvtø̀rì taqnø nøt mvsø̀nrì vjavmwe í nøtdat nøt vtangwe rì bǿnsháòwe gø íe.

Wedø íwe taq vsvng tiqmaq taq mvdàm zìdang svng tuqvmwe ínìgø lvpvng svng vrá vnǿn sháshì we tvrà svng dvdamshìnø nøt dvbumshì weí rvtø̀ vrv̀m svre nøt taqkèní lvpvt cúnshì we gø íe. Yadangrì shvngbe nø vsvng tiqgǿò lvpvt tvrà tiqlòngni íwe svng síngsháshì ràwe gø íe.

Vrá nø vdèò lvpat taq dvdamshì vduwe nø cúnshàì we lvpvt taq dang vrv̀m taq yùl yùlcè taqkèní lvpvt tvrà svng vle lú:nò vsvng wawe nø mv-vl dvr. Kagǿ ínìgø lvpat tvrà yv̀:ngùng dvzaq dvkángshì ràwe wa ílonge. Wedø íwe vdòng taq vdèò lvpat dvjàrì svng dánglún, jórlún høq dvzaq dvkángshì lv́mnø mvdø̀ngni vchvkwe íe.

Vránø shóngshø̀ngwe shòlaqré vnvm vchangrì, nvpni wawe rvtø̀rì vrv̀m taq jór nònggwòn nø wedøni vl longwe svng síngsháshì ràwe gø íe. Vhángwe mvdàm dvtàng kaqsvng tuqlún lv́m dvpvt wawe nø yaklv́m shìwvtrì àngpv̀n pv̀n vkǿnwe vdòngtaq dvzaq dvkángshì ràwe gø íe. Vdèò lvpvt tvrà taq dvdamshìwe manggárì svng jórlún lv́m dvpvt nøt mvsø̀n dvbumshìwe taqkèní wa cúnshì mvdaqwe gø íe. We vdèò lvpvt tvrà manggárì ò tvrà taq dvzaq dvkángshìnø̀ cúnshì lúnlv́m nø mvdø̀ng vchvkwe íe.

Nøngmaq taq vhǿm sháshìwe vtøplv́m tvrà tiqdang dangrìcèrat nøngmaqò dvdamshìwe manggárì svng vnǿn dvzv́r mvdaqwe gø íe. Lvpat tvnù manggárì tìnnø gvyaqshìvmwe rvtø̀ taq nøngmaqò lvpvtrì gø wedø ni zá vtøp dvzv́r lú:ngò wegø íe. Chvpdvp rvtø̀ taq kratcǿm nø nøt cv̀mlv́m vhǿ:mìwe ínìgø nvpni wawe rvtø̀ taq nøt màdvcv́mshì shaqí kù:ngà lushìnø dvzaq dvkángshì lv́m rà vchvkwe íe. Weratnø̀ vdèò lvpvt tvnù manggá svng nø kadvgvp gø tedø gv́lshì lv́m nvng nøngmaq vdòngtaq vlwe zitnøt rv́lnøtrì taqkèní dvzaq dvkángshì lv́m vchvk wegø íe.

Nøngmaq tiqgǿ vrv̀m taq wávduwe bv̀nlìrì svng vzing shàì nø lvgùnwe nøt laqyàrì v́l sháìe. Vsvng tiqgǿ wedø lvgùnwe nøt laqyàrì taq byo dǿm bǿò nø̀ vlínvmwe rvrø̀ taq lvpvt tvnù manggá svng jórlún we tvrà nvng gø vsvr mvnshìvm we íe.

Tvmø bv̀nlì wavm we vsv̀ng tiqgǿ nø we tvmø bv̀nlì wavm we tvrà taqni nøtløpshì nø wá dvzaqshì ràlonge. Wedø vdèò bv̀nlì dvtí rì taq vtiqshì nø lvgùnwe nøt laqyà zangvm we kvt we bv̀nlì rì taq kadvgvpgø jórlún we tvrà mv-vl long. Vdè ò bv̀nlì døngjárì mvdàm wádvzaq shàì wedø tiqdvchá we bv̀nlìrì nvng singnø kadvgvp gø cvnshì we tvrà svnggø nvr mvdaqwe íe.

Vdè lvpat taq paqzí mvkrǿm mvdøprì cvnshìwe dangtaq ènvr bǿò we ínìnø lvpat zìdang vháng vlúnlv́m tvrà rì taq vgám dvzv́r sháò wegø íe. Weratnø̀ vsvng tiqgǿò lvgùnwe nøt laqyàrì nø nøngmaq shvngbe svng kratcǿm dvzv́rwe tvrà tiqlòng gø íe.