vmaré nvng lvngàré rvmvngku gvlshì we

Svmaré nvng lvngàré rvmvngku gvlshì we

Rvnvng wawe nø vsvk tewe cvmwe shvngbe mvrilrì shvngbe taq gvlshì wewa íe. Cvmré bat 2,3 nøng mvril kèní 60, 70 mvril shvngbe taq rvnvng wawe nø rà vchyak we wa íe. Vsvng shvngbe nø àngdè tiqgø nvng jàng laqyà, nøt mvsøn vbóngwe rvmnvngrì svng shóngwám shìe. Wedø íwe taq svmaré lvngàré rvnvngrì tiqmaqnø tasvng nøt vzømweí døngku shvzøngshì vmwe nvng tiqmaq taqnø rvmnvng shvlá ku wa tiqdvciq vtoq vtip nø vlwe vsvngrì gø vlwe svng yánglún shìe.

Wedø svmaré nvng lvngàré vzømwe, shóngnøt vzøm vmwe dang taq svmarérì ò nøt svng èyàngvtnò dvgvp àngmaq dòngnøt taq mvti mvni shvngbe svng dvdam òe wae. Lvngàrérì mvdàm téwa nvrøm vjángshìe, wezìdang taqnø shóngnøt vzøm lvm tvrà svng diwe rvtø taq bønwe ílonge.

We rvtø wawe nø tiqgø nvng tiqgø ò dòngnøtrì jànglaqyà dang síngshá kélvm dang níshìwe rvtø íe.

Dènibat svmarérì mvlúngka taq wedø íwe rvtø àngdè nø àngdè rvwvlnøt taqkèní yagø nø ngàkaq jøng jøngni shóngnøt zíshì we ímá, rvmjà tigø ku wa íe má, àngò nøt mvsøn jàng laqyàrì shvngbe svng dvtøpmò we mvtaq tiqdá rvmnvngrì svnggø vchángshì we wásháòe.

We svmaré mèí lvngàré rvjàpè dangtaqkèní dvdamshì sháò we nø àngnø bvng mvnøcè vlnø dvgá svmarérì kaqgø láshìwe mv vl. Shèrwe nøt mvsøn gvl shìe. Ngà tiqgō svngwa døngwe nøtí vtoqshì we íe wanø dvdamshìe wae.

Svmaré tiqgøí àngrvmjà lvngàré gø svng shóngwámshì bøwe ínìnø we lvngàrépè kadø shønwe, kadø gónggwá dvcøpshìwe shvngbe svng yáng wámshìe. Àngnvng vtoq vtip we rvtø vrvm taq nøtshøm nøt byowe svng vtoshì lú:nòe.

Àng shvnvng taq vlni nø shvngbe kømzø:pme wanø dvdvmshìe. Kadvgvp àngò lvpat súngshú tiqgø dø vlømshìvme wae.

Tiqni mvdàm tiqni síngsháā lún lú:ngòe yadø bønlú:nwe nø rvmjà shvlá tiqgø bønlún lvm gømla tiqlòng niíe.

Svmarérì mvlúngka taq àngmaq bøn mvyø, tuqmvyøwe lvpvt dvpvt dvdamwe yøpnvng shøngranrì gvzà gvlshì sháòe. Àngmaqò nøt mindset rìnø romantic bøne wae.

Wedø íwe taq lvngàré nvng svmaré àngní dvhø tasvng vpø shvring kenø kàsvdiqrì cvndøng we taqkèní ngàngdøngwe rvmjà lvpat svng vrangshì lúnlvm íe wawe dvtit tvle svngkà yayáng naròe.