Vpèí shønò we mvshøl

Vpèí shønò we mvshøl  

Dàlvm vle lèí vpèá.. tvmø gvbà tiqgoí mvgwì tiqgo dvlà baqke bøàí.. è,íe.. angpè angcè angnípèí tiqdø ni yvng bøà we íe. Vkvt yàlòng kagø svng gø mèdètá ni, mèshøn nié ngàcèá vlòe. Pàlvmle jøngjøng ni baqke bøà le vpèá, ínìgø meshøn nì wange nàí táshá cíngò dø mepvng wa shønlvm laqí vlòe. Vkvt nàí shønò nigø vsvng rìí kám lvm mví. Angcè pènø gvza nøtmvshøm ámì we íe. Angnípè shøngla ke weyvng jøngjøng ni tvmø gvbàí mvgwì tiqgo baqke bøà rvt gvzà dàámì we íe. Ínìgø mvrìng tuq weí nøt vl mvnvm nø zangwa rvmnvng pè yvng dinø shøn bøà, rvmnvng pè mvkám nø vzi vrùng wà bøì we íe. Wamepvng angpè yvngsvng tuq ráì, angní nø nvngwà tiqgo cømgø nø dángkéò gø svng zílvm kà dvløt kewe íe.

Angpè nø we mvrìng vsvngí kám vrvm døngmvn we shaqré shaqtvng tiqgø gø íe. Cvmré gøní nø angpè yvng svng tuq daqì nø tvmø gvbàí mvgwì tiqgo baqvm bøàwe ímá wanø røtdaqã rvt angpè nø dàá mì, angpè vhøshì nø yapè wadø shøn we íe, mekám nì vlòe. Wekvt angcèpè nø gvza ngàn:ámì nø nøt mvbyo weí vpèá tvmø gvbà goí mvgwì tiqgo svng baq ke bǿà we ngàní pèí yvng bøshàwe mví má lè? Vkvt pawá lvm nàngwà tiqgo cøm dèzvřàe. Wamèpvng nø ngàcèá vkvt nà rvmnvng pè yvng dìnø yãdø evl bøò. Apè zømwàng svng shàwap diwe tiqdàm cèíwa shvtnga tiqgo svng vgo, vnà, lvmpvng hí tiqtáng svng raké bøà evl bøò, mekám nìnø nvngwò vnígo zíkà dvløt késhì èvlbøò nàí dvngké daqòe. Vpèà welòng mvbøn, ngàgø mvkám, ngà svrènge wae. Edi bø mecerè nì vpè kámshì lvm íe vlòe. Angpèí wedø shønò rvt angcèpè nø rvmnvng pè yvng dinø angpèí shvngøtnò dø shøn bøà. Welòng svng gø makám nø vzìvrùng ke nø nvngwà vní go cøm gønø dángkéò gø svng zíkà dvløt ke bøì we íe.

Wemepvng angpè svng røt lvm dìdaqì. Angpèí kámlvm døni íe, tvmá tiqdvmí wa shatngà svng vgo, vnà, lvmpvng hí tiqpa svng rãké bøà we íe. Yadø íe, ngànø nvmwacè dvchø:ngò nø vlke shatnga gonø yélshì nø lvmpvng híí vnà mvshaq shìdake, ngànø dvchø:ngò we írvt welangí wap bø:ngà ke hí yvng rakéò dángí vnà nvng vgo yvngsvng rake bøà we íe, vloe. Wedø írvt tvmá tiqdvmí wa vshøm yvng svng rake bøà we íe, vloe. Angí nvngwà vnígo lúnbøà rvt gvza byo bøì we íe. Angpèí shønò wenø wedø írvt, døngmvn we kà vrvm svng shøn màdu we ínìnø shøn mvdaq we íe. Døngmvn we kàsvng vsvngí kámlvm dø vto lúnlvm dø íwe dvtvn lvm vlwe kàsvng wa kám we íe. Weyvng kení ang súnshì we lvpvt taq vháng lvm vpøwe tiq dang svng dvdvm shá bøà we íe. Wedø írvt vpèí shønò we mvshøl nø denì høq zømdàng nø súnshì we íe. Angpèí shønò we mvshøl dø tvmá tiqdvm nø cúnshìwe lvpvt taq dvdvm shálvm zømdàng we svng shálún bøà we íe.