Vpøwe kà

Vpøwe kà

1. Lvpat walòngnø mvjàntøm tiqlòng døni íe. Nàloq bønìnø vrá kungshìlvm dèzaqshì.

2. Vsvng tiqgø shìwvtrì vlwe ínø welòng svng kàdø mvnga lvm tvrà walòng nø mvdøngni vchyak we íe.

3. Tiqkvt kvt àngdè mvshóng wámshìwe dangrì bøn ra dvgvp mvngan lúnlvm dèzaqshì.

4. Àngdè bøn mvyø we mvdàm bøn vdu lòng svng èwàò wenø shvlá vtang ílonge.

5. Mvrà tiqlòng svng vléshì bø kvt vchyangshì we gø wáshá ràe.

6. Àngdèò lvpat tvrà bvnlì rì taq vléshì lvm svng mè sèreni, vléshìe walòng nø mvkrøm nvdøprì zílúnwe shvra tiqlòng niíe.

7. Kapà bvnlì svng èwàò we ínìgø vpø shvring shì shálvm dèzaq shì.

8. Pazí lá lvm mvril taq paqzí èláò, rvmjà lá lvm mvril taq rvmjà èláò, Pazí lawe rvtø taq rvmjà mèláni pàwálvm wani shóngnøt tiqlòng taqkèní wa lvpat svng vrang lúnlvmnø rvzaq longe.

9. Pazí lúnlvm dvpat shvraqnøt mèzangni, paqzí lawe rvtø taq røtvm vsvng tiqgø dø vlràe wae.

10. Nà shvnvng gùr gùr vsvngrìí nà lvpat jòr nø ongwe rvtø dvgùng shvring lvm mvwáshì we ínìgø krvtcøm we rvtø taq zelshìlvm dvpat ècalonge.

11. Vsvng vrvm svng mènà lømshìni. Nànvng vzøm we vsvngrì gø vrvm taq vneí mvyángshìwe shvm tiqka vlsháòe.

12. Àngdè mvdàm taq vléshì ralong svng vroqā lúnlvm dèzaqshì. 13. Pø gvmsùngrì nvng singnø vsvngrì mvdàm kám yùlwe nøt mèzangni

14. Vsvngrì nvng vzøm vzap we bvnlì tiqkvt kvt vtiqshì lúnwe nøtgø vlrà longe.

15. Mvbøn daqwe tvrà svng mèdèdam ni, wedø dvdam nøtcaq nøtí tiqni taq àngdè svng mvhøt lvm bøn dvzvŕ sháòe.

16. Shóngnøt wawe taq vgo mvrcì nvng dvdamwe rvwvlnøtrì ègvlò. 17. Dvsháza nøt ègvlshì we yángkèní dvpø zìpè lúnlvm shvrúng nøt mèzangni.

18. Vsvng gø vrvm svng shóngnøt zí mèlún:ò we ínìgø mvwámnøt svng mvwáshìlvm dèzaqshì.

19. Dvsháza shóngnøt lún màpø we ínìnø we yáng svng nøt mècaq shìni. 20. Mvbøn wàlòng svngwa nøt taq èzáng shìwe ínìnø bønlvm tvràrì gø vmvngvmwe bøngsháòe.

21. Kàshøn shvlawe vsvng tiqgø bønlún lvm mvdàm vsvngkaq shvladø táā lúnwe vsvng bøn lvm vchyak longe.

22. Nàò shønkà mvdàm vsvng shøn kà svng téwa táā lúnlvm dèzaqshì.

23. Vsvng kaq vwánā mèlúnò nìgø dánglún dángtenø dèbv:ngò tiqpvn pvn svng nø lushì vdu radøni vrá vwánā shálvm gø vchyak longe.

24. Náng shvla werì svng náng nàshøp shì. Vtì tiqgáò dvpønø tìgwit péwe rvtø taq sháshì wedøni gvmsùng tiqlvpò dvpø svnggø gvmsùng vdè wurtaq mvvl rawe rvtø taq wa sháshì longe.

25. Mvsíng sháshì we tvrà svng la síngshávtnò dø mèwáshìni. Mèsháò lòng svng èrøtnò.

26. Tiqni rvtø vdòng lèga røwe rvtø svng gø chvk wa mvsatshì nø ègvlò. Lègarøwe nø vgo mvrcì svng shiqshàn tvrà zíā lúnwe íe.

27. Tiqdá vsvngrì kaq kadø íwe vsvngrì íe wa dvløt we mvdàm àngdè nø kadø íwe vsvng íe walòng svng dvtøp shì ràe.

28. Vsvngí vzel shìwe mvwáshì rvtø shvla dø bønlún lvm dèzaqshì. 29. Rvtø vmø ke oqà wá shá ràwe mvtaq mvrà vchángshì lúnlvm gø dègø shì.

30. Vsvngrìí vzelshì ralòng svng vto lúnlvm dèzaqshì. Jòr nø ongwe vsngrì nø vsvngrìí vzelshì we svng kámshì lúnò nø we jór nvngòn taqkèní dvzaq dvkángshì we íe.