Vsàng tiqgøò lvpvt taq mvdøng vl ràwe rømnang

Vsàng tiqgøò lvpvt taq mvdøng vl ràwe rømnang

Rømnang rìnvng èdi we tvrà nø mvdónge wanø shønwe kà vlwe dø tiq dvchá rømnvng àngshvr ramshì lún nò we nø jèjú gvmpaq tiqlòng gøíe wae. Nøngmaq gøvràm nø rømnvng àngshvŕ rì nvng vrám shìlám gø shóngsha:ì we wa íe. Ínìgø dèni pvttaq kagø nø vdè dvpvt rømnvng shvlá ínø kagønø mvshvla wanø shálún lám yak weíe. Rømnvng wa lòng svng gø svre dvké we pvn dø vyáshì ràwe gø vhøm:ìe. Ínìnø kadøíwe vsvng nø rømnvng vjøngíe má? Wedø íwe rømnvng vdè lvpvt taq kadvng gø vl pøì má? American lèga vrø svra Todd Rath í vsvng tiqgøò lvpvt taq mvdøng mvdaq vl vdu we rømnvng 7 pvn wanø yadø vru yàngà. 1. Shvngøt shú svra nvng vpóng we rømnvng Àngí nø nàí dèdam mòrì sàng síng shálún lám dang shvngøtnø dèbang:a weí nà dvpvt svra tiqpè dø íwe rømnvng íe. We dø íwe rømnvng rìnø nàò svra vjøng tiqpè nø mø:í ínì gø àngmaq taq nà mvdàm mvme dang kømzøp nø paqzí zílúnò we íe. We dø íwe røm nvng nø nàò lvpvt svng tubùm lúnò we ínø cvnshì lvm mvdøng vl vdu we rømnvng íe. 2. Dvbang shì sháò we rømnvng Shølshú tiqgø dø nà dvpvt wáshìnø nà svng shvring we rømnvng ídángí tasvng dvbang shì sháò we rømnvng íe. Vdèò lvpvt taq rømnvng rì taq kèní dvbang nø shvring we nø gvzà vchyak we íe. Nàí dvshá mvhøt lvm vhøm daqò rvtø taq dvshá zashì we nønt:í dvbangshì nø nàò nønt mvsøn nvngòn zíshú gø íe. 3. Dvzà dø wáshì we rømnvng Nàtaq jór nvngòn vl nø dvpù we rvtø taq nàshvnvngø mvl we ínìgø nønt ròl, nønt dvshà lvm vhømshì we rvtø taq nà yángsvng tuqranø vløm ràí nø nønt dvshá dvpan we røm nvng íe. 4. Nvngòn zíshú rømnvng Rømnvng shvlá rìí nø vdè nvng nønt laqyà vpóng we dvgá rømnvng rìnvng vzøm dvzvŕ nø nà nønt mvgøl long dvgvp àngmaq shvng shønshì shvla nø táà dángí nønt byo dvzvŕ we rømnvng íe. 5. Dvshá dvzit we rømnvng Nàí dèdamò rìsàng téwa síng shá lámdang taq tupùm shì we rømnvng ínø àng maq taq kèní vháng lúnlvm paqzí, vsvng nvng vzømvzap we tvrà rì téwa cvnshì lúnò we rømnvngrì íe. 6. Tvrà shøl shú rømnvng Nàò nønt mvsøn rìsvng síng sháò nø nà dvpvt shølshú tiqgø dø wáshì dáng:í bøn vdu we paqzí rì zìra we rømnvng íe. 7. Ka dvgvp gø vrám shì we rømnvng Shvla we màshvla we pvn vram àngmaq taq kèní vzàng tálún shálún shì nø rvtø vràm àngmaq nø nàò shvnvng taq vl weí vløm shìra gø íe. Kadøí we rvtø taq íni gø vráshìnø vzøm weí vná mvlúnshì we rømnvng shvlá vjøng rì gøíe. Shóngshøng we zìlàngré rømnvngrìò lvpvt taq gø mvdàm kaq shønbøng:a we rømnvng pvn kadángte vl bøì ma? Mvdàm kaq shønbøng:a we rømnvng 7 pvn ladáng vl nìnø vbø shvring nø shóngshì rà wesvng shøn mvyøng:e . Shangbe sàng oqà.