Vsv̀ng mv̀ngpòng mvdòrì vdòng kèní shòlaqré

Vsv̀ng mv̀ngpòng mvdòrì vdòng kèní shòlaqré

Vsv̀ng tiqgǿ lvpat cúnshìnø̀ vháng vlúnlv́m, tìn gvyaqshì nø̀ kratcǿm lv́m tvràrì shvngbe sv̀ng nøt mvsø̀n kù:ngà í tøn zán lv́m wawe nø we vdè shvnvng taq vlwe vsv̀ng mv̀ngpòng mvdòrì taqgø cv̀n longwe íe.

Shòlaqrérì mvlúnka ò nøt mvsø̀n vdòng taq ngà tiqgóng taqkèní wa ngà vdè ò bvnchvtrì sv̀ng pvran lú:nòe, ngà vdè tiqgǿ wa ngà ò koqkám ǿngàe wanø̀ kámnøt zángshì longe. Chvpdvp taqgø vdè tiqgǿ íwa wedø íwe bvnchvtrì sv̀ng pvran lúnlv́m necǿngniq dvzaq shàì we taq ni tvrà vmvmvm we gø bǿn sháòe. Vdè shvnvng gùr gùr taq vdèò dang shvladø shǿn vchà:ngò we vsv̀ngrì vl longwe dø, mà shvla we dang taqkèní yitkewe vsv̀ngrì gø gvzà vllonge.wedø íwe dvhø̀ taq vdèò nøt kù:ngà mvngàng we la ínìnø we tvrà taqni kratcǿm sháòwe gø íe.

Wedø íwe nø chvpdvp lvpat taq we vsv̀ngrì í vdè sv̀ng rvmø we ínø vdè tiqgø kadangshì dvzaqshì we ínìgø we tvrà taqni vløpvm we vsv̀ngrì gvzà vlwe dang sv̀ng síng shálv́m shvdǿm nø̀ nònggwòn ziwe íe.

Vsv̀ngrì tiqmaq nø jv̀mna nv̀ng vbónge. Vdè nø kadø íwe vsv̀ng ǿnge walòng sv̀ng síngshá shì lúnlv́m dvpat nø dvgá vsv̀ngrì í vdè sv̀ng kadø dvdutwe nv̀ng kadø èyv̀ng longwe dangrì kèní síngshá lúnshì wegø íe. Vsv̀ng tiqgǿ ò lvpat cúnshì lúnlv́m dvpat nø vdè kaq tubùmā we vsv̀ng mv̀ngpòng mvdò rì nø mvdø̀ng vlrà longwe gø íe. Vdè tiqgóng sv̀ng vtoā we kám vlǿmvm we vsv̀ng mv̀ngpòng mvdòrì dvhø̀ taq vdè tiqgóng sv̀ng gø vdè kám vlǿmshì lúnwe íe. Wekvt wa vdè ò dvpǿ sv̀ng síngshá shìnø̀ lvjøm vl, vpǿdø síngshá shì lúnwe gø íe. Nøngmaq shvngbe nø vsv̀ngrì nv̀ng vtoq vtip, vzø̀m vzvpnø vsv̀ng mv̀ngpòngrì dvhø̀ taq lvpat cúnshì ràwe sv̀ng síngshà nø vdu vbóng dø vl lún ràwe gø íe.

Vsv̀ng mv̀ngpòngrì dvhø̀ kèní vtang sv̀ng vl lv́m wawe nø vsv̀ng tiqgǿ taq kadøgø mvbǿndaq longwe íe. We tvrà sv̀ng chvpdvp kadø wa shvlá vtang vdu vbóng dø vzø̀m vzvp lúnlv́m wawe tvrà sv̀ng mv̀ng tongshì lún ràwe gø íe.

Vsv̀ngrì tiqmaq taq vdè nø kagǿ ǿnge walòng sv̀ng mashì we vsv̀ngrì gø vl-longwe íe. Wedø bø̀nwe nø vdè kagǿ ǿnge walòng sv̀ng vsv̀ngrì taqkèní vdè kaqsv̀ng mvshóng wámshì longwe sv̀ng svre nøt í vdè kagǿ íwe tvrà sv̀ng mashì bǿnsháò wegø íe. Welòng nø vsv̀ngrì nv̀ng vzø̀m vzvpwe tvrà taq mashì weí pàdang taq gø svre nøt í wam kéò we bǿnshá shìwe gø íe. We svrenøt taqkèní vsv̀ng tiqgǿ nø shvng shvng wa mø:í vmnø̀ mòngzø̀l we tvrà, døngmvnwe shóngnøt tvrà rì taq cv́n mvlúnò nø̀ lvpat taq jór nònggwòn rì taqgø vnǿn dvzv́r sháò we íe.

Vdè ò dvdamnøtrì, lvpat taq vtoshìwe tvràrì, kámnøt tvràrì sv̀ng shvng shvng wa dvtanshìnø̀ vsv̀ngrì nv̀ng vzø̀m vzvpwe lúnràwe gø íe. Vdè tiqgóng sv̀ng shóngshì nø vpǿshì we døni tiqdá vsv̀ngrì kaq gø vpǿ nø̀ shóngshì we nøt laqyà wáshì, dvtanshì we í vsv̀ng mv̀ngpòngrì dvhø̀ taq cúnshì lúnwe nø̀ we vsv̀ng mv̀ngpòng mvdò svnggø shvnvp we tvrà tiqlòng íwe sv̀ng shvdǿmnø̀ nònggwòn ziwe dvtit tvle shv̀ngkà yayv́ng nvr:ngòe.