Vsv̀ng tiqgǿ vrv̀m taq vl vdu we dangrì

Vsv̀ng tiqgǿ vrv̀m taq vl vdu we dangrì

Vsv̀ngrì tiqgǿ nv̀ng tiqgǿ vzø̀m vzvp vtoq vtiqwe tvrà wawe nø tvsv̀ng kámvm kewe tvrà vdòng taq wani cv̀nlongwe íe. Weratnø̀ tiqdá vsv̀ng kaq vpǿ shvringwe laqyà rìnvng, nøttǿng nøtdøngwe laqyà shvlárì taqkèní vtoqshì ràwe gø íe.

Vsv̀ngrì taqkèní kámvme wawe nø welòng tiqkvtcè vcvtvmwe ínìnø tiqkvt vrá vrang lúnlv́m wawe nø vtang kèní rvzaqwegø íe. Rv̀mnvng rv̀mchangrì kaqsv̀ng mvkang vyá wawe, kà svdiq mvdøngwe tvràrì wáshì wenø vtangshaqni màshvla we bv̀nlì tiqlòng gø ni íe.

Welòng nø rv̀mnvng kaqsv̀ng mvhøt dvzv́rwe tvrà tiqlòng ni íe. Weratnø vdè góng vdè gø vpǿ shvringshìnø shóngshì ràwe mvtaq vdè lvpat tvrà kaqsv̀nggø shvlawe dang kèní yv́:ngsháshì lv́m shvdǿmnø̀ nònggwòn ziwe íe.

Vsv̀ng lvpat wawe taq gǿ vrv̀mí yakwe shìwvtrì nø vhǿ:mshì wewa ílonge. Werat vdè lvpat tvrà taq nøt dvbum, nøt dvshá mvrà we íe. Vdèò lvpat tvnù manggá sv̀ng vháng vtangwe zìdangku gv́lshìnø dvdamshì ràwe gø íe.

Vdèò lvpat tvnù manggárì sv̀ng dvdamshàì nø̀ dvzaqshì lv́mnø vsv̀ng tiqgǿ ò lvpat tvrà ni ílonge. Vsv̀ngrì kaqwa vlǿmshì we tvràrì wa wáshì lv́mgø mǿ:í. Vsv̀ngrì kaqwa vlǿmshì wenø vdèí nàlǿ:mámò dø mvbøn longwe dvgvp vdè wani zá vtøp shì sháò we íe. Wedøni tiqdá vsv̀ngrì kaqsv̀ng gø shøngranrì vwadø zígø mvdaqlong. Wedø èzíbǿò wedø mvbøn long dvgvp we rv̀mnvngrì nø vdèò pin vpo sháò wegø íe.

Vdè lvpat taq mòngzø̀l dø byo byocè cúnshì lv́m gvzà vchak we íe. Vdè lvpat sv̀ng shóngshì weí vdè lvpat tvrà taqgø kapà sv̀ng wá dvzaqshì lv́m wawe tvrà sv̀ng vdè taqkèní rvcvngshì ràwe íe.

Mònggv̀n taq gvzà bø̀ngshv̀ngwe mvhaq dvmaq Gandi nø India móngdàn kèní wángzà móngsv̀ng diwe zaqlè tvrà tiqlòng taq vpǿpv̀n shé, jà, gv̀msùng dvrèrì nv:mò we sing tiqshvrà shvnvng kèní dí vdu we rvtø taq we sing àngkàng rìí nø àng sv̀ng Gandi íwe shábǿà werat sing vdòng sv̀ng go ònø̀ we àngmaqò sing dvrèrì ò dvpǿrì sv̀ng vtànā òweí Gandi àng shongwe dvrè vlwe ínìnø gømpaq zílv́m íwe dang vtàn òe wae.

Wekvt Gandi shø̀n wenø “gvzà oqà íe, dvrè yarì nø ngà dvpat zǿm mvdàng we ínìgø ngà dvbù:nge. Ngà lvpat taq yadø vpǿ vtang we zaqshøprì màdá shaq ínìgø ngà cúnshì lún ngòe walòng sv̀ng ngàí síngshá lún bǿ:ngàrat ngà dvbù:nge” wanø vtànòe. Wedøni vdè tiq lvpat tvrà taq mv-vl nìgø daqwe dvrèrì sv̀ng lá dvzaq shàì nø vpǿ vtangwe vdèò lvpat rvtø̀rì sv̀ng vwadø mà dvzø lv́m shvdǿmwe íe.

Lvpat taq vsv̀ngrì mvdàm dvsháza shóngnøt gv́lshì lv́m wawe nø vsv̀ng tiqgǿò lvpat taq rí ràwe døngjá tiqlòng gø ílonge. Vdè tiqgǿ taq mùngwe nøt mvsø̀n gv́lshì we taqkèní vdè shvnvng gùr gùr taqgø shvlawe rv̀mnv̀ngrì í vdè kaqsv̀ng vsùng rawe íe.

Vdè yv́ngkèní dvsháza shóngnøt gv́lshì wenø shvla we lvpat ò àngshí àngwvtrì ni ílonge. Tiqkvt kvt vdè zǿmshì we tvrà rì mashvla we tvrà íe wa síngshá shì long dvgvp welòng sv̀ng gùr lún ràlongwe gø íe.

Vsv̀ng lvpat taq vko vkáng wawe nø 2 kvt mvlúnshì wawe shaqré kà gø vlwe íe. Wedø vko vkángrì tuqlong dvgvp shvláwa rvcvngshì nø vtoshì shálv́m gø gvzà vchvk we íe. Lvpat taq rvtø̀ shvlá tuqlongwe sv̀ng wagø ca mvdaqwe íe. Wá vdu we nv̀ng wárà we bv̀nlì rì sv̀ng wá dvzaqshì lv́m gø gvzà vchvk we íe.

Dvdam shø̀ngran tvrà taqwa rvtø̀ shvle nø calv́m tvle nø chvpdvp bv̀nlì nv̀ng èwàò nø dvzaqshì we nø we tvnù manggá sv̀ng cvn cvn tuqlún lv́m ílonge.