Vsv̀ngrì gǿ vrv̀m taq mvkø̀m mvzøpwe tvrà vdòng kadø wa cúnshì ràwe

Vsv̀ngrì gǿ vrv̀m taq mvkø̀m mvzøpwe tvrà vdòng kadø wa cúnshì ràwe
Vsv̀ngrì gǿ vrv̀m taq mvkø̀m mvzøpwe tvrà vdòng kadø wa cúnshì rà emá? Nøngmaq tiqgǿ vrv̀m nø lvpat
tvrà taq rø mvtǿmshì we shvrúng nøt kèní cúnshàì e.
Pǿ, gv̀msùngrì, zaqlè tvrà dí mvyǿwe, shvrúngwe dvrè rì wanshì mvyǿ we, bv̀nlì rì taq rvtø̀ zíshì mvyǿ we,
vdèò shóngshì we vsv̀ngrì dvpvt rvtø̀ zíshì mvyǿ we rì taqkèní vkǿnwe íe. Tiqgǿ nvng tiqgǿ taq màbóng
we tvrà rì, nøt mvsø̀n rì vl longe. Vdèò cúnshì we lvpat taq mòngzøl nø byo lv́m kømzøp we tvrà svng rà
vchvk nø shvrúngì wewa ílonge.
Wedø nøngmaq taq vdè taq mv-vl, mvlúnì we dangrì mvdàm svng nøt vyuqì nø̀ vdè taq vlwe dvrèrì
mvdàm vná sháìe. Vdè nøt lvpat tvnù manggá, dvdam nøt rì nø laqni vpǿ longe. Welòng svng tuqlún, jór
lúnlv́m dvpvt nø vdè ò bv̀nlì døngjá tiqlong ni íe.
Wervtnø̀ mvkø̀mzøpwe lvpat taq kadøwa cúnshì lv́m íemá? Vdèò lvpat tvnù manggá svng tuqlún lv́m
dvpvt nø kadø nøt shvlǿm shìrà longe wawe taq tiqdá vsv̀ngrì byo byo cè vl lún we lvpat rì svng yv̀ngnø̀
vdè ò nøt mvsø̀n, shaqcv̀m we mvwá shìlv́m vchvk longe. Pàwálv́m wani vdè í èyv̀ngò we dangrì shvngbe
nø jòwe tvrà wanø mǿí long.
Dèni bat Social media mvdàm rì taq vsv̀ngrì taqkèní tiqdá vsv̀ngrì la me radø dvtan we tvrà rì gvzà
yv́nglún shìe. Ínìgø we tvrà rì ò mèpvng lvp taq kadø íwe mvhøt lv́m shìwvt rì svng nø àngmaq taqkèní
mashì we wa íe.
Vdè taqkèní àngmaq nø gàm shvla we vsvngrì wanø dvdam shì sháìe. Ínì gø vsv̀ng gǿ vrv̀m wawe nø
lvpat tvrà taq dvzaq dvkángshì ràwe vsv̀ngrì wani íe. Vsv̀ngrì kagǿ taq ínìgø kø̀mzøpe wawe mv-vl long.
Wervtnø̀ vdè taq vlwe, vtoshì èlúnò we dangrì, dvrè rì mvdàm nøt shø̀mnø̀ oqà wáshá rà we gø íe.
Welòng nø vdè lvpat ò ìshøt tiqlòng ni íe. Vdè lvpat tvrà ò shìwvt rì svng vzingshì nø mvrà shvri shìlv́m
tvle vdè ò lvpat tvrà svng shvla we lvp kèní dvdam dvtøp shì ràwe gø íe.
Vdè ò lvpat tvrà nø yv̀nggùng ni íe, dvtut cúnshì lv́m tvrà rì vle wawe dvdam nøt vdòng vdè ò vzànglvp
taq kadø íwe vko vkángrì tuq longwe, kadvngshì lvpat taq vháng vlún lv́m tvrà rì vl longwe tvrà rì svng
dvdam shì lv́m gø vchvk we íe.
Ni vrv̀m ò lvpat rvtø̀ rì taq ya rvtø̀ nø ngà taqkèní dvzaqshì lv́m làngdø̀m rvtø̀ ni íe wawe dvdam nøt kèní
cúnshì lv́m dvpat shagóng shiqshàn tvrà svng gø svdi vyá shì nø cúnshì ràwe íe. Shagóng shiqshàn tvrà
mv-vl we vsvng tiqgǿ dvpvt nø lvpat rvtø̀ rì nø cǿm vnǿn lv́m tvrà wani ílonge.
Yadang rì svng dvdam dvtøp shì nø vdè ò lvpat tvrà nø tiqdá vsv̀ngrì nvng shvbóng shìlv́m tvrà mv-vl
wawe nvng vdè taq vdèò chø̀m dø̀ngku lvpat vle, rvmnvng rv̀mchvngrì, àngnvm àngchvngrì vle lvpat taq
kømzøpme wanø kùngà lushì shálv́m vchvk we íe.
Vdèò cúnshì we lvpat yv̀nggùng taq vdè ò tiqchø̀m vsv̀ngrì, rv̀mnvng rv̀mchvngrì nvng byo byo cè v́l
lúnòe wanø nøt dvshǿm shì ràe. Wervt nø vdèò lvpat tvrà rvtø̀ vrv̀m svng vpǿ shvring shìnø̀ lvpat tvrà
svng byo byo cè vl lv́m shvdǿm nø̀ nònggwòn ziwe íe.