Vsvng mvldàng taq vdèò vchàng laqyàò dvpø

Vsvng mvldàng taq vdèò vchàng laqyàò dvpø

Vdèò vchàng laqyà dvpø wawe taq kèní èshønwe kà, dèdamòwe rì, evl we nøt laqyàrì svng vlíng vposhì sháò e íe. Vsvng tiqgø svng cvm lvpat taq kèní jang laqyàò dvpø wawe svng shvngøt dvtú we mvl we ínìnø àngò lvpat taq kalòngnø jòe, shutshìe walòng svng mvshálúngò.

Zùng shìni mvlòng dvgvp nø àngpè àngmè maqtaq kèní cvnshìwe ínø zùnglòng radvgvp írani zùngrìtaq vdèò jang laqyàrì kadøwa shvladø gvlshì ràwe svng cvnàwe íe. Cvmré tiqgø taq àngò jàng laqyà dvpø svng síngshá lúngò kat àngò lvpat svng vhánglún lvm kadø wa dvzaq shì ràlòngsvng síngsháò we íe.

Cvmré lvpat taq kèní tiqni mvdàm tiqni telungwe rvtø vsvng nvng kadøwa vtoq vtip lvm wawe svng shvlawe dang taq kèní dvdamònø síngsháòwe íe. Dvzáng vru svra aung theiní vruò we zìlàngrérìò mvzøng dømrø karu taq yadø wae... Làngré tiqgø taqkèní vdèí síngsháòwe dangtaq wa zømshìwe nø nøtsun we dang taq vnønwe íe wae.

Làngré èídángí gvzà ídømshìwe gø síngrál nøt cvmwe íe. Làngré tiqgø ídángí dvsháza shóngnøt mvlwe tiqgø nø nøt mvkøm zupwe bønsháò we íe. Làngré tiqgø íwe taq ngànø gàmmàshvlang wanø vzingshìnø vbønshì we nø nøtcvmwe ívnøn we svng bønsháòe. Làngré tiqgø eídángí dang vrvm taq vwa laqcha wawe nøt taq wa cúnshìwe íninø dvzaq dvkángshì nøt mv-vl we bønsháòe.

Gvzù nø àngò vgo vdòng taq gomv'lsì mvzangwe ínìhø àngvl lvm dòng dushì sháòe. Go mvlsì vlì we vsvngrì lvpat taq udø írat yadøírat wanø wa vzelkéì we íni gvzù mvl taqø shvraq màchaq ívme wa nø shvdømwe íe. Làngré lvpat taq krvtsøm we àngpvn pvn vhøm shìwe ínìgø tiqbaqcè krvtsømwe we taq kèní laqcha wanø envròwe ínìnø vkovkángrì shvngbe vmáng sháòwe íe. Cher màngvtshìwe kwéràng tiqgo yaq gálòng svng dvtan lvm mvl. We dø tiqdvchá vdèò tvnù mangárì dvpat dvzaq shì we mvl gø dvpat vháng lúnlvm nø mvl long.

Làngré tiqgøò lvpat taq àngdèò tvnù mangárì svng dvdam nø dvzaqshì lvm nø mvdøng vchyak we íe. Dvzaq dvkángshìwe làngré tigø taqkèní vdèò lvpat svng vháng dø vlíng vpolúòwe mvtaq tiqdá vsvngò lvpat svng gø tùbum lúnòwe íe. Dvsházawe nøt gvlshì we nø vdégóng vdèídømshìwe nøtsvng shvyúm lúnòwe ínø tiqdá vsvngrì kaq vjúziwe gøíe.

Shing mùngwe naqwe nø vsvng tiqgøò laqyà dvpø mø:í. Kadángte dvzaqshì nøt vlwe mvl wawe lòng wa laqyà dvpø svng shønlúnshìe wanø yalòng dvzáng taq kèní nvngòn zinø shvdømwe íe.