Vsvng nvng vtoq vtip we

Vsvng nvng vtoq vtip we

Vsvngrì nvng vtoq vtip we walòn nø mònggvn vsvngrì dvhø taq gvzà vchyak we tiqlòng ni íe. Vsvng tiqmaq taq yalòng nø gvzà mà chyvk we íe wanø shøn sháò we ínìgø vsvngrì nvng vtoq vtip we dang shvla we tiqgø dvpat karvgaq ètuqvm nø kadø íwe vsvngrì nvng vhømvm we ínìgø àngmaq dvpat yvklvm shìwvtrì mv-vl long.

kadø íe wani àngmaq nø vsvngrì nvng vtoq vtip we dang taq shvla we mvtaq vdu vbóng dø vzømwe dang taq wálúnò rì írat íe. Kagø taq ínìgø wedø vsvngrì nvng vtoq vtip we dang shvla we tiqgø nvngnø vzøm lvm shóngshì wewa íe. Wedø vsvngrì nvng vtoq vtip we dang taq nvngòn yúmwe vsvng tiqgø taq rvmnvng rvmchangrì gø yúmwe svnggø yánglún shìe.

We mvdàm jàng laqyà, dòngnøt mvsøn dvgoq we vsvng tiqgø svng íra nìnø vsvngí mvshóngshì nø mvwám shìwe vhømshì longe. Wedø íratnø vsvng nvng vtoq vtip we dangrì taq gø jàng laqyà, dòngnøt mvsøn shèr lvm gø gvzà vchyake. Vsvng wawe nø tiqgø wa vl màshvla vsvngrì nvng vtoq vtip vzøm nø vlràwe íratnø àngdè nvng vtoq vtip we gùr gùr shvnvng vsvngrì nvng vdu vbóng dø wáshì ràwe íe.

Vsvngrì taq tiqgø nvng tiqgø nø màbóng we ínø àngdè shvnvng gùr gùr taq vlwe vsvngrì nvng shvla dø vrvm vránø vzøm lúnlvm mvdøng vchyak we svng shøn mvyø we íe. Téwa làngré lvpat taq wedø íwe nøt mvsøn laqyàrì gvlshì ràwe íe. Àngdè èvl we gùr gùr vsvngrì mvtaq vsvng màngpòng rìdvhø dvhø vdu vbóng dø vtoq vtip we mvwá shì vsvng tiqgø taq kadø gø àngdè lvpat svng vháng dø wáshì mvlún lúng:ò.

Vsvng nvng shvladø vtoq vtip we nø bvnlì tiqpvn pvn èwa we dvpat ínìgø bvnlì lawe dvpat ínì gø shvla we lvp kèní tubùm dvbangā lún we íe. Kamóng karvgaq èvl we ínìgø yadangrì svng cvndøng lvm nø mvdøng vchyak we íe. We dø vsvngrì tiqgø nvng tiqgø taq vl we màbông we nøt mvsønrì laqyàrì svng gø vtoā lún lvm svng gø síng shá dvzár we íe.

Màbóng we vsvngrì tiqgø nvng tiqgø tasvng jàng laqyà dòngnøt mvsønrì vtoā lún Kewe taqkèní wa tasvng vrám vrá we vzøm tvrà svng lúnshì lvm ílonge. Wedø mø:í nìnø tvsvng màrám we vzi vrùng walvm svng bøn dvzvŕ lúngòe. Wedø íratnø làngré lvpat taq vsvngrì nvng vtoq vtip we, vzøm vzap we tvrà rìtaq àngdè tiqgø vjú dvpat wa dvdam shìwe mø:í dø tiqdá vsvng dvpat téwa dvdamā we taqkèní vzøm vzap lúnlvm nø téwa shvla we lvpsvng vpo dvzvŕ we svng shvdøm we íe.

Tiqdá vsvng kaq vpø shì sháràwe nvng màbóng we laqyàrì svng síngsháā kélvm nvng yáng shálvm ràlonge. Wedø ínø wa shvla we vzøm vzap tvrà taq shvla we rvmnvng rvmchangrì luqlún lvm ílonge. Téwa làngrérì lvpat nø àngdèò mèpvng lvpat svng shvnvp nø vrang shàì we írat nø yadø vsvngrì nvng vtoq vtip we vzøm vzap we tvrà nø nvmlat dvtàng taq vchyak we lvpat tvrà mvpvng tiqlòng ni íwe svng shøn shvdøm we dvtit tvle svngkà yayáng naròe.