Vsvng tiqgøò lvpat taq rvsvngshì ràwe tvrà

Vsvng lvpat tiq lòng wawe nø cvmré lvpat taq kèní svrøngnø shaqdatvmwe ni høq shaq cvm vtangwe bvnlì taq kèní àngdè lvpat nvng singwe bvnlì rìhøqshaq nivrvm rvsvng shì ràì we íe. Àngdè taq kèní rvsvng shàìwe bvnlìrì taq cvn nø shvla we màshvlawe wa nø vjúrì vtoshì lúnì we íe. Wedø íwe taq cvm vtangwe bvnlìrì taq kèní àngdè lvpat nvng singwe bvnlì gvbarì høq shaq dang vrvm taq màléshì dø dvdamshìnø rvsvng lvm vchyak we íe. Làngrérì taq àngdèò lvpat tvràrì taqø paqzí dang nvng bvnlìrì rvsvng shìrà we dangrì nvng sing nø tvtit tvle lvm íe. Paqzí cvnshì we làngrérì taq 10 dán éaongvm dvgvp vhángwe paqzírì dvtut cvnshì lvm àngdè nvng vdu we zùngrì rvsvngshì ràwe íe. Wedø tiq dvchá bvnlì wawe dang taqø gø àngdè shagóng dvkømshì lvm dvpat bvnlì mø:íni àngdè shøngshì nø nøt lúmwe bvnlìrì dvhø shvláwa dvdamnø rvsvngshì ra weíe. Vránø àngdèò vsak bat 30 lvp svng ètuqra dvgvp àngdèò døngku tvràrì nvng àngsø àngsèrì dvpat dvdam shìnø dvzaq shì ràwe íe. Àngdèò àngsø àngcèrì lvpat dvhángã lúnlvm nø pø gvmsùngrì taq kèní tùbumshìwe taq kèní wa gø mvkømzøp we íe. Àngmaqcèrìò lvpat yànggùng shvlá lún lvm dvpat shvngøt vjøn we ígø tùbumshì lvm gvzà vchyake. Wedø írat nø làngré lvpat taq rvtø vl we rvtø taq àngdè cvnwe dang bvnlì rìsvng shvla wa dvdamnø àngdè nvng vdu vbóng we dang bvnlìrì rvsvng shìlún lvmnø gvzà vchyak we íe. Vránø àngdèò bvnlìrì rvsvngshì nø ewa lúngòwe rvtø taq shìwvt àngpvn pvn vhøm shìlvm wa ílònge we rvtø taq àngdèí rèsvngò nø èwàòwe bvnlì welòng nø nà shóngshìnø èwa we íe má wawe taq cvnø bvnchvtrì mvngvn lún we dang taq gø màbón glòng we svng yánglún shìe. Nàí èwàò we bvnlì welòngnø nàshóngshì nø rèsvngò we í dèzaq shìwe ínìnø tuqrawe shìwvt àngpvn pvn nø nàtaq kèní yùl yùlcè mvngàn èlún lúngòe. Mø:íni nàò bvnlì welòng taq mèshóngshìnø dèzømshìwe ínìnø tuqrawe bvnchvtrì taq nøt dvshà nø nøt vtang lvmrì wa bung lòng we íe. Àngdè mvshóngshìwe bvnlì taq dèzømshìwe ínìnø pøgvmsung èlúnòwe ínìgø vhømshì rawe bvnlì bvnchvtrì svng shvngvn lún lvm dang vnøn longnø rvtø naq rakat vháng vdu dángte vháng mvlúnø cøm vnøn we lvpsvng vyuq sháò we íe. Wedø íratnø àngdè dvzøm dvzaqshì rawe paqzí dang bvnlì dang àngpvn pvn taq àngdè jøng jøng ni shóngshìnø nøt lúm lúm bvnlì rìtaq shvrúng nøt kèní rvsvngshì nø dvzaq shàì katwa jøng jøngni jòrnø vháng lúnshì we íe wanø dvtit tvle shìwe shvngkà yayáng naròe.