Yup mvlúnshì we pàwálvm bøne má?

Yup mvlúnshì we pàwálvm bøne má?

Làngrérì taq yaqdøng yøprvtø vléhøq gárnø màyøp yøp rvtø shvleò we vsvngrì gvzà yánglún shìe. Yalòng nø pàrat íe má?

Kadø íwe tvràrì nø vsvng tiqgø kaq yøp mvlúnshì we bøn dvzvŕ emá? Dènila làngrérì taq dvdamshì lvm tvrà vle. Yadangrì svng cvn dvtøpnø cúnshì wegø nøt mvsøn shagóng shiqshàn lvm tvrà tiqlòng íwe rat vsvng tiqgø dvpat vchyak we íe.

Vsvng tiqgø ò lvpat cúnshì we svng èyàngvtnò dvgvp yaqdøng yøprvtø vléhøq gárnø màyøp yøp rvtø shvle lvmnø yùl yùlcèwa ílonge. Téwa làngré lvpat taq rvmnvng rvmchangrì nvng vwúshì, vhaqshì weí rvtø dvbéò we svng yánglún shìlonge.

Tiqmaq taq íni bvnlìrì gvzà chvtnø rvtø í mvluqpøn kéò we ratnøgø bøn sháòe.

Wedø íwe dvhø yanila làngrérì taq yøp mvlúnò we nø phone ratnø gø mvlúng ka taq yøp rvtø shvle ò we svng yánglún shìe. Yøprá taq phone langnø wa vlwe rat yøp rvtø shvle ò we, yøp mvbáwe shìwvtrì vhømò we svng yánglún shìe. Yadø íwe bvnchvtrì taqkèní lutshì lún lvm dvpat kadø wáshì vdue má?
 
Vsvng tiqgø taq yøp káhøq yøplvm nø gvzàni vchyak we íe. Yøp mvkáwe vsvng tiqgø ò bvnlì dvtí svng èyàngvtnò dvgvp kùngà vnøn we svng yánglún shì longe. Wedø bvnchvtrì mvbøn lvm dvpat ratnø nø àngdè tiqgøò rvtørì svng shvladø pvranshì lúnlvm vchyak we íe. Àngdè tiqgøò rvtø zíshìlvm vchyak we tvràrìnø kapàrì íe walòng svng dvtøp shì ràlonge.
 
Phone langwe rat yøp mvbáwe íemá? Wedø ínìnø kadø rvtø svng pvran pvjángshì vdue walòng svng síngsháshì ràlonge.

Vsvngrì tiqgø nvng tiqgø nø rvtø lushì we dang taq vsháy longe. Tiqmaq nø yaqdøng yøprvtø taq bvnlì wanø vyángí yøpwe vsvngrì vlwedø tiqmaqnø vyángø bvnlì wanø yaqdøng rvtø taq yøpwe rì vlwe íe.

Vsvng tiqgø taq yøp kánø bvnlì taq jórnvnggòn lúnlvm dvpat nø nvrshì rvtø gvlshì ràlonge. Tiqni taq wá vduwe bvnlì svng we rvtø taq dáng høq èwàò. Welòng nø nà svng nøtshøm lvm tvrà zílúnwe íratnø shømwacè yøpbyo dvzvŕ longe.

Rvtø tvyørì taq cvnnø yøplvm rvtø svng luqpøn høq èlushì.

Yøp rvtø svng mvnvmvn gvlshì lvm èwàò. Laqyà tiqlòng dø wáshì lún wenø àngdè shagóng dvpat vjú ziwe íe. Cì paqzí vdèrì taqkèní gø wedø rvtø mvn mvn yøp ràwe svng shvngøt dvtú we íe. 

Yaq vrvm yøpká høp èyøp dvrwe vsvng tiqgø dvpat nø bvnlì wawe rvtø taq gø shàn wacè wálún shìwe rat vjú zílún we íe.

Yaqdøng yøprvtø vléhøq høq màyøp yøp èvlwe vsvng tiqgø taq tiq dang dang taqnø vtøp lvm vhøm shì sháòe.

Àngdè taq yaqdøng yøprvtø taq phone langwe laqyà vlwe ínìnø àngdèò yøp rvtø vmø høq, luqpøn lvm høq welòng svng yelshì lúnlvm dvzaqshì ràwe íe.

Cì paqzí vdèrì taqkèní shvngøt dvtú we taq TV, phone dø íwe electronic svmijakrì taqkèní vsvng tiqgø kaq yøp mvlúnshì dvzvŕ sháòe wanø dvkám we íe.

Weratnø yøp káhøq yøp lúnlvm dvpat nø yaqdøng yøprvtø taq phone langwe laqyà svng yelshì ràe wanø shvngøt dvtú we dvtit tvle svngkà yayáng naròe.