Zìdang shvlá svng dìlv́m wàì

Zìdang shvlá svng dìlv́m wàì

Vsv̀ng tiqgǿò lvpat taq àng mvtú àngpv̀n pv̀n nvng manggá rì àngpv̀n pv̀n vlwe gø íe. Nøngmaq nø àngboq àngboq kratcǿmwe tvrà taq vl vduì we ínø̀, tiqkvt kvt taq jór nònggwònrì lúnì we rvtø̀rì gø wedøni vlwe íe. Jøng jøng taq kratcǿmwe ínìgø, jór nònggwòn lúnì ínìgø vdè lvpvt svng vrang shàì we nø vdè tiqgóng taqkèní wani ílonge.

Lvpat svrenøt kèní vcǿm zíshìnø̀ mèpvnglvp svng vwáng shìvmwe vsv̀ngrì nø téwa lvpat taq jór nònggwònrì nvng vsvrvm we vsvngrì ni íe. Wedøni kadø íwe lvpat shìwvtrì dvhø̀ taq ínìgø nøt màdvcv́mshì shaqí dvzaq dvkángshì we vsv̀ngrì taqnø tiqni rvtø̀ taq jór nònggwòn svng vtoshì lúnò we vsv̀ngrì gø gvzàni yv́ngshìwe gø íe.

Wedangrì svng yv̀ngvtnì dvgvp làngrérì taqgø vdèò lvpat taq wedø íwe jór nònggwònrì lúnlv́m dvpvt nø rvtø̀ màle we ínø̀ weratnø̀ vdèò lvpat tvrnù manggárì nvng tiqdø dvzaq dvkángshì shaqí vzànglvp lvpat dvpvt dvzaq dvkángshì lv́m nø rvtø̀rì shi vmøwe gø íe.

Vdè lvpat taq kadangshì lvpat tvnù manggárì tedø gv́lshì we ínìgø vdèò vzànglvp lvpat taq wá vdu we bv̀nlì dvlàrì mvdàm svre nøt gv́lshìwe ínìnø jór nònggwòn svng vtoshì lúnlv́m tvrà mv-vl long.

Vsv̀ng wawe lvpat taqnø kagǿ taq ínìgø vléshì we tvràrì wawe nø wedøni vl longwe íe. Kapv̀n taqgø màléshì dvrwe vsvng wawe nø wegø taqkèní pà tiqpv̀ncè gø mvwawe vsvng íe wanø shǿn lúnshì longe. Wewa mvtaq vdèò lvpat tvrà taq wá vduwe bv̀nlìrì sv̀ng wá svrewe tiqgǿ dvpat nø kadø gø vdèò lvpat tvnù manggárì mvdàm jórlún we vtoshì lúnlv́m mv-vl long.

Vdèò lvpat taq vlevm we rvtø̀ rì taq vdá:ngvm we rvtø̀rì sv̀ng nø we shvrà taqni gv́l ràwe gø íe. Shǿn mvyǿwe taq vle bǿìwe rvtø̀rì taq vléshì bøwe dangrì svngwa dvdamshì nø svre nøt gv́lshìwe mvwà lv́m nvng wedangrì taqkèní vdè kaqsvng vjú mvziwe dvdam nøt rìí wa vdè svng kop kewe tvrà mvwá shìlv́m shvdǿm we íe.

Vránø vdèò rv̀mnvng rv̀mjàrì kaqsv̀ng gø tubùm dvbangshì we taq wá dvzaqshì ràwe gø íe. Jøng jøngni rà vchak we tvràrì taq tubùm dvbangshì wenø vdè tiqgǿ kaqsv̀ng shvlawe nøt mvsø̀nrì vtán lúnāwe ínø̀ tiqdá vsvngrì dvpvg gø vjú zía lúnwe gø íe.

Vdè lvpat ò bv̀nlì døngjárì vrv̀m taq màpray dø wá dvzaqshì lúnlv́m gø vchak mvdø̀ng tiqlòngni íe. Vdè lvpat taq jór nònggwòn lúnlv́m wawe nø vdè tiqgǿ taqni mvdø̀ng vchak mvpv́ng íwe rat vdèò lvpat kratcǿmwe dangrì taqgø tiqdá vsv̀ng kaq mvrà shvri we wá mà shvla longwe gø íe.

Vdèí  dèda:mòwe manggárì mvdàm wá dvzaqshìwe vsv̀ngrì nø tiqni rvtø̀ taqnø we manggá sv̀ng jórlúnwe vjúrì vtoshì lún:ò wegø íe. Yadangrì shvngbe sv̀ng cv́n dvgømwe vsv̀ngrì nø vdèò lvpat taq téwa vhángwe lvpat zìdangrì sv̀ng vtoshì lúnlv́m wa ílonge.