Zìdang vlwe shølshú rìò jàng laqyàrì

Zìdang vlwe shølshú rìò jàng laqyàrì

Zìdang vhángwe shølshú rìnø jòrnø onge walòng svng manggá gvlò nø dvzaq dvkángshì we í jór nvngòn lúnò we vsvngrì ínø àngmaq taq jòre walòng svng vwadø mvlúnshì walòng, rvtø zíshì we í dvzaq dvkángshì ràwe svng síngsháò we rì íe. Kadvgvp gø àngdèò lvpat taq jórlún lvm dang taq àngdè góng àngdè dvzaq dvkángshì ràwe mvtaq tiqdá vsvng kaq gø dvbangā lúmlvm dvzaqshì ràwe íe.

1. Jòr nø ongwe shølshú rìtaq lèga røwe dang nø gvzàni vpø ring we, shánøt zitnøt rì lushì shvlá vtang jàng laqyà tiqlòng ku lángshi we íe. Wewa mvtaq vsvngrì kaq shølshú wáshì nø tvrà tóngā we dangrì taq gø téwa zitnøt zílúnò we tvrà tiqlòng gø íe.

2. Shølshú vgorì taq kadvgvp ínìgø àngdèò tvnù mangárì kaq svng kadø wa tuqlún lvm wawe tvrà svng tùngò nø vjøn shìe. Wedø tvrà tóng vjøn shaq tvrà kèní wa jòrnø ongwe lvpat zìdangrì svng vtoshì lúnò we íe.

3. Àngdèò shagóng shiqshàn lvm dang svng cvndøng we, vsvng tiqgø taq shagóng shiqshàn we mv-vl ni nø kadø íwe bvnlì rìsvng gø wá mvlúnò. Wedø ni jòr lvm dangrì taq gø vnøn dvzvŕ lúngòwe ínø àngdèò shagóng shiqshàn lvm dang taq cvndøng lvm gø gvzà vchyake we íe.

4. Dvgùng vl vsvngrì taqkèní cvnshì ràwe, dvgùng vlwe shølshú vgorì taq mvkrøm mvdøprì téwa vlwe mvtaq, àngmaq taq téwa dvtøp we dangrì taq wálún we vsvngrì gø íwe rat àngmaq yáng kèní àngdèí mvsíng shá shïwe dangrì svng cvnshì lvm gvzà vchyak we íe.

5. Tvlú dvgø shì we dang, dvgùng vlwe shølshú vgorì taq vlwe jàng laqyà rìtaq mèpvng kaq wá vdu we bvnlì rìsvng tvlú dvgøshì sháò we íe. Wedø tvlú dvgø shì we dang mvwá shìwe tiqgø taq àngdèò tvnù mangárì svng tuqlún lvm tvràrì taq vléshìwe, shìwvtrì vhømshì sháòe.

6. Àngdèò tvnù mangárì taqni cvndøng dvzaq shì we, vsvng tiqgø taq àngdèò lvpat tvnù manggárì gvlshì ràwe svng shvngbeí dømsháì we ínìgø we tvrà svng chvpdap cvndøng we taq nvngòn yúmwe svng vsvng mvlúng kataq yánglún shìe. Wedø írat àngdèò tvnù mangárì svng jórlún tuqlún lvm dvpat nø we tvrà svng chvpdap cvnlún lvm jàng laqyà wáshì, gvlshì lvm gø nvmlat dvtàng taq vchyak we íe.

7. Àngdèò bvnlì døngjárì taq vtiqshì we mv-vl dø wá dvzaqshì ràwe, vsvng tiqgøò lvpat taq svre nø vtiqshì lvm dø íwerì dang vrvm taq vhøm shì longe. Vsvngrì mvlúng Ka taq ngør nø shømløm we kùrwàngrì taq wa vl boy nø we shvrà we yáng kèní vlíng vpo shì lvm svng svre we nøt záng shàìe. Pàwálvm wani tiq shvrà kèní dvgá tiqshvrà tiqzìdang taqkèní dvgá tiq zìdang svng vlíng vpo shìlvm rat bvnchvtrì àngpvn pvn vhøm shì we rat welòng tvrà svng cvnlún lvm dvzaqshì we jàng laqyàrì wáshìlvm vtiq shàìe.

Wedø íratnø àngdè góng àngdè wedø bvnchvtrì svng vto shì nø mvngàn kámshì, gwíshì we jàng laqyàrì gvl shàì we ínìnø jøng jøngni lvpat zìdangrì jòrnø vhángwe svng vto shì lúnlvm wa íe. 8. Nøt mvsøn kùngà vl lvm mvdøng vchyak we, vsvng tiqgøò lvpat shvla dø vlíng vpo lvm nø shánøt, zitnøt rì taqkèní dvzaqshì ràwe mvtaq nøt mvsøn kùngàrì gvlshì lvm gø mvdøng vchyak we íe.

Shøn mvyø we taq àngdè lvpat taq bøn mvyø we, shvrúng we tvnù mangárì svng àngdèí dèdamò we rvtø chyak taqni tuqlún jórlún lvm nø nøt mvsøn kùngà zángshìnō dvzaq shì we taqkèní dvzaq dvkángshì we í wa jórlún we svng dvtit tvle we íe.

Aa