Zìlàngrérì nvng bvnlì

Zìlàngré rìò bvnlì mvdàmò gvlshì rà we nønt mvsøn nvng vtoshì rà we dvng nvng sìng nø dvtit tvle mvyønge. Zìlàngré rìò lvpvt taq èwàò we bvnlì dønjá vràm nø vhánge vcipme wa we mvl. Èwàò we bvnlìri nø vjú vl nø shvla we ídángí bvnlì mvdàm vbøshì shálvm wa vchyak we íe.

Zìlàngrérì tiqmaq taq bvnlì vya tenø shàng gvmsùng shvla we bvnlìrì taq wáshì lúnò we ínigø kadø nønt mvsøn taqkèní vdøshìnø wàìewalòng svng mvsháò. We døírvt gvmsùng dvpvt bvnlìrì vkat kat vcél shì we sàng yáng lúnshìe. Bvnlì shvlárì taq tøp tøp wa shvladø wáshì lúnlvm gø vchyak we ínø èwàò we bvnlìri gø mvgvm màshvla we bvnlìri møí lvm nø mvdøng vchyak we íe. Vdèí èwàò we bvnlìò mvngá sàng shárà we ínø àngdè tiqgøò dvpvt wa ímá? Mèbvngmèyà rì dvpvt høqshaq íe ma? Kadøí we dang taq dvzaq shønge walòng svng síngshá ràe.

Mvsøl tiqlòng taqlaksvmá vshømpè vle. Àngmaq vshømpè svng nàmaq lvngàí kàpà èwànønge wa røtnò kat no.1 laksvmá pèí nø laksvmá bvnlì wàvme vlòe. No.2 pèínø tiqnari taq kvmsùng 9$ lún:ò we bvnlì wàvm:e vlònø no. 3 pèí nø mòngàn taq vnvpnø té vtang íwe chøm walún lám paqzí bvnlì taq dvzaq shønge vlòe.

Shóngsøng we zìlàngrérìé mvdàm kaq tálún bøshà we mvshøl sàng yàngì dvgvp no.1 nvng no. 2 laksvmá pènínø tiqzìdang taq wa gvmsùng dvpvt bvnlì wa lòngsàng yánglúnshìe. No.3 laksvmá pè màngnø àngò bvnlì taqkèní canshìnø mèpang dvpvt høqshaq vjúvlnø zìdang vháng lúnlvm sàng dvdam shìweí dvzaq shìwe sàng yánglúnshì we íe. Mvshøl taq yánglúnì døtiq dvchyá bvnlì wawe taq àngdèò tiqlangò vjú dvpvt wa waì we møí dø èwaò we bvnlìrì svng vbøsháìnø vdè shóngshì we bvnlìri taq dvzaq shìlvm nø mvdøng vchyak we íe.

Èwàò we bvnlìò mvdàm taq kámshì nønt kèní shvla dø vtøshì lúnràe. Bvnlì vràmnø rvzaqnø dvkángshìrà we wa ínø tiqni mvdàm tiqni téwa vháng nø shálún lvm dvpvt canshì weí dvzaq dvkángshì rà we íe. Àngdèí èwàò we bvnlìri taq wvl nvngòn wa mvtaq nøntmvsøn gomvlsì, shóngnønt zángshìnø èwàò we nø jøn jøn ni shvla dang kèní vháng lúnshì lvm wa íe wanø nvngòn zi we dvtit tvle shvngkà ayáng nvr ngòe.

Add new comment

3 + 11 =