Zìlangré nvng kàru

Dèni bat taq làngrérì nø mèpvng dvpat vdè móng vdè dvcìcèrì zìdang vháng lún lvm dvpat bvnlì døngjárì svng raqpùm tvle shìnø rílvm shølshú vgorì íe. We dø írat nø dènilaò làngrérì nø gvzàni vchyak we íe.

Wedø írat zìlangré nvng cvmrérì dvpat cvm lvpat kèní vdèchøm døngku vdòng taq pø zaqshøprì mvdàm paqzí shvlá zílún we kàru lìga bokrì gvlã lún lvm nø gvzà vchyake.

Vdè lvpat taq pøshi pømè, zaqshøprì nø vdèlá vshøp shìwe taq cvnnø, lvpatò vjú ziwe taq cvnnø wulaq bvnlìrì wá dvzaq shìlún we taq cvnnø vshøpshì shvla we íe. Paqzí wawe taq vdè móng vdè rvgaq zìdang vháng lún lvm, síngrál nøt rvmshì lvm, vdè móng vdè rvgaq øpkángnø roqgvr shìlvm dvpat màvl mvdaq vshøp shìràwe mvdøng vchyak we tiqlòng íwe svng yánglún shìe.

Mèpvng kaq vdèmóng vdè rvgaq mòngzøl dø zìdang vháng lúnlvm dvpat nø dèni batò làngré nà ngà shvngbe taq mvdøng bvnlì døngjá vlweí paqzí dang taq yelìnø dvzaq dvkáng shàì weí dang vrvm taq shvla dø jò we tvrà ku cvndøng shàì katwa møngzøl nø zìdang vhángì we lvpat svng lún lvm wa ílonge.

Rvtø lúnshì we taq nvngòn kùngàrì zángshàìnø cvn dvzaq shàì weí chvpdap bvnlì taqgø lángshìnø wá dvzaqshì we svng làngré wa nø shønlún shìwe íe.

Làngré lvpat taq àngdè gùr gùr taq kèní táshì, yánglún shìrì taq kèní dvtøp nø cvnshì nø lìga kàrurì taqkèní gø cvnshì weí zitnøt rálnøt svng lúnshì we íe.

Wedø mø:í nø vhú ahwaq evl we ínìnø mèpvng kaq nøttøn shìlvm lòng nvng vhømshì lvm wa ílonge.wedø írat làngrérìò vsak rvm we rvtø, vko vkángrì vlnø lúnshì we rvtø taq shvla we màshvla we svng dvtøp shàì nø lìga rø we taqkèní cvnshì lvm nvngòn zí mvyø we íe.

Vsvng dvcì tiq lòngnø angdè hí taq àngdè ngàng ngàng riplún lvm dvpat nø lìga paqzí, nímzì, nøtsun paqzí rìnvng gùn dvtøp paqzírì svng yáng mvtàmvm dø wáshì mvdaq. Jà gvmsùng rìsvng wa nøt vyuq we ígø angdèò kàru tóng laqyà rì vnøn sháònø dvcì mvshøl rìgø mø:í lvpsvng vpo shì sháò we svng shvdøm we íe.

Wedø írat kàru lìga nø nøngmaq gø vrvm dvpat shvlá vtang rvmjà gø íe wae. We rat nø làngrérì taq kàru lìgaò dvpø nvng angò vjúrì svng síngsháì weí vtoshì lún lvm gvzà vchyake.

Vsvng tiqgø kaq svng nøt mvsøní øpkáng we ínø nøt mvsøn svng nø síngrál nøt kèní øpkáng we íe síngrál nøt svng nø mvkrøm mvdøprì taqkèní øp ká:ngòe wae. We ratnø síngrál nøt vháng lvm dvpat lìga rø dvzaq shàì.

Dèni laò làngrérì nø nvpniò vpø nø vnvpwe àngshí angwvtrì íe.

Zìdang vhángwe dvcìrì nø lìga røwe ínø lìga rø we dvcìrì nø vhánge wawe paqzí vdèrìò kà vlwe dø tiqdvchá lìga røwe taq kèní mònggvn zìdang svng yel lúnshìwe íe. Làngré wawe nø móngdan tiq méò vlømràrì gø íe. Làngrérì taq lìga paqzí vl rawe kat wa we móngdànò mèpvng lvpat nø mònggvn zìdang rønòwe móngdàn bøn lvm wa ílonge, wedø írat nø dènila zìlangré cèrì taqkèní lìga paqzí taq cvn dvzaq shàì nø vdè móng vdè rvgaq svng gálòng zí laqlúnì wanø nvngòn ziwe dvtit tvle svngkà yayáng naròe.