Zòngmvng tiqgø svng vháng lvm dvpvt kàdø tvrà shvl nø shvngøt dvnò lvm íe má?

Zòngmvng tiqgø svng vháng lvm dvpvt kàdø tvrà shvl nø shvngøt dvnò lvm íe má?

Vnìtaq Cvmrérìcè kaq svng Svràrì, vngpè vngmerì ínø Zòngmvng tiqgø svng vháng lvm dvpvt kàdø tvrà shvl dvnò nø shvngøt lvm íe má weka svng kení tiq dóngcè dvtit dvlè lvm íe.
Cvmrécè rì wani nø (3-4)nøng rvm yvng kení shvngøt pvng shì ràe. Cvmwe Cvmrérìcèrì kaq svng kàdø íe tvrà, kadø kù paqzí shvngøt lvm ímá?
Vngpè nvng vngmè maq gø vrvm nø vdeò cèrì svng lìkà paqzí mvdaq we kaq svng vlúm shìe. Mèmé mvdaq we vsvng tiq gø í dvzvl mvyøè, mví má? Wedø ínì nø kàdø íwe tvrà rìnø nøt vlúm shì lvm vrvl má? Kàdø íwe paqzí rì kení shvngøt lvm ímá wanì nø Cvmrécèrì yvng gø laqmù laqyà rìnø shvngbè yvng vlwe íe. Cvmrécèrì shóng shì we tvrà vle werì nø kà shvpóng rì kení téwa shálún lvm, mvzøng shì lvm, tiq pàq lá Cvmrérì kaq svng zvng dvdùt røtnò we tvrà svng gø láng ràe. Wedáng í datpùng sømlà rì, video sømlà rìkaq svng lìkà mvdvm yvng yàngò ílvm høq mànáò nø dvdvm lúnlvm dvpvt wálúnò nìnø vgò mvcì yvng gvlò nø ká dvgvp gø màvná bøàwe íe. Vng maq nø (3) nøng rvmcè ínìgø vngmaq í cvnshì lúnò, yvngò rì kaq svng vgò mvcì yvng høq záng shì sháò we íe.

Cvmrérì dvpvt mvzøng shìnøt shvlá vtvng we rvtø rìnø vsháng (5) nàyì kení (10) nàyì høq, dørøm lvpnø (5) nayì kenì (9) nayì høq vsháng rvpnø yuprà kení kùng shì ráì rvtø nø shvlá vtvng we rvtø íe wàe.

Shvngøt shì bøì we lìkà rì svng màná lvm dvpvt mvtngan vgò mvcì shvlá lvm dvpvt gø vchvt we íe. Wedø írvt nø mvtngan mv-vl we, vgò mvcì mvshàla we Cvmrécèrì mví lvm dvpvt (vB 12) rìsvng omega 3 fatty acids vbá we kanyóng kanyvng (or) zì rì zíà ràe. Vgòmvcì shvlá lvm dvpvt (ဒိန်ခဲ၊ဒိန်ချဥ်၊ထောပတ်သီး၊ပန်သီး၊ကွေကာအုပ်) kàlom rì kaq svng vmã ràe. Vgòmvcì svpvt mvshvlà wenø nvmòy zøpvntì rì ကာဗွန်ဟိုက်ဒရိုက် vbáwe zøpvntì rì processed food rì mercury ပဒါး loqwe ngã sha rìsvng loqloq vmã mvdaq we íe.

Cvmrérìò Vgòmvcì shvlá lvm dvpvt tiqdø ginsøp dvzvl ràe. Game rì ginsøp nø, kàshøn kèrì svng gø mvkúm shvringò we rìgø Vgòmvcì shvla we íe. Dáng ínø kàshøn kè mvdaq nø dvzáng rì rø dvzvlò gø Cvmrérìò vvgòmvcì téwa vjú vlwe íe.

Cvmrérìò vgòmvcì téwa vháng lúnlvm dvpvt nø nvmrvt cvmré lvpvt taq vde nø videò cøm kení páng shìwe íe. Sìmsaq mòng zvl we cøm yvng kení dvté dvzvl ràe.

Vkvtdø (3-14) nøng tèrá høq dvzøm dvgøm dvtéò Cvmré tiqgø nø Vgòmvcì shvla lúnlvm ílòngè. Vjú vlwe zìdvng kaq toq lònge. Zìdvng vháng we vsvng ínø vdè nø vdèò lvpvt svng øp sháò we vsvng tiq gø ílónge.