zilangre nvng vhang lunlvm dang

Làngré nvng lvpvt vháng lvm dang Zìlàngré lvpvt taq jøng jøngni vháng mèyø emá?

Jøng jøngni jornø vháng mèyøwe shvrúng nøntrì evlwe ínìnø tiqni taq lúnshì lvm wa ílonge. Gø vrvm taq vháng mvyøìwe nøtvlìe. Írvtnø nà nhà shvngbenø dvzaq shàìwe íe. Zìlàngrérì taqøgø vhánglúnwe tiqgø bøn mèyøwe ínìnø vdèí èwaòwe bvnlìrì taq nøt lúm lúm dvzaq shìràwe íe. Vhúhwaq vlnø yùl yùlcè lúshìlvm mvl we íe.

Vháng lúnlvm tvrà taq dvshà mvhøt lvm àngpvn pvn vkøn nø yaklvm bvnchvt rìvdòng taq dvzaqshì ràwe mvtaq svngpvn dvci shvngbe nvng gø vtoq vtip shìrà we gø íe. We døíwe vdòng taq àngdè kámnøt taq kèní tønshìnø àngdèò mangá svng lúnhoq dvzaq shì ràe.

Vhánglún mèyúwe tiqgō taq shvlawe nøtmvsøn gvlshì lvmgø gvzà vchyake. Vhánglún mèyøwe tiq gø taq vkovkángrì svng wa rungnø cashàìwe dø mø:ínø àngdê taq kèní dvzaq shìlvmgø gvzà vchyak we íe. Shøngrøm shìnø dvkømshìwe vnípèò mvshøl taq tiqpènø tiqni taq 10 nari dvzaqshì nø dvgá tiqpè nø tiqni taq 5 nari dvzaqshì nø 5 nari nvrshìe. We pèní taq tiqni 5 nari dvzaqshì nø 5 nari nvrshìpè nø téwa jornø vhánglúnòe. Pàwálvm wa ni àng nvrshiwe rvtørì tiq nari mepvng tiq nari vrvm taq àngí lángòwe wvrdi svng heshìwe írvt téwa taq kéòwe ínø téjor we svng yánglúnshìe. Yalòng mvshøl taq kèní gø cvnshì shvlawe íe.

Shóngshøngwe zìlàngrérìe vháng lúnlvm dvzaq shàìwe tvrà taq nøt vtanglvm døíwe àngpvn pvn vhøm vdurawe ínìgø nøttønshìnø dvzaq dvkángshì lvm nø gvzà vchyake. Jornø vhánglúnòwe vsvngrì taq vdèò tvrà lashìnø dvzaqshìwe ínìgø krvtsømwe vsvngrì taqkèní íni àngpvn pvn dvpèònø rvtø dvbé sháòwe íe.

Zìlàngré lvpvt taq nvngòn kùngàrì vlìnø dang vrvm taq dvdam rønìe pàgø wádángshì we rvtø taq jórlúnlvm dazaq shàì wang nvngòn ziwe shvngkà yayáng naròe.