Dvrvtce mvshøl tiqlòng taqkèní dvshvng lvm

Dvrvtce mvshøl tiqlòng taqkèní dvshvng lvm

  Dèni Døngku tvrà tiqyø taq, Dvrvtce mvshøl tiqlòng taqkèní dvshvng lvm íē. Darì dvgvp Dvrvtce tiqpè nø mvgàmce tiqmè røt shìe wàe. Mvgàmcèmèí Dvrvtcèpè svng rø:tnòe, wàe. "Nà nø kayv'ng evlē, kàpà bvnlìrì èwà shìe "wā rø:tnòe, wàe. Dvrvtcèpè vtá:nshi we taq, "Ngà vl we chøm nø nvmsvr weò Láng Láng gá sa:rò we shvrà yv'ng vlē wàe. Waqrìí nø pòni søngdø sømbí mø:tnòe. Vgirìí nø Kong ban zá:lòe. Kárìí nø chøm shø:mòe" wàe. Yapè nø mvmè mvdaq we tiqpè ni í pà íē, wànø mvgàmcèmè nø Dvrvtcèpè kaq shóngshì nø lo ráì wàe. Chøm tuq ráì nìnø chøm rvgung chàng nvmì svrkè dá:rà wàe. Waqrì gø svrì shì nø vkiq long svng sømbi mø:tnòe, wa dá:rì wàe. Wedø tiqdvchá Vgirì gø Kong ban mà zvlshaq í rvt lēò long svng wa dá:rì wàe. Kàrìí gø nvmsøng mà-vl rvt røqò nø kàniq dvchøng í yv'ngø mvgàmcèmè tuq ráì dvdáshì nø vhøshìe, wàe. Íwe, Mvgàmcèmè nø nønt màdvcvmshì, "ló, dèni kèní dvzaqshìshì wa shvngø:tnò nø chøm zøqdvzaqshì, bvngkarì wàshì , waq rì gø vgádø naò , vgirì gø vgádø naò, kàrì gø mvdìdø wàshì, døngku bvnlì dāng vrvm taq dvzaqshì nø vdá mvgàm yà:ngì wàe. Vpøí we vnvmchvngmaq,Zvmi shvzøngshì we bvnlì nø dvrvt dvrò shvngbè dvpvt Gvrayí mvn yà:ngà we vtóng írvt svmaré gø, mvgàmcè íni gø, lvngàré gø, mvgàmcè íni gø tiqnønt ewà shinø dezaqshì nìnø shvla we døngku, mongzøl we, vháng vlún we døngku bøn lúnshìe wàwe mvshølcè tiqlòng íē.