"Gvray Dvrá Mongkà vdòng taq pán vshat ínø øp shàì"

RVA Rvwang Shvngkà dvp kèní nī vrvm dvshvng shìwe Mongkà rì svng tá nø nonggùn zí dèbvng shàwe pèmè vnvmchvngmaq, dvcicèrì shvngbè svng Pamvra.

Dèni Døngku lvmvng tiqyø taq nø; "Gvray Dvrá Mongkà vdòng taq pán vshat ínø øp shàì" wàwe Kà Vgo taqkèní tiqdòngce dvtit dvlé nø dvshvng mvyøngè.(1 Piter 5:7-8)7,Namaqò gónggilv́m rì shvngbe Gvray kaq tèlenøng. Kadø íe wani Ang nø namaq svng mvkok dvdí pè íe. 8 Nøt shèriqshinøng; pán vshat nàngv̄rshìnøng. Namaq svng vtù pè cáng nø, vhvpshi we kàngkì dø̄, tiq gǿgǿ svng naq lúnlv́m dvjv́mshi nø láòe. wàē.

Gvrayí nø basharì kaq vshøt vzèng lvm vmíng vkvng nvng Nina pvnrì kaq øp kvng lvm vmíng vkvng vzíshaq íē.
Mònggang taq Vsvng pvn tiqmaq nø Nina pvnrì nvng tiqdvciq shvzøngshì we vsvng pvnrì vlē. Vrá nø angce dø dvdu:tnò nø vguò we vlē.
India móngdàn taq svmaré tiqmè ínø bø tiqgo svng angce dø dvdu:tnò nø dvkù:mōè.Ni vrvm Vsháng dørøm Vm pà zíò vguòe.we go bø nø 12 bé dvngtè yvngē wàe. Tiqni rvtø taq we go bø go nø bvtut vm pà màvm bøì wàe. Angkangmè ínø mvmè nī vlé ráì høqshaq bø go vmpà màvm rvt gónggìe. Wervt tiqni rvtø taq Nina svrāwøn yvng svng baq bøā. Nina svrāwønpèí angkaq bø go nvng tiqdø eyøp shìe mà?,wa røtnòe. Vrá nø eyøp dvgvp bø go í nàgóng svng èdiqē mà? wā røtnòe. Svmarémè ígø svrāwønpè svng "Ie svrāwønpèā tiqdø yøpshìe, wā vtánòe.Iwe parvt vmpà màvm, parvt góng mv-byo mà wvng nø pakngvtnà" we íe a:lōe. Svrāwønpèí nà bø go nø góng mv-byo we mø-í, nà svng naqlvm rvt svrì dvshíshì we íe. Nà eyøp dvgvp nàgóng kàdvngté té mà, kàdvngté yv'ng mà, naq dvnglvm ímà? wanø nàløt we íē" ,a:lōe. Wē ni kèní svmaré weme nø àng lvpat vmvng lvm yv'ng kèní lutshi yvngì wàe.

Shóngshøng we vnvmchvngmaq, Ngvnshà nø røng shvyóshì nø mv-dì rà. Ya gø nø kadø yù:mò kvt yù:m dv'nglúnò mà wanø nvnnvn dvchøshìe. Vdèí rēmì we Nina pvnrì, vmlvm aqlvm vrū kèra pvnrì, byolvm pvnrì, tiqdvr vsvng rì taqkèní gø ngvnshà nø dvchøp è. Nèí yv'ng mvlúnshì. Ngvnshà svng yvnglún lvm nø Pvlace nvng shagóng tiqdø tiqnønt tiqmvsøn vzøm kvt wā yvnglún shìe.
Dènila nø mònggang taq gvzà rvzaq we share dvké we angnì rì íē. Mvgvm vsvngrì luqè. Dvløt gvzvm we luq mvnshìwe dvhø taq vl vtuè.
Wervt nønt shvriq shàì nø vdè góng, vdè lvpat, Døngku lvpat bvnlì dang vrvm Gvray Dvrá Mongkà vdòng taq øp shì laq lúni wvng nonggùn zí mvyøngè.