Mònggàn svng Cèrè dvke dvzvr we Omicron.

Mònggàn svng Cèrè dvke dvzvr we Omicron.

Ya rvtø taq vrá tiqbaq mònggàn móngdan luq mvlòng nvng Myanmar móngdan taqgø tiqni nvng tiqni gvza vkøn ráì we Omicron vna svng

vsvng vrvm shvdiq shìlvm nvng kadø vgám ràwe dang svng shvdúm mvyøng we íe.  

Covid tiqpvn ínø vrá tiqkvt vkøn ráì we Omicron vna nvng singnø vsvng vrvm vdèò gúng vdè vyá shìnø vdè yvng kèní dvgá vsvng rìkaq mvzíng

ké lvm kadø shvdiq shìnø vgvm ràwe dang svng nøngmaq gø'vrvmí dvdvmì rawe íe. Wedø shvdiq shìnø vgvm lvm dvlú dvgø'shìwe dang nø vsvng

gø vrvm dvpvt shvlà vtvng we dang íe.
 
 

Omicron vna nø vzáng vlè bøì we Covid vna zìnlì dángtè záyvng sòngwe nø mví, wanø shøn we ínigø ya rvtø taq tiqni nvng tiqni gvza vkøn nø

zàwe vsvng mònggàn móngdan luq mvlùng taq té záyvng sòng we shvngka dvp kèní dvshv:ngò we svng tãshì yángshì lún we íe.

We rvtnø vdèò gúng nvng tiqrvp chøm vsvng rì svng Omicron vna zìnlì màvkøn lvm dvpvt vsvng vrvm shvdiq shìnø vdè kèní dvgá vsvng rìkaq

mavzøng lvm dvpvt vdènø vdè vyá shìnø vgvm we kèní Omicron vna zìnlì svng mònggàn móngdan rvgvq kèní vtù vgvm nø shvmáng lvm svng

nønt køm we íe. Covid vna rvt cere dvké we rvtø vní nøng ján tøm ámì we írvt vsvng luq mvlùng nø kadø shvdiq shìlvm cvndøng we dang yómwe

svng yáng lún shìwe íe. We rvtnø nøngmaq shvngka ètá nøng we pèmè vnvm vchvng maq laq mvlúmì, shvngbè dvpvt shvdiq shìnø vgvm lvm

nvnggùn dvkáng shàì wang nvnggùn zí dvshvt mvyøng we íe.
 
 

Omicron vna zìnlì mvzíng lvm dvpvt vgvm ràwe nvmlat (1) dang nø Covid vna bvncì túshì lvm waì, Covid vgvm cì pvn gvza luqráì we íe. Vsvng

luq mvlùng nø covid vgvm cìsvng vní poq túshì bøì we íe. Covid vgvm cì túshì bøke bvttut bvnwe nø mv-vl ínigø mvsat shìwe taq shidvng tiq

dángtè vgvm ràwe írvt Covid vgvm cì vní baq gødø túshì lvm waì. 

Nvmbat vní dang taqnø mask nønggøp svng jòdø  wàmshì lvm waì. Nønggøp wàmshì lvm svng nø shøn gø mvràámì we íe. Wedø ínigø mvdvm

yvng shøn bø:ngã we døni tiq dvchá vsvng luq mvlùng nø mask nønggøp wàm mvnèshì we rvtnø dvgá rvmnvng rìsvng vna zìnlì vkøn dvzvr we

dang íe wa nønt taq dúmì nø  nønggøp wàmshì lvm laq mànáì. Té mvlùng nø vsvng luqwe rìpòng rìtaq dìke mask svng shvlá mvchàcì wàmshì

lvm waì.

(3) dang taqnø nvmbøng shvlá mvchàcì lúnshì we shvrà rìtaq vllún lvm vchvk we íe. Nvmbøng shvlá wacì mvlún shìwe shvrà rìtaq nø Covid vna

zìnlì téwa vkøn we shvrà rì íe. Wervtnø vkvt dø Covid vna vrá tiqkvt vkøn ráì we rvtø taq té mvlùng nø shønggàn gat sing canter svng dike  

nvmbøng mvlún shìwe shvrà, Aircon rì poqò we shvrà rìtaq dìlvm íninø mask svng shvlá mvchàcì wàmshì nø dìlvm vchvk we íe.

(4) Wùr svng vkvtkvt shvlá mvchàcì shør shì lvm waì. Shønggàn svng dinø dvrè tiqpvn pvn svng jòm bøà mèpvng Wùr svng shør shìnø cvnsíng

shìlvm waì. Vkvtkvt wùr shør lvm nø mvzvn shì wanø nvr lvm laq mvwàì. Shønggàn svng dike kà dvgvp gø mask wam shìlvm nvng wùr shør

shilvm waì.

(5) dang taqnø vsvng tiqgø'nvng tiqgø dvp dvp wa laq mv-vlì. Ya rvtø taq Omicron vna svng vgvm lúnlvm dvpvt cvndøng rawe nø vsvng tiqgø'nvng

tiqgø vsvr nø v'l ràe. Kadø vsvr nø v'l rà we dang svng nøngmaq shvngbè íshá shaq íe. 

(6) dang taqnø vna àngmè svng dvshvr lvm waì. Tiqni cøngdø lvng bøshà we dvrè rìsvng Spirit í dvshvn dvshvr ràe. Mvdvm taq shøn bø:ngã we

svng cvndøng nø shvdiq shì we íninø vdè nvng chøm vsvng rì Omicron vna svng cère mvrà vgvm shìwe nvng Covid vna svng gvsat we taq

vbá bø'shà we íe.

Omicron vna zawe ang gùmlà nø vzáng bønwe Covid vna zawe nvng vbúnge má wa vsvng luq mvlùng nønt dvshà wenø vgoke nø vgodøng zàwe,

naqtú zàwe vna gùmla vhøm bøì we svng shálún shìe. Omicron vna nø vkøn yòl we írvt rvtø angdøng taq vzíng lvwan we Covid virus mvtaq vkøn

we íe wanø shvdiq shìlvm dang dvnù:ngò we gø vlwe íe. Vrá tiqpvn nø Omicron vna vzíng we vsvng tiqgø' kèní 79% yàwet dángtè nø Covid vgvm

cì vní baq túdáng shì bøwe vsvng rì dvpvt nø vgvm shaq ívm we íe. Covid vgvm cì shvnì mvtú shìwe vsvng rìtaq Omicron vzíng we íninø shaqhé

shìjat rì bø'n shàwe írvt Covid vgvm cì túshì lvm vkáng lún shìwe vsvng gø vrvm túshì lvm dvpvt shiqshvn dvp kèní  paqzí zí dvshvt bøà we svng

shvngka ètá nøng we pèmè vnvm vchvng maq svng vrá tiqkvt shvdúm mvyøng we íe.