angmèmaq, angcimaqo dvpø'

Dèni nø angmèmaq, angcimaqo dvpø' wawe Kà Vgò taq kèní dvshàng lvm íe.

Vnvmvchvngrie..Angmèmaq, angcimaqo dvpø' svng mónggang taq kagø í cun lune mà? Angmè jèjú nø rø mvtøm shì wapa dø angmèmaq, angcimaqo dvpø' svng mònggang taq cun mvdvngshi,rø mvtøm shì. Angmè lvpat wa we nø góng Shang møí we rvtø kèní pvngshiē. Mònggáng taq bøngté lvm dvtvn we angmèmaq taq tiq lòng vlē.We lòng nø Kapan tonglaqya, kapan dvci dvgøng, mvdò taq íni gø shøq daqò we cvmré gø svng vhvngvlúnlvm rvt dvzit dvzvng lòng íe. Vdèce svng angmèmaqí (shape) háng shwē nø shvngøt dvtú we vdòng vzvnglvp mònggáng svng shvnvp we íe. Lvpat mvshøl svng vrù shì we íe. Vrá, angmèmaq nø angpè maq nvng gø tiqdø íe. Angcø angcerì svng vzaqshi nønt vllvm, vdè lvpat vhvng vlúnlvm, vdè lvpat mvshøl shvlá wā vrùshì lúnlvm rvt shongnønt, kvmnøntní shvngøt dvtú nø dvpvng we nvmlat Svra gø íe. Angmèmaqí nø vdècerì svng kømzup dø shvngøt lúnòē wanø kadvgvp gø mà-sunshì, rvtø vrv'm vzaqshi nønt-nì cvmrérì svng ròqgar nø dvzit dvzvng dvté ngòē wanø gø mvsunshì rìíe. Mvshøl svng eyvng lú:ngo kvt American damvdàq Mr.Bush, angce Groge Bush maqdø, Singapore shølshú vgòpe lìconyuk, vkvt angcepèí Singapore móngdvn svng øp kvngo e.Dvká dø mònggáng shølshú vgòrì,bøngtérì mvmè vle.Yàdāng nø angmè maqí vdècerì svng kadø dvzit dvzvng nø shvngøt dvtú è wa lòng svng dvtvnò we angshi íe. Dvgá dø dvci dvgøng bvnlì taqngø, Company bvnlì , cildvp bvnlì taqngø, wulaqbvnlíri,paqzidvp bvnlìri, Gvray bvnlìri, shvla we bvnlíri dāng vrvm taq shølshú washì lúnò we vsvng, mvmè vle. Yarì nø vdèceri svng angmèmaqí kømzøp we shóngnønt, vpø nønt í shøq we angnì kèní nøntmvsøn nònggùn kùngà lùshì nø vzvnglvp Lvpat mvshøl mvnggá svng dvda:mo nø dvzaqshì we jèjú angshi íe..walong svng yvnglún shìe. Angmèmaq nø, Kàshvbung Gønzøp we Polong tiqmvdoò shvngøt shú nvng vbònge. Vdèceri dvpvt nvmlat angkang shvngøt shú Svra íe. Vdèceriò lvpat-hang mvnggá svng vrúshúrì gø íe. Angmèmaq taq yadø íwe power nònggùn vl we màlvni, màdø:mì.Angmemaq nø zùng léga paqzí Shà we, mà-shà we nvng gø mvcing. Cingral nønt paqzí mvng vl-rà we íe.wervt vdècerì svng vdèo shongwang,gworwang society vdòngø ríngwe cvmrérì ílvm vdèíshengøtno we, ewaò we bvnlíri taq di we íe. Myen Kàshvbung tiqlòng taq Raqweí vyongò we wūr nø mónggáng svng øp lúnòē wàe. Wervt angmèmaq, angcimaq nø gvzà vpø nø,ngórdvgóng vlri íē.. wanø eshø:no nigø mà-le shì. Wervt, vpø íwe vnvmvchvngrie.. angmèmaq, angcimaq nø vdècerì dvpvt tiqgòng shvngbè vpnóng shìri íwe mvdvmø,Vlømshi nønt vl nø mònggáng svng língvpo lúnò we nònggùn vlrì íē.. wervt angmèmaq,angcimaqò jèjúri svng vpø shvríng laqlúnì wvng dvman we Shangkà svng yayvng naroe. Tuqrà we rvtø taq vrá, shvla we døngkupè wawe kàvgò taq kèní dvshàng lvm laqí daq.