Vhøm nø mv-ngushì we tvyø taq tonglaqya dang nvng singdø dvtit tvle dang.

 Vhøm nø mv-ngushì we tvyø taq tonglaqya dang nvng singdø dvtit tvle dang.

Vhøm nø mv-ngushì we tvyø taq tonglaqya dang nvng singdø tiqdòngce dvtit tvle mvyø we taq; Nøngmaq vhøm nø mv-ngushìe wàwe taq nøngmaq tiqgø' nvng tiqgø' mø-í nìnø vsvng tiqdvci nvng tiqdvci yv'ng vl we tonglaqyarì vhøm nø mv-ngushì weí vpø nø shvring lvm rì vlē. Vkvt dø mv-ngushì we taq àngdeò lvpat mø-í ni dvcicè rìò lvpat vzàng kaq vháng vlúnlvm, tonglaqya nvng kàru gónggwá belaqrì, paqzí nvng shiqshan lvm àngdangdang taq gø kømzøp dø vháng vlúnlvm rvt mv-ngushì nø dvmvn we dang íe.

 Mv-ngushì we taq vsvng tiqgø' nvng tiqgø' kàshøn we taq gø màbong, Vrá nø Vsvng tiqdvci nvng tiqdvci vjàng laqyarì gø mabong, chøm wàò we taq gø màbong, Gónggwá belaqrì gø mabong, zvmi shvzøng we taq gø, zaywa music mv-kun we taq gø màbong we svng yv'nglún shìe. Vsvng vshì rvda we taq gø tonglaqya màbong we svng yv'nglún shìe. Vrá nø boqngøm we tvrà rì taq gø tonglaqya màbong we svng gø yv'nglúnshì we íe. Tonglaqya wàwe taq vní pvn vl we svng gø yv'nglún shìe.Vsvng kaq svng mv-rà wá dvzvr we tonglaqyarì gø vlē. Vzø'lam wenø mvnoqshi vtong íē wanø shvngøt dvtúò we svng gø yv'nglún shìe.

  Vrá nø vsvng dvcì rì tiqmaq ínø tonglaqya nø gvrayí zi we jèjúrì íe wanø vtōshì weí vpø shvringò nø Gvray kaq oqā wà shvkun shvringò we svng yv'nglún shìe. Vle a:mì we rvtø taq tonglaqyarì nø cáng dvrè íe wanø gur yvngà we svng shálúnshì e. Íwe Gvray kaq ká:m we rvzvngcerì tiqmaq ínø yalòng nø sàngzacè rì kaq svng gvrayí zi we jèjúrì íē wanø vtōshì weí vzø' lam nø Gvray dvgung shvringò we svng yv'nglún shìe. Vsvng dvcì dvgøng tiqlòng cúnsháì we lvpat taq ngvngdøng dø kàru nvng tonglaqya vháng vlúnlvm nø mv-ngushì nø paqzí dvkøm we vl ràe. Wekvt wā mongzøl nø kømzøp weí dang vrvm taq vháng vlúnlvm vlē walong svng yv'nglún shìe.

  Tonglaqya dang dvzaqshì nø bvnlì wàwe taq àngde í nàpøò kvtwā tiqdvr vsvngrìí gø sháò nø vpø shvring lvm vlē. Àngde ígø tiqdvr vsvngrìò tonglaqyarì kaq svng shálún shì nø Vpø shvringà lvm vlē. Vkvt dø vsvng tiqdvci nvng tiqdvci vhøm nø mv-ngushì we mà-vl, paqzí vzíke we, nonggùn vzíke we mà-vl ninø mongzøl lvm gø mà-vl. Lvngdøm taq Tonglaqya gø vmang sháò we íe. Wervt tonglaqya nvng singdø mv-ngushìe wàlong nø gvzà vpø nø ring we bvnlì íe.

  Vsvng dvcì tiqlòng nvng tiqlòng vhøm nø mv-ngushì we vl kvtwā kømzøp nø Gvray gvsang kaq svng gø téwa dvgung shvring lvm vlē. Tiqgø' nvng tiqgø' gø vpø' shvring kèwèí shóngnønt vzø'm nø dang vrvm taq mongzøl nø vháng vlúnlvm vlē walong svng yv'nglún shìe.