Angmè (or) Angpè Tiqgø’íwa Cvmre’rì Svng Roq Gvlrà We Dvgvp Kadø Wá Vdu We Dvng.

Angmè (or) Angpè Tiqgø’íwa Cvmre’rì Svng Roq Gvlrà We Dvgvp Kadø Wá Vdu We Dvng.

Deni nø angmè (or) angpè tiqgǿ íwa vdeò angcǿ angcèrì svng kadø roqgvl rawe svng dvtit dvle lvm íe.

Deni lvpvt taq single Family Hom wawe angmè (or) angpè tiqgǿ íwa vdèò angcǿ angcèrì kaq dvzøm mvkoq ngò we svng  yvnglú shìe.

Døngku tiq chøm taq angmè ní angpè mv-vlámì we, pèmè shòní gǿ vlwe ínigø̀ tiq gǿnø mvgvm mvshvla we vrùra pvn nø, gvni, mvløt

, yā wá shiwe, bvnlì døngjá tiqpvn pvn rvt vrúm rvgaq taq vsvr nø v́l vdu ke tiqgǿ íwa cv̀mré rìsvng roqgvl we svng yv́nglú shìwe íe.

Wedø íwe døngku taq cvmrérì cv̀mwe rvtø taq pàshǿn mvrà we ínìgø 14/ 15 nǿng dv́ngte télúngì dvgvp taqnø gvza yat lùnge. 
    
 

Vdeò lepvt svng vháng lúnhøq dvzaq shìlv́m rvsvng shìlv́m rvtø gø íe. Angmè tiqgǿ wa vlwe døngku ínigø, døngku svng angmè

í, shvla dø øpkáng dv́ngòe. Nøttǿng we angmè ínø vdèò angcèrìí kapv̀n wá mvyǿe, kadø bø̀n mvyǿe warì svng angmè tiqgǿ í,

yatwe ínigø shúngnøt taq kení tvrà dvgǿà lúnòe.

Angpè mv-vlwe Family chøm døngku taqnø angcèrì 14/ 15 nøng rvtø taq kení ídúm shìnø mvkrøm mvdup pàgø mv-vlwe ínigø

angmè nvng vsvrnø dvgá vrúm rvgaq rìtaq v́lshá lùnge. We rvtø rìtaq nøt dvshà lv́m vlè, nøtcv́m mvdaq, angmè í, vdeò angcè

kaq roq gvl lv́m angmvtú nø hàng vngat sùmla video nvng legv, bolóng gvzøp mv̀nshì lv́m rìsvng nøntlúm dvzvr ràe. We rvtø

nø shaqrérì kaq nøt dvshà lv́m yat dvzvr we rvtø íe.

Angpè íwa mvkoq ngòwe chø̀m døngku vdùng taqnø angcè mèlà télúngì høq raised dvzøm mvkoq ngò we rvtø̀ taq gvzà mvkø̀m

zøp we vle. Angcè mèlà nvng angpè dvhø taq relationship vtoqvtip we dang taq shø̀n mvyǿ kà svng chvk shǿn màdù rì vl rvt

gø íe. Wedø ínigø angpè nvng angcè mè dvhø taq tv̄svng nøtlø̀m we kám vrvm lv́m vlnì nø nònggùn kùngà vnǿn lv́m mv-vlwe íe.

Angmè nvng angcèmè dvhø̀ taqnø gvza shvla we íe.

Angcèpè nvng angpè kadø vzø̀m lv́m dang vlmá wanìnø, angcèpè  dvpvt kám vrv̀m we angpè íemá, mvímá dvdv̀mlv́m vlè. Vdè

svng cv̀mrérìí nøtlùm we angpè tiqgǿ ílv́m vchvk we íe. Wedø dvdv̀m shìdø mvbø̀n lùngke nøtcv̀m nøtdat we cv̀mré tiqgǿ ílùnge.

Angpè tiqgǿí nònggùn zí dvshvt we íninø gvza mvdaq we zilv̀ngré tiqgǿ ílùnge. 

Pèmè maq wanìnø dvrá nvng chvk øpkáng shàwe íe. Shàmná mvgùl weí shvngøt mvdaq. Angpè tiqgǿí vdeò angcǿ angcè rìsvng

laqyà shvlá dvtv̀n lúnlv́m gvzà vchvk we svng laq mvnáì. Angpèí angcè svng nà wámvyǿ we rìkaq neshìdø wádvzvr mvdaq. Vdeò

angcè rìkaq svng mvshvla mvgàm dø shvtèn gvyaq dvzvr mvdaq. Cv̀mrérì mvrdv̀m taq ngàngdø̀ng dø rip lún høq dvtú ràe. 

Vsvng vrv̀m taq vkoqvkáng vlwe íe. Ngàcèá nasvng gø vpèí vkoqkáng vzí shaq íe. Vde gúng svng vdè vpǿ shá ràe. Shvla we bvnlì

wawe taq kèní wa zidv̀ng vlwe lvpvt svng lúnshì lùnge.

Wekvt wa kadø íwe lvpvt zidang taq ínigø vsvng vrv̀m nvng vtoqvtip lv́m dang taq gø, bvnlì dø̀ngjá vrv̀m,zidang vrv̀m taq shølshú

shvlá wálún shìnø øpkáng lúnlv́m wa íe. Lvpvt taq krvtsúm lv́m mví, vhánglv́m ílùnge. Màshvla mvgam we angpè angmèní mvílv́m

vdeò lvpvt taq laqyà shvlá nvng mvshøl shvlá ngámshì høq dvzaq shàì wang dvtit dvle wekà yàyv́ng nvl lv́m íe, shv́ngbe kaqsvng oqa.