Covid Ana Zønlì Zàwe Taq Kèní Bàn Lù: ngì Mèpàng Nvnggùn vllvm Vchvkwe Dang.

Covid Ana Zønlì Zàwe Taq Kèní Bàn Lù: ngì Mèpàng Nvnggùn vllvm Vchvkwe Dang.

Nøngmaq Myanmar móngdàn taq vrá tiqkvt vkøn ráì we Covid-19 Ana zønlì rvtnø vsvng gvza ana vkøn weí zawe vsvng rìnvng vsvk søm nø shiwe vsvng rì, ni vrvm vlwe írvt ni vrvm ana

zønlì taq kèní lutshi lúnlvm gvza shvdiq shìnø vlràwe angní rì íráì we íe. Ana Zã yvng zãwe vsvng rì mème taq kèní zøm lú:ngì we vsvng rìgø gvza vle. Vrá Cì jøp lú:ngò we ínìgø

yógà angmè nø mv-vlámì, Negative íbøì we ínøgø yógà vkøn we vsvng rìnø nvnggùn yúmwe, gvza mvjòl we nvng dvgá zã yvng angpvn pvn vlwe írvt shìqshvn lvm mv-vlwe svng

yvnglún shìe.

Vsvng tiqmaq covid ana zøm bøì we mèpàng wa chvng vnán shìwe vsvng rìgø vlwe íe. Wedø bønwe nø covid ana zømámì bvnámì vní vchøm Lvbán vleámì wanø vnvt shvdiq shìwe

mv-vlwe nvng vsvng tiqmaq nø vzvng kèní zãyvng tiqpvn pvn vlrvt nø tønshì lvm nvnggùn mv-vl rvt gø íe. We rvtnø chvng vnán zãyvng sòngwe nvng chvng vnán Shìwe mvbøn lvm dvpvt

mvdøng mvdaq svdiq vyá shìnø cvndvgøm wenø vsvng tiqgø' nvng tiqgøò shìqshvn lvm dang, záyvng angpvn pvn taq kèní lutlún lvm nø gvza vchvk we íe. Vrá nø covid vna zá yvng

zawe taq kèní zøm daqì mèpvng góng shàncè wanø nvnggùn vllvm dvpvt vsvng vràm svdiq vyá shì ràe. Wedø ínìnø covid vna zayvng kèní zøm daqì vsvng rìnø dvshaqí nvnggùn

vllvm dvpvt mvdøng cvndvgøm ràwe dang nvng singnø Dr. Htet Htet Zaw Winí paqzí zìwe nø, yarvtø taq vsvng vràm dvpvt vjú vlwe írvt singrvl nøtní vna gvp bøì we vsvng dvshaqí

zømnø shìqshvn we vllvm dvpvt dvtit dvle we íe.

1/ Vmaq lvm nvnggùn rawe - Nìvràm nøngmaqí á:mìwe vmaq lvmtaq shiqshvn we dang nvng vdūwe datrì, protein dat, Carbonhydrate dat rì svng shvrám nø vmaq ràe. Shiqshvn lvm

nvng vdūwe só datnø góngshà taq gángnø zawe svng zøm dvzvl we íe. Carbonhysrate nø góngshà nvnggùn bønwe írvt dvgá vitamin nvng pøyá dat rìnø shàgóng svng nvnggùn zìwe

shvlae. Protein wawe sha dat, antibodies rìsvng lúnshìnø góng vdúng dvpvt zidvng vldø nvnggùn zílúnò we íe. Wervtnø nìvrvm vmaq we taq Kànyúng kànyàng, angpvnpvn vno shvráng,

kasha, ngvsha nvng nvngò nòng rìsvng vdū vbóng dø vmaq lvm vchvk we íe.

2/ Káhøq yup ràe - Yuplvm rvtø mvluq we, yup mvká wegø shìqshvn lvm mv-vlwe íe. Yup mvká we rvtø gvza vlédaq we ínìnø, góng mvbyò nø zàlù:ngè. Dvshaqí mvzøm daq. Wervt

nø yarvtø taq Covid vna gvpnø zã yvng taq kèní zøm lú:ngì we vsvng rì tiqni taq 7-8 nàyì høq yup lvm rvtø svdiq shì ràe. Wedø ínìwà, góng shiqshvn lvm lúnshì daqe. Yup mèwa

kàsvng shønlvm nø gvza yòlè, wedø ínìgø yup mvbyò we, yup mvlún shìwe, yup mvshvlà zawe vsvngrìí yupnø vjú vldang svng té sing shánà íe. Yàrvtø taq covid vna bønwe vsvng

tiq maq taqgø yup mvbyòwe, yup mvshvlà we, zanø yatwe vsvng rì vlwe íe. Lvpvt vháng ráì wedø tiqdvchá yup rvtø mvn lvm dvpvt gvza yatwe rvtø taq Covid vna zìnlì dvjáng vrá

vkøn ráì rvt téyatwe angnì svng tuqráì we íe. Yup nvlshì lvm nvng singnø paqzí vdèrìí shønwe taq vsvng (10) gø taq kèní (4)gønø yup mvbyòwe, yup lvm yatwe svng vhøm shàe

wàe. Covid vna zìnlì bøn rvt yup mvbyòwe vna svngnø (Coronasomia) wawe svng shálùn shìwe íe.

Coronasomia wawe nø yarvtø taq vhøm weyup mvbyò we bvnchvt, nøtyat we, nøtdat nøtyòl lvm bønwe rvt yup mvbyò vna ínø Covid-19 rvtnø bønwe íe. Vsvng témvlòng yup mvbyòwe

nø covid vna zìnlì vkøn ráì we rvtø taq kèní vhømòe, mvínìnø to kèní yup mvbyò vna vlwe vsvng taq té sòng we shálún shìwe íe. Wedø bønwe svng yà:ngò ke pø gvmsòng mv-vlwe

bvnchvt, nøtyòl nøt dvshà we bvnchvtrì, vdè shóngshì we rvmnvng rìnvng vsvr we rvt, vzang lvp taq kadø bønlvm svng nøt bùm weí social media lvngwe gvza loqwe angpvnpvn rvt

bønwe íe. Yup mvbyò, yup mvshvla bønwe vsvngrì yuplún lvm dvpvt dvbvng lúnshì wenø, melatonin cìsvng wàn nø aqlún shìwe dø tiqnì taq minutes (30) ján nø yup mvdaq, yuplvm

zang taq coffee paqká aq mvdaq, yùprà mvdvm phone yáng mvdaq, yùprà rì svnggø svnsing dø lvjvng shìnø lvnggá shvrà taq mvínø cvmaqcè singdø we shvrà taq yupnø, rvtø

mvnmvn yup shvlae, yuplvm zvng taq (10) minutes dvngtè shaqhé shìwe èmvnshìwe èwàònìnø nàsvng yuplún shìhøq dvbv:ngà daqe.

3/ Rvtø nvng mvnmvn vmràe - Covid vna taq kèní vrá zøm lú:ngì vsvngrì nø vsháng, vyvng, dørøm vmpà rìsvng tiqnì taq vshøm kvt v:mà ràe, welùng svng (4) nàyì dvhø taq v:mà ràe.

Nvngùn dvshaqí lúnlvm dvpvt svrí gvza shìwe rvtø taq wa vmwe mvínø, vmpà vshøm má dvhø taq nvnggùn vlwe vmlvm pvn adèí vm mvyø we rìsvng v:mà ràe. 4/ Vitamin dat svng

vná mvdaq - Shiqshvn we ínìgø vna zã yvng ziqyvng rìsvng vgvm lvm dvpvt gø, zawe bvnlvm dvpvt gø, zayvng zømwe rvtø taq dvshaqí shìqshvn lvm dvpvt vitamin dat vchvk we svng

døm ràe. Wedø írvt shìqshvn we ínìgø vitamin dat rìsvng dvtut aqràe. Kà shvdún vitamin C, vitamin D, zinc dat nvng dan dat rìsvng nø rawe mvdvm jándø aq mvdaq we svng shvdiq

shì rawe írvt cì Svràwùn rìí dvtvn wedø aqwe nø shvlá vtvng íe.

5/ Mvnshì ràwe dang - Góng mvn shì ràwe dang wà lùng nø mvdøng mvdaq gvza mvnshìnø gvla shì lvm høq wá dvzvr wenø mví we svng shøn mvyøng we íe. Nøtmvsøn nvng shagóng

shõ nípvn shìqshvn we lúnlvm mvn shìwe dòng nøt mvsøn cømsaq mòngzvl lvm dvpvt dvrá shvdik shìwe nvng tvrà dìwe rì wa ràe. ‌Yadø mvn shìwe tvrà rìsvng nvnnvn èwà shìwe ínìnø

shagóng taq vlwe vna zayvng ziqyvng rìsvng gvsvt jòr lvm ínø shvwì móng anglùm rìnvng antibodies rìsvng lúng dá:ngò rvt góng shiqshvn lvm dvpvt nvnnvn mvn shìwe nø gvza vjú vlwe íe.

Wervt nø góng shiqshvn lvm svng lún mvyø we vsvng vrvm nvnnvn mvn shìlvm wàì, vkvt zøm lú:ngì we vsvng rìgø vdèí lúnshìwe dvngtè nvnnvn tiq pvnpvn taq mvn shìweí ténøté

shìqshvn we jèjú svng Lúnlvm dvpvt nvnggùn zí mvyøng we íe.

Kadvling Svra Polo Hpu Ye Dwe