"Cvmrérì svng shøngnī shaq taq nønt shøm dvzvrà we dang"

Dèni lvmvng tiqyø taq vra tiqkvt "Cvmrérì svng shøngnī shaq taq nønt shøm dvzvrà we dang"
tiqdòngce Paqzí dvkøm nø dvshvng lvm íe. 

Vpø'íwe pèmè vnvmchvngmaq American móngdàn taq nø cvmrérì nvng (10) nøng rvzé íwe cvmrérì svng nønt Paqzí nvng sengdø gúndvtøpmò we Paqzí vdè tiqmvdò kèní shønò we nø, shøngnī shaq svng shóngshì we, shøngnī shaq  møtlvm nøntlúm we cvmrérì nø téwa Vgo nøng vrvm we Vsvngrì íe, wanø shønò we vlē. Shøngnī møtlvm tiqpvnpvn svng møtshvngøtshìrì nø dvgá cvmrérì mvdvm nøntdvshà we , nønttin we bøsháò yv'ngkèní lutshì lúnò nø vdèo dvdvmnønt svng gø téwa gārshì lúnòe wàe. Wemvdvmø, téwa yīshì nø dvzaqshì we nønt gø vldárì wa shálúnshìe.

Vbat 6 nøng kèní 18 nøng íwe cvmrérì 232 gø'ò vbat vrvm vlíngrì svng MRI ídímò nø dvtøpmòke, vbvt tiq bvt nvng tiq bvt mà-bóng dø vgonøng vdòng taq tvtwe nvng tiqgø'gø' taq nø dvchōdø ívm nø dvcvmkéòweí tiq gø nvng tiq gø mà-bóng dø vl we svng yvnglúnòe.Gún dvtøpmò we Duqdēdvnaq mvdò taq vbá we cvmré gø' vrvm svng tiqgø kaq vnī nøng tiqboq 3 baq MRI dím dá:ngí àngmaqcèrìò Vgo svng vlíng dø íwe angdangdang svng vchuqnøng dvngtè gùnyàngà wàe. We cvmrérì yv'ngkèní shøngnī svng shóngshì we cvmrérì nø dvgá vwadø vl we cvmrérì mvdvm Vgo nøng téwa shvla we svng yvnglúnshìe, wàe.

Wervt Shøngnī tiqpvnpvn svng møt shèmūnshì lòng nø vgō mvsi shvlá dvzvr we wa mvtaq, vdè nønt mvsøn svng gø øpsháshìlvm rvt ,nønt dvkv'ngshì lúnlvm rvt vjú vl pvn íe. Wervt nøngmaq cvmrécèrì kaq svng gø cvmni kèní shøngnī shaq tiqpvnpvn møt shvngøtlvm nvng tá shvmūnì yv'ng kèní Cvmrérì dvpvt nønt, góng ,mvsøn nvng vgō nøng kaq gvzà vjú vl dø íe wànø, gun dvtøp mvdò Paqzí vderì taqkèní nonggùn zí nø shønò we vlē.

Wervt shóngshøng we vnvmchvngmaq nøngmaq cvmrécèrì kaq svng gø  àngmaq nøntlúm we shøngnī shaq, shøngnī møtlvm tiqpvnpvn taq shvngøt dvtú nø  nonggùn zí gø laq lúni wvng dvman nø Paqzí dvkøm we Mongkà svng yà yv'ng nāròe. 
 Shvngbe svng oqā.

Add new comment

16 + 3 =