Dòbáshí Mvnuq taq Kèní Lúnshìwe Shiqshvn Lvm Dang

Dòbáshí Mvnuq taq Kèní Lúnshìwe Shiqshvn Lvm Dang
 

Dòbapshí angmvnuq taq shiqshvn lvm dang svng vjúzì we dat gvzà vbá rvtnø dòbáshì mvnuq v́mì weí góngshà shiqshvn we

lúnlvm dvpvt shvla we datrì gvzà vbáwe svng shálún shìe.
 

Dòbáshí angmvnuq taq vbáwe dat rìnø vitamin A, vitamin B, vitamin E, vitamin C, vitamin K, dan dat, folic dat, potassium dat,

carbonhydrate, calcium nvng protein dat rì vbáwe v́maq lvm kanyúng tiqpvn íe. Wedø íwe datrì gvzà vbáwe írvt dòbáshí

angmvnuq v́mìninø nvrø̀m shiqshvn lùnge, tì dat lúnshìe, sílán jóng taq vna gònglvm svng vgámàràe, vzàjè we vjúrì svng lúnshìe.
 

Dòbáshí angmvnuq taq mòng dat vbárvtnø pvwájat we mvbø̀n, dvshaq ígø svrí mvshìra. Vránø calorie svng shvyúmà wemvtaq

vitamin C, vitamin B, vitamin K, vitamin A, vitamin E, dàn dat, folic dat, potassium nvng magnesium datrì vbáwe írvt góng dvbø̀

lvm svng shvyúmārawe íe. Svyø vdúng dvshvn dvshvr rae.
 

Sílán jóng taq vna yógà angmè gòngnø vna bø̀ndaq ke dòbáshí angmvnuq svng shøpmò we angtì nvng meqlin chìn angtì svmaqcè

zángò nø aqò ke shvnwace zǿmbàn vjú vlwe íe.
Dòbáshí angmvnuq nø góng vkvtshìwe svng gø shvyúmà raweí tì dat rìsvng gø shvdúnàe. Wervt nø dòbá angmvnuq svng ràngtúng

gvzà vkvt shìwe rvtø rìtaq v́m aqò nìnø cígwit nø v́lbyò we íe. Vránø shvná shvwì vyø̀we nvng nǿnggøp vdùng taq zøtzøtwe svng

zǿmbàn lvm dvpvt dòbáahí angmvnuq v́mlvm waì. Nvrø̀m shiqshvn lvm dvpvt gø gvzà vjúzì we íe.
 

Dòbáshí angmvnuq v̀mwe nø vgomvcì nvng dvjù rìsvngshiqshvn dvzvr we choline dat vbá rvtnø mvzø̀ng shìlvm nyàn vlnø vgomvcì

svng nvnggùn zìwe nvng nønt mvcø̀n shiqshvn dvzvr we lúnshìe. Ye dat, dvjá dat nvng crabohydrate dat rìsvng nvnggùn zíòe.

Protein nvng dvgá v́m aqlvm pv̀n rìtaq vbáwe datrì írvt góng sha dvpvt gvzà vjú vlwe tiq pv̀n íe.
 

Dòbáshí angmvnuq yalòng nø shiqshvn lvm nvng gvzà vdūvbúng we írvt vsvng té mvlòngí shòngì we v́maq lvm kànyúng kànyv̀ng

tiqpv̀n gø íe, wedø ínigø dòbáshí angmvnuq nvng màbúng we datrì gø vlwe írvt màdù rìgø bǿnshá shìe, dat màbúng we vsvng

rìnø v́m màdù we íe. Vsvng vrv̀m ígø nivrv̀m v́m aq lvmnø  mvdaq we tiqpv̀n íe wàng dvtit dvle dvshvt mvyǿng we íe.

Shvngbe kaqsvng pàmvra.