Døngku pè la í døngku mè la kaq svng pàwálvm kv'ng vtù è má?

Dèni døngku lvmang tvyø taq døngku pè la í døngku mè la kaq svng pàwálvm kv'ng vtù è má? wàwe Kà vgo tiqdòngce taqkèní sharing zí mvyøngè.

Døngku lvpat 10,20,30 nøng vlé rà dvgvp døngku pè la ínø døngku me la kaq svng gwú:rò rvt døngku mè la í gvzà nønt yòr nønt dvt lvm bø'n sháòe.Nøngmaqò shvnvng taq gø yadø bø'n we yv'ng lúnshì dø tiqdvchá Shvngkà ètá nøng we vnvmchvng rì taqgø yadø bø'n we svng yv'ng èlún nøng na íe.

Tiqmaqò døngku me la taqkèní nø àngdeò døngku pè svng control wàò we yv'ng lúnshìe. Vsvng mvngpòng taqø mà yáshi øp nø cømō we svng yv'nglún shìe.

Kàgø'gø àngdeò Nønt mvsøn tiqgóng svng øp we mvshú:ngshàì. Døngku lvpat àngshvr shóngnønt dv'n zø'ng we rvtø taq control wá shvlàe. Íni gø døngku lvpat mvmè vlé ra kvt tønzv'n nønt rì mà-vl. Døngkume la tiqmaq nø døngku pè svng gvzà øp mvyøè.

Shòlaq gūchang dvgvp shóngnønt àngshvr nà zø'm we rvtø taq nø øp lúnshì nigø, døngku lvpat mvmè vlé ra kvt nø control wá nø màtu we íe. Døngku pè taqkèní shøl nø wà lvm rvtø íe. 

Døngku me la døngku vdòng taq gvzà vbāmshì we angpvnpvn bø'n rà dvgvp døngkupè la ò shóngnønt nø wè yv'ngkèní love die bø'n sháòe.

Døngku lvpat 10 20 30 nøng høq a:tnò dvgvp døngkume la téka nø sex nvng singdø yúm we Dak lúnshìe. Side issue pà íe. Jøngjø'ng nø døngkupè la dvpvt yalòng control issue nø mvdøng tiqlòng íe.

Døngkupè nvng dongkume vdòng tiqlòng wa íwe intimacy jøngjø'ng vzø'm lvm lòng íe. Yalòng nø døngku me la taqkèní wa intimacy vzø'm lúnlvm ràwe íe.

Tiqkvt kvt shóngnønt shagóng vzø'm lvm dang taq yùm we vhøm vtù ra dvgvp relationship v-toq v-tip lvm dang taq vcat sháò we gø vlē. Døngku me taqkèní àngdeò døngkupè mvdvmø yùm we angpvnpvn gvzà lúq rà nø, mvzv'n lúngò dvgvp døngku vdòng kèní léshì vtù we íe. 

Døngku lvpat 10, 20 nøng høq a:tnò kvt døngku me la kèní dvgá døngkupè la nvng shvbóngò nø shvyø'm we shøn sháìe. Døngkupè la nø àngde taqkèní vlún dv'ngte Nønt mvsøn tiqgóng nònggùn kūngà shaq kèní dvzaq dvgvngshì we íe. Wervt gvzà Vpø rà we íe. Døngku me chip kèní positive mental ku dvdvm nø Dak vtù, shøn vtù rà kvt, wè døngkume kèní léshì lvm nø gvzà yòr we íe.

Téka nø døngku, mà shvzøngshì we vzàng nø Vgo kèní hí høqshaq shvnvp shìe. Døngku lvpat 10 nøng høq a: tnò dvgvp nø àngdeò góng svng shvnvp shìlvm dang taq gvzà nònggùn mvzíshì we luqè. Tiqmaq nø døngkupè la í shvgùn lvm gø mà-vl høqshaq bø'n we íe.

Wervt døngku me la gø vl we góng gwá belaq rì taqkèní  shàngshàng wā dvcøpshi nø gwá shì lúnlvm gø gvzà vchvk ngè. Lvngaré rì nø àngmaq nē yv'ng yvng vnvp lvm lòng gvzà shóng we íe.

 Døngku lvpat svng egòng bø kvt dvdam nønt màbóng we gø vl vtue. Banchvk rì búng lòng dvgvp Ja gvmsung dang taqkèní vshvt lvm gø vlē. Inlaws rì rvt vshvt we, Nø gvzà aq rvt vshvt we gø gvzà bø'ne. Vrá nø sex rvt gø døngku vdòng vshvt we gø gvzà bø'ne.

Yadø íwe Kà Vgo rì rvt dvdàm Nønt màbóng nø vshvt lvm rì bung lòng dvgvp kadø parvnà lvm í má?. Døngku lvpat tiqlòng svng gvzà shvla dø vrāng lúnlvm gø gvzà yvk we íe. Ngàò døngkupè nø yadø íe, wànø gùngkéò nø shøn lòng nø vshøng màshø'ng íe.

Wervt vpø íwe vnvmchvngmaq,Yadø bø'n búng lòng dvgvp Nønt tø'ng we tiqgø'chip ku taqkèní vrashì ra íe. Yalòng Kà vgo lòng svng gø mvzøng shàì nø vzàng kaq àngdeò døngku lvpat svng téwa vháng vlún dø vrāng shì laqlúni wvng sharing zi we mongkà svng yà yvng na:ròe. 

Shvngbe í Gvray mongzøl we døngku lvpat svng vtōshì laq lúni. Shvngbe svng Oqā.