Gvray Mongka - 1st Week of Lent 2022

Sataní Yesu dvlø:tnò we

Yesu nø Shànshér Pvlàcè dv̀nzø̀ng taqsórí Yordan tìwàng kèní vtv́ng ráì ke, Shànshér Pvlàcèí rvgaq mvgūng svng vbìcé ni shøl bǿà kvt, a Sataní Ang svng dvlø:tnòe.

Wenila taq Ang nø pàgø màv́m v̄l nø svríshi lú:ngì. 3 Wekvt Sataní Yesu svng, “Nà nø Gvray Angcè Pè èí kvt kèní nø, lóng yachv̀ng svng zidòng lví long dø dèká:mò,” a:lòe.

 Yesuí ang svng vtà:ngò nø, “Vsvng nø, zidòng kèní wa cúnshì we mø̀í, wa nø vrūshaq íe,” a:lòe. b  Sataní rá Ang svng vháng ram svng shø̄:lò nø, móng dø̄ngtáng shvngbe Ang svng tiqlvngcè shvya:ngò sórí;  Yesu svng a:lò we nø, “Móngdàn yarì øplv́m vmíng vkv́ng gø, werì dvgùng gùngshv̀ng shvngbe gø, ngàí Nà svng zílv́m íe.

Kadø íe wani yarì nø ngà svng tvleshaq í rvtnø, kagǿ svng zí mvyǿngnøng nø zǿngòe.  Wervtnø̀ Nàí ngà svng køtngǿm ènokngànø̀ng nø, yarì shvngbe nø Nàò èía longe,” a:lòe.  Yesuí vtà:ngò nø ang svng, “Nà nø Vkàngpè nà Gvray kaq ènoqò nø, Ang svng wa dvzø̄m ràe, wa nø vrūshaq íe,” a:lòe.

Wekvt Sataní Ang kaq Yerusalem wamà svng shøl bǿà nø, noqngø̀m Tø̀ngnø zòngmuq yv́ng shvri:pmò dá:ngí, “Nà nø Gvray Angcè Pè ni èí kvt kèní nø, Nà yayv́ng kèní dèjáshìv̄m.  Kadø íe wa nìnø, ‘Vkàngpèí Ang dvzv́rrì svng nà dvpvt dvká:mò nø, Nà svng ègar daqe.’ d Vrá, ‘Nà hí nø lóng taq màtøplv́m dvpvt angmaq wū:rí nà svng nàbúm daqe,’ wa nø vrūshaq íe,” a:lòe.

 Yesuí ang svng vtà:ngò nø, “Vkàngpè nà Gvray kaq nàí dvløt mvdaq, wa nø vrūshaq íe,” a:lòe. e 13 Satan nø, a:ngí dvløtlv́m rì dvbé bǿà kvt yuqyà we rvtø̀ cāò nø Yesu yv́ng kèní yilshìá:mì.