Gwe V́:mì we Taqkèni Lúnshì we Shiqshvn Lv́m Vjúrì

Gwe V́:mì we Taqkèni Lúnshì we Shiqshvn Lv́m Vjúrì

Gwè svng mònggv̀n vrvm shvra shvgu taq kvt v̀mwe svng yv́nglún shìe. Nøngmaq Myanmar móngzølcèrìí gø lvdat angdang
dang ku wav́:mì we íe. Nøngmaq Rvwang dvcicèrìí nø v́mpà nvpv́m lvm kvn tì køtv́m we dang taq mvdøng køt v́:mì we svng
yv́ng lún shìe. Wedø nøngmaqí køt v́:mìwe rvtø taq mvdǿm mvsháì we ínigø góshà shiqshvn lvm dvpvt gvza vjú vlwe dang
svng yv́ng lúnshìe.

Gwè taq góngsha dvpvt vjú ziwe dat rì vbáe, werì nø carbodydrate, lvngcha sóy dat, moega-3 fatty acid, omega-6 fatty acid,
phosphoeus, potassium, sodium nvng selenium dat rì vlwe svng shálún shìe. Gwè svng v́:mì nø lúnshì we góng shiqshvn
lvm dang nvng nø gún dvtøp lúnshì we taq

(1) Cancer vna mvbø̀nlvm dvpvt vgv́māra we - - Gwè yv́ng nø vitamin A, vitamin C, calcium dan dat, magnesium,
phosphorus,potassium, sodium nvng antioxidant dat rì, gvza vbáwe írvt góngshà dvpvt nònggùn lúnshì rvtnø cancer vna
nvng sing we cere dvkérì free radicals rìsvng dvshv̀n dvshv́rā rawe íe. Gwè taq vbáwe Cryptoxanthin nø rvshú cancer ( vsok
cancer) nvng nǿnggøpcancer bø̀nra we svng shvyúm lúnòe. Wervt nø cancer vna bǿn dvzv́r we svng vgv́mlùnò we v́m aq
lv́m kànyúng kànyàng tiqpvn íwe svng shálún shìe.

(2) Síchù, Dwíchù vna mvbø̀n dø vgv́m rāwe dang – Gwè yv́ng vbáwe datnø góngshà vdùng insulin nvng glucose datrì
svng ang mvrim nang vdū vbúng dø kángzí:ngò rvt síchù, dwíchù vna bø̀nra we svng shvyúm lúnòe.
(3) Nvrø̀m shiqshv̀nē – Gwè taq vbáwe potassium dat nø shvwì dvjù nvng nvrø̀m shvwì ang dvjù rìsvng shvnvl we svng
vgv́mà nø shvwìò bvnli waò we dang svng dvbv:ngò rvt vgo mv́cì té shvla dvzvr we íe.
(4) Nē shiqshv̀ne – Gwè taq vbáwe beta carotene, cryptoxanthin nvng antioxidant rì, vbáwe írvt dvjùrì kánglvm nvnggùn
lúòe.
(5) Shàgóng nvng shvwì shiqshvn we – Gwè taq vbá we vitamin E nvng vitamin A rvt gwè v̀mwe vsvng nø shiqshvn weí
góng mørshø̀m vnvpe.
(6) Shvwì dvjù shiqshvn we - Gwè yv́ng vbáwe dan dat nø shvwì nonggùn mvyúm dø vgv́mò nø shvwì dí tvra dvjù vdúng
taq dvshvn dvshérò we mvdøng tvra svng dvbvngpò we íe.
(7) Poqkè shiqshvne, wervt gwè v̀m wenø v́mgv̀m wervt wa v̀mwe mvínø, shiqshvn lvm dang nvng sing nø gvza vjú vlwe
kànyúng kànyvng tiqpvn gø íe.

Wedø ínigø shvngkà etá nøng we vpǿwe pè/mè maqí eshá nøngdø tiq dvchá vyá shìra we tiq dang vlwe svng dúm rae. We
dang nø calorie gvza loq we rvt íe. Gwè gram (100) taq calorie (112) vbá rvtnø (weigth) góng shvyúm shì mvyǿ we vsvng dvpvt
nø dvdvm ràe. Calorie gvza loqwe írvt shvdún shvrám màvl nø gvza loqdø v̀mwe íninø góngshà dvpø̀ nø weigth detlvm wa íe.
Wedø ínigø shvdún shvrám v̀mwe mvíninø, góngshà shiqshvn lvm dvpvt lún vdùwe zidang chávle ninø vjú màvl, wervt nø shv
dún shvrám v̀mweí shiqshvn we vjú lúnshì daqe wang, nøngmaqí rvtø vrvm v̀mwe gwè taqkèni lúnshì we shiqshvn lv́m vjú rì
nvng sing nø dvtit dvle we íe.