Kvmnønt shvdiq shì we shànshér vsvngrìò talen Bārvmì (jìkzìng) Dvla mvtú (22) mvtú taqkèní tiqdòngce dvtit tvle nø dvshvng lvm íe. Tá nø nònggùn lùshì lvm wàì.

Dèni Døngku lvmvng tvyø taq vrá tiqkvt, Kvmnønt shvdiq shì we shànshér vsvngrìò talen Bārvmì (jìkzìng) Dvla mvtú (22) mvtú taqkèní tiqdòngce dvtit tvle nø dvshvng lvm íe. Tá nø nònggùn lùshì lvm wàì.

Vpø íwe pèmè vnvmchvngmaq,  Shànshér Vsvng (Saint) wàwe nø Àngmaqgø, nøngmaqdø danmàn vsvng tiqgø' ni íe. Íni gø shànshér vsvng bønlvm, dvciq lvpat gønshaq lúnlvm, cúnshì we lvpat taq Kvmnønt shvdiq shì we dang rì nø,
(1) - Shànshér vsvng nø Àngwa Vsvng mvdvm téwa Gvrayí zi we talen svng shvmún shvjang shi nø nònggùn lùshì gø', íe.

(2)-Kvmnønt shvdiq shì nø svngpvn ma rvwèng Pvlàcè shagóng Chutchvng we tvrà taq rīn vrá vpnóngshì gø' íe.

(3) - Àngwa Vsvng mvdvm mònggvn rvgaqtøm pø'yá, zaqshøp rì svng shvlàng lúnò gø', íe.

(4)- Àngwa Vsvng mvdvm Gvray bvnlìrì taq cìpshì nøntni vpnóngshì gø', íe.

(5)- Àngwa Vsvng rì mvdvm tiqdvr vsvngrì kaq mvkok dvdi nønt dvnzøng gø', íe.

 (6) - Àngwa Vsvng mvdvm Gvray kaq shóngshì gø', íe. 

(7) - Àngwa Vsvngrì mvdvm àngdeò Nønt shvrúng lòng svng øpshì lún gø',  íe.

(8) - Àngwa Vsvng mvdvm tiqdvr vsvng kaq sí:ngà dvdvma dvsházā  lún gø', íe. 

(9)- Àngwa Vsvng mvdvm Dìngman tvrà taq shìlvm lòng svng mà shvre gø', íe.

(10)- Àngwa Vsvng mvdvm lvpat gønshaq svng shóngshì gø', íe.

(11) - Àngwa Vsvng mvdvm Gvray Dvrà Mongkà rì svng shvdiq shì gø', cvndvgøm gø', íē.

(12)- Àngwa Vsvng mvdvm Gvray kaq vlømshì nønt dvnzøng gø', íe.

(13) - Àngwa Vsvng mvdvm ìshøt igvn jèjú dvrá rì svng cíngràl nø dvnungò gø', íe.

(14) - Àngwa Vsvng mvdvm Dvrá Mongkà svng cvndvgøm nø shvdiq shì gø', mònggvn dvpvt vjúrøt gø', íe.

(15) - Àngwa Vsvng mvdvm Dìngman dvrá, tvrà svng láò 
gø'  íe.

(16) - Àngwa Vsvng mvdvm Kà ta nø Nønt mvsøn mvngsher gø'  íe.

(17)- Àngwa Vsvng mvdvm mà:pnønt sher gø' íe.

(18)- Àngwa Vsvng mvdvm cìpshì lún gø' , Nønt køn nøntshvlá vl gø', íe.

(19)- Àngwa Vsvng mvdvm Dìngman lòng svng shóngshì gø' , Tiqdvr Vsvng mongzøl lòng vto dvzvr mvyø gø íe.

(20)- Àngwa Vsvng mvdvm mvdìng mvmàn lòng svng vchàng dvtan nø shøn lúnò gø' , íe.

(21)- Àngwa Vsvng mvdvm Dìngman lòng svng shvrúng gø', íe.

(22)- Àngwa Vsvng mvdvm vzaqshì nø kaciqrì vpø shì gø', Kvmnønt zaq gø' yadø í rì íe.

Vrá nø, Vpø íwe pèmè vnvmchvngmaq Gvray gvsangò Dvrá Mongkà, Vkangpè Yesuí vrang bø'à we Chutchvng we (Sacramentu) jèjú kùmlà Pvlàcè "Dvla" rì vdòng taqø Kvmnønt shvdik shì weí dvtánò rì, Muqlang móngdàn Paratisu kaq svng góng lún bøā we Kv'm vsvng Shànshér vsvngrì íe.

Wè dø tiqdvchá nøngmaq rvzvngcerì gø'vrvm taqkèní gø cúnshàì we lvpat taq Gvray gvsangò Dvrá Mongkà Vkangpè Yesuò Chutchvng we tvrà Sacramentu jèjú kùmlà rì, Pvlàcè Kvmnønt "Dvla"rì, taqkèní Shànshér vsvngrì dø Kvmnønt shóngnønt shvdikshì weí øpshì lúnì kvtnøJø'ngjø'ngni nøngmaq gø'vrvmì gø dvciq lvpat gønshaq lúnlvm vlē, Gvray Jórpòngbang svng dvtán lúnlvm vlē wadang svng dvshat weí vrashì nø nònggùn mvyøngè. Shvngbeí Gvray ìshøt, Gvray mongzøl lòng vtoshì laqlúnì. Shvngbe svng oqā.