Kvnka shi cvp vju’ vlwe Dang.

Kvnka shi cvp vju’ vlwe Dang.

Kvnka shi nø kan køt vm shvla we tiq pvn ie.Wedø i’ni gø kvnka shi cvp svng nø vm sha we vsvng gvza mvluq we svng shálún shìe. Vmsha we vsvng rì

dvpvt nø kankøt vm shvla we íe. Kvnka shí, kvnka cvp nø kawe tiqpvn írvt nø kvnka shí wenø tǿò we íe.

Kvnka shí angcvp nø shiqshvn lvm dvpvt gø vjú vlwe vmaq lvm tiq pvn íe. Kvnka shí cvp taq vsvng góng dvpvt gvza vjú zìwe dat vbá we svng shálún shìe.

Kvnka shícvp taq vbá we dat rìnø carbohydrate dat, protein dat, vtamin k, vtamin B6, vtamin B9, vtamin B2, vtamin C nvng dan dat, calcium sat, phosphate

dat rì íe.

Kvnka shícvp vmwe nø góng sha shiqshvn lvm dvpvt kadang tè vjú zìwe svng gún dvtøp lúnshìwe nø -  (1) Cìzø̀ yóga (sichu) svng vgáma ràe. Kvnka shícvp

svng køt vmwe ínigø, angtì cøpmò we ínigø cìzø̀ vna svng shvyúm lún shìwe nvng cìzø̀ vna mvbø̀n lvm vgv́mà rawe íe. Kapvn rvt ímá waninø, kvnka shícvp

taq nvmwè pvn zø̀we dat vba rvt íe. Gv̀ng jat vna bønwe ínigø kvnka cvp nvng shvban svng angshì dǿlò nø gønshú shìwe cì, svng kwátì nvng shú dá:ng

í paqká aqdø ni aq shvlae, Tìshù nvng cø̀nò nø aq gø shvlae. Góng vkvt shìwe gø cøme.

Vrá nø vdéyòng vdawa vna zarì té mvza lvm dvpvt kvnka cøp svng vmò ke shvlae. Cvmìí vkvt we dvmmá rìsvng gø kvnka shí cvp svng angshì vzøpmò nø

dvmmá yv́ng shvgvpmò nigø shvlae. Hǿ, wur rì vkvt shìlùng kegø wedø ni tiq dvcha kvnka shícvp angtì svng záò nigø zǿme, we rvtnø kvnka shí nvng

kvnka angcvp kvn shvlá, cì, shvlá vtvng we tiqpvn íe.

Wervt kvnka shí angcvp svng tiq lvbán vdùng taq vní kvt, vshø̀m kvt dv́ngtè v́mlún shìíni nø góng shiqshvn lvm dang dvpvt gvza shvla we svng nøngmaq gǿ

vrvmí shá vdu we íe. Kvnka shí angcvp svng angshì dǿlò nø shøpmò we svng aqò nìnø cvyø̄ vdúng svng dvshvrò nø mvshvla mvgvm vna rìsvng dvshvrò

we íe.

Kvnka shí angcvp nø cì, cvp tiq pvn ínigø kvnka cvp vmnø shiqshvn we dang dvpvt vm màvdù we vsvng rìgø vlwe íe. Werì nø cvmré góng íwe angmè rì,

nvlúng yóga vlwe vsvng rì, poqkè vna vlwe vsvng rì, vkvt kvt poqwá zàwe vsvng rìnø kvnka cvp svng màvm nìnø téwa shvla we íe. Bat tut vm mvdaq we

nø mví, vdèò góng shiqshvn lvm dang svng yv:ngò nø vyá shìwe nø shvlá vtvng we íe.

Shvngka tashìnø nvnggùn èzí shawe shóngshøng we pèmè vnvm vchvng maq vsvng mèmeí shini vm masháò we kvnka shí angcvp svng vjú vl dø vm we

íni nø cì, shvla we kvnyúng tiq pvn íe. Kàwe tiqpvn ínigø we kàwe dat nø vm gvm we tiqpvn íe. Wervt nø kvnka shí angcvp nvng màdu we vm madaq we

vsvng rì taq kèní ján nø, dvgá vsvng rì dvpvt nø shiqshvn lvm dang svng gvza vjú vlwe vmaq lvm tiq pvn íwe svng shá dvzvr mvyǿng we íe.