" Mongkà Shvngøtshú Svrarìò Mongkà Mv-ngù (Retrieve) Pvlàcè kvmnønt nònggùn kūngà lùshì we dang "

" 2022 nøng Mongkà Shvngøtshú Svrarìò Mongkà Mv-ngù (Retrieve) Pvlàcè kvmnønt nònggùn kūngà lùshì we dang "

 

Dèni lvmvng tvyø taq nø tiqnøng taq tiqbaq  Mongkà Shvngøtshú Svrarìò Mongkà Mv-ngù (Retrieve) Pvlàcè kvmnønt nònggùn kūngà lùshì we dang tiqdòngce dvtit tvle lvm íe. Vpø íwe vnvmchvngmaq, 
Putao Jau Gwørwang me vdòng mvring rvwá vrvm kèní Mongkà Shvngøtshú svra rìò Mongkà Mv-ngù ( Retrieve ,Wutsawk) vjúrøt lìpong svng (Oct 9ni 8:00pm kèní -12 nī Vshøm nī tøp ) wáshì bø'ì. 

 

2022 nøng Mongkà Mv-ngù ( Retrieve ,Wutsawk)taq Svra rì shvngbe (17) gø kømngø'm ráì we taq Myitkyina kèní shvrúngshú gvba Msgr.Dr. Peter Hka Aung Tu í shøl nø St Anthony Noqngøm chøm taq vshøm ni døp cúnshì we Gvray gvsang móngkà taqkèní dvshvt we nònggùn zi we wà bøā. Vkvtdø Shvngøtshú Svra rìò Mongkà Mv-ngù (Retrieve, Wutsawk) Pvlàcè kvmnønt nònggùn kūngà lùshì we tvyø taq Vsháng tut, ( 8:30-10:00 am ) høq Mongkà (1) rvtø dvshvt we cvnshì we wáshì nø Vyang ( 10:30 - 12:00 am ) høq Mongkà (2) rvtø ( ထောက်ရှု) dvdvm vjáng nø cvnshì weí Pvlàcè shagóng kvmnønt nònggùn kūngà lùshì we wáshì bø'ì.

 

Dørøm tut rvtø taq nø, (1:00-2:00 pm) rvtø høq Vkangpè Yesu Hkristu dvshà mvhøt vtù vrè shat vhø'm yangà we Chutchvng we Vkangpè Yesuò wurgang tvrà (14) dang svng dvdvm só:rì vjúrøt we wáshì bø'ì. Vrá zvndvtut Rosary rø nø Gvray gvsang lvpkà, dvkvm kà rì svng dvdvm cvndvgøm nø Gvray Angmè wur taqkèní vjú røt tvle we tvyø rì svng gø  vkvtdø vshøm ni døp mongzøl dø wálúnshì bø'ì. 

 

Lvngdøm ni taq nø Vkangpè Yesu Hkristu dvshà mvhøt vtù vrè shat vhø'm yangà we Chutchvng we Vkangpè Yesuò wurgang tvrà (14) dang, Gvray gvsang lvpkà, dvkvm kà rì svng cvndvgøm nø Gvray Angmè wur taqkèní Rosary rø vjúrøt tvle we, Vkangpè Yesuò Shànshér we Kàgvp (Chyoipra hkum) yv'ngø Nøngmaq Myanmar móngdàn mongzøl lúnlvm dvpvt, shvngømré Sasvna vháng vlúnlvm, shvngømré rvzvngcerì, dvcìpvnrì shvngbe vzø'm vzà:mp weí mongzøl dø vl lúnlvm Shvrúngshú pè Msgr.Dr.Peter Hka Aung Tu í vjúrøt shvmvn dvgøng  nø vjúrøt dvtøm dvtv'ngshì bø'ì.

 

We mèpvng Gwørwang øp shvrúngshúpè John Hpung Shang Awng Htoi taqkèní gø shvrúngshú pè Msgr.Dr. Peter Hka Aung Tu kaq svng oqā wàwe í Tong hkring vmpa døngjá taqkèní gø shvring we wáshì bø'ì. Lvngdøm taq Mongkà Shvngøtshú  Svra rì vní mvdò vwálshì nø mvchvngboq Myoqnē , Putao Myoqnē taq vl svra rì bōlóng dóweí vzø'm vzà:mp we bvnlì svng gø vkvtdø nvmlat (1) boq  mongzøl dø wálúnshì bø'ì.

 

2022 nøng, Shvngøtshú Mongkà Svra rìò Mongkà Mv-ngù (Retrieve) taq Gvray i zi we, go we bvnlì talen tvle we taq Vkangpè Yesuò dvzvr rì dø, Kvmnønt zaq we Shànshér vsvngrì dø Gvray bvnlì Sasvna dang vrvm taq dvgung vl dø cìpshì we shóngnøntni kvmnøntní zømshì nø dvzaqshì lvm, Kvmnønt tvrà taq Vpø vtv'ng íwe Shànshér we Vkangpè Yesuò Kàgvp (Sakramentu) nvng Rosary Gvray lvpkà , dvkámkà taqkèní vjúrøt dvzaqshì nø cvndvgøm taqsó:rì Shagóng Pvlàcè kvmnønt nònggùn kūngà lùshì nø cúnshì lúnlvm gvzà vchvk nge wā dvkvme.

 

Wervt vpø íwe vnvmchvngmaq, Vtoshì lún bø'shà we kvmnønt tvrà taq Gvray gvsangò móngkà dvrárì í øpshì nø dvzvr rì dø, shànshér vsvngrì dø shvbóng shvmvtshì nø v-lì we shvra, zømshàì we bvnlì dang vrvm taq cìpshì we kvmnøntní shóngnøntní nònggùn lùshì nø, cvndvgøm nø shvlá vtv'ng cúnshì laqlúni. Shvngbe svng oqā.

 

Add new comment

10 + 1 =