Shóngshøng we pèmè vnvmchvngmaq shvngbe svng pàmvrà.dèni vrá tiqkvt nø vhøm nø mv-ngushìe wàwe tvrà nvng mongzøl lòng wàwe tvrà svng tiqkvt dvdvmshi lvm wàì.

  Shóngshøng we pèmè vnvmchvngmaq shvngbe svng pàmvrà.dèni vrá tiqkvt nø vhøm nø mv-ngushìe wàwe tvrà nvng mongzøl lòng wàwe tvrà svng tiqkvt dvdvmshi lvm wàì.

  Yarvgaqtøm yv'ng nø vhøm nø mv-ngushì we tvrà mà-vl ninø mongzøl lòng lúnshì we tvrà nø kàyv'ng gø mvyv'ngshì we tvrà nøngmaqí shálún shì we tvrà dvdvm lúnshì we tvrà shìe. Dvdvm shvla e. Tiqgø' nvng tiqgø' vhøm nø mv-ngushì yv'ngkèní wā mongzøl nø kømzøp we shóngnønt tvrà rì svng gø lúnshì we tvrà íe.

Gvrayí nø lvngaré svng pànmvnò mèpvng Svmaré svng vrá pànmvnòe. Yalòng taqkèní Gvray àngò shóngnønt svng  nøngmaqí nø zvmi shvzøngè wàwe døngku vdòng taqkèní Gvrayò shóngnønt svng dvtán shìe.

Yadø døngku vdòng taqkèní angpè angmè rìí Gvrayò shóngnønt tvrà svng dvtán we tvrà yv'ng dvshà mvhø't vhø'mshì we, mvbyo we rvtø vrv'm taq íni gø tiqgø'nvng tiqgø' tasvng vpø we mv-rà vchutkè we, mv-ngushì we, shóngnønt taqkèní nønt shvyang shì we taqkèní nøngmaq nø yàdø Gvray àngò shóngnønt svng dvtán shì we døngku yv'ng gø yv'nglún shì we tvrà íe. 

  Íni nø yadø nøngmaq vhøm nø mv-ngushì we tvrà nø Vsvng lìpòng vrv'm yv'ngø gvzà vchvk we tvrà tiqlòng íe. Døngku taq døngku vdòng yv'ngø vhøm nø mv-ngushì lòng nø gvzà vchvk ngè. Welòng yv'ngkèní døngku vdòng mongzøl lòng lúnshìe.

Vrá shvngømré vdòng yv'ng íni gø, Vsvng lìpòng tiqmé nvng tiqmé yv'ng íni gø, tiqgø'nvng tiqgø'vdòng yv'ng íni gø vhøm nø mv-ngushì we tvrà yv'ng kèní shóngshì we, nønt shvyang shì we angpvnpvn dvkøm shì yv'ng kèní mongzøle walòng svng lúnshì we tvrà svng dvdvm rø'nshì we tvrà íe. 
 

    Íni, Vhøm nø mv-ngushì we tvrà mà-vl ninø kadvgvp dìngman nø mongzøl lòng nø mà-vl. Nøngmaq rvgaqtøm yv'ng yvnglún shì we (Weyaland) wàwe vjánbyetmū rì, mvjàn rì tiqgø'nvng tiqgø' gvshvt we tvrà rì, tiqgø'nvng tiqgø' dvshà mvhø't we tvrà rì yàri gø lvngdøm yv'ng nø àngmaq gø vhøm nø mv-ngushì we tvrà svng àngmaqí gø dvtánshì we tvrà íe.

Kàyv'ng gø mvjàn gvshvt lòng yv'ngkèní dìngman we mongzøl lòng svng yv'ng mvlúnshì. Lvngdøm yv'ng nø vhøm nø mv-ngushìe  wàwe taqkèní wā mongzøl lòng àng mvtú svng lálúnò we yvng yv'nglún shìe. 

    Wervt nø yà rvgaqtøm yv'ng Vsvng tiqmaq nø vhøm nø mv-ngushìe wàlong svng mvshóngshì vsvng gø vlē, tiqmaq nø vhøm nø mv-ngushì yv'ngkèní dìngman we mongzøl lòng svng shvzøng lúnlvm dvpvt shóngshì rì gø vlē. Wervt yadø vjánbyetmū rì mvjàn rì taqkèní dvgá rì svng jórè wàwe rvtø taq yalòng nø tiqlvngcè dvpvt wā íe. Mongzøl lòng taqkèní jór lún we tvrà mø-í walòng svng yv'nglún shìe.

Wervt nø kadø íwe rvtø taq íni gø móngdàn nvng sing we tvrà, shvngømré nvng sing we, Vsvng lìpòng vrv'm nvng sing we, døngku, tonglaqya angpvnpvn nvng sing we tvrà yv'ng íni gø tiqgø'nvng tiqgø' jøngjø'ng vhøm nø mv-ngushì yv'ngkèní wā yvnglún shì we vpø vtv'ng we àng mvtú mongzøl lòng svng gø nøngmaqí lúnshìe wàwe svng nøngmaq dvdvm lúnshì we tvrà íe. 

     Wervt vhøm nø mv-ngushìe wàwe rvtø taq àngde nvng vsháke we rvmnang rì, angri angrvprì nvng wā vhøm nø mv-ngushì we tvrà mø-í. Àngde kaq shvngóshì we, mvshóngshì we, mv-wámshì we tiqdvr vsvngrì nvng vhøm nø mv-ngushì lòng nø àngmaq svng vtōshì lòng nø mø-í. Àngmaq nvng tiqdø tará mv-ngushì yv'ngkèní wā døngku vdòng, shvngømré vdòng Vsvng lìpòng vrv'm yv'ngø mongzøl lòng vlē walong svng dvtán lúnlvm dvpvt gø íe.

Wervt vhøm nø mv-ngushìe wàlong svng tiqni tiqbaq wā wàlvm dvpvt gø mø-í. Cúnshàì we tvrà rvtø lvpat vrv'm kèní vhøm nø mv-ngushìe walòng svng nø angpvnpvn taqkèní wárà lòng íe. Døngku tiqlòng vdòng yv'ng gø tiqni tiqbaq wā vhøm nø mv-ngushì we svng wáshì we wā mø-í.

Døngku tiqlòng yv'ngø rvtø vrvm mv-ngushì nø wáshì weí cúnshì dø tiqdvchá lìpòng rì vdòng yv'ng íni gø, móngdàn vdòng yv'ng íni gø, shvngømré vdòng yv'ng íni gø vhøm nø mv-ngushìe wàwe taq shvlá vtv'ng dø dìngman vtv'ng dø wáshì we taq gvrayí nø rvtø vrvm mongzøl lòng zìe walòng svng yv'nglún shìe.

      Wervt nø lvknak rì nvng gvshvt we tvrà, vjánbyètmū taqkèní dìngman we, shvlá vtv'ng we mvtúrì svng lá mvlúnshì. Yàdø íwe rvtø taq nònggùn vl nø lvknak lv'ng we vní mvdò nø kadvgvp gø gvshvt we  rvtø taq àng mvtú àng lvjøm mà-vl we tvrà svng yv'nglún shìe. Wervt nø shóngshøng we pèmè vnvmchvngmaq vhøm nø mv-ngushìe wàlong nø Gvray shóngwámshì we tvrà tiqlòng íe.

Àngde nvng shvngóshì rì àngde kaq mvshóngshì rì kaq íni gø vhøm nø mv-ngushìe wàwe taqkèní mongzøl lòng vlē walong svng dvtánshìlvm dvpvt íe. Yalòng nø Gvray gø kadvgvp mà dvgvp shóngshì we tvrà tiqlòng íe walòng svng rvtø vrvm dvdvm rø'nshì we tvrà tiqlòng íe.

Dvgá dangrì taqkèní nø dìngman we àng mvtú, dìngman we mongzøl lòng mà-vl, v-jánpyetmū, mvjàn rì taqkèní nø dìngman we mongzøl lòng svng yv'ng mvlúnshì. Dìngman we mongzøl lòng svng nø mvshóngshì we shvngóshì we Vsvngrì íni gø, shóngshì we Vsvngrì íni gø mv-ngushì we, vhøm nø Kà shøn we taqkèní wā dìngman àng mvtú svng nøngmaqí nø yv'nglún shìe. Mongzøl lòng gø lúnshìe walòng svng dvdàm lúnshìe.

Mèpvng vrá dvtut tashìlvm wàì. Shvngbe svng oqā.