" Shvngømréò dvrá (6) dang "

" Shvngømréò dvrá (6) dang "
Vpø íwe pèmè vnvmchvngmaq dèni lvmvng tvyø taq vrá tiqkvt Catholic shvngømré meò vpø' vtv'ng dvrá rì mvmè vl yv'ngkèní Shvngømréò dvrá (6) dang svng dvtit tvle nø dvshvng lvm íe.

 Vpø íwe vnvmchvngmaq,
1.Dvkvm Kà cvndvgøm rà we dvrá(6)dang svng zi we àng mvtú àng mvnggá nø Gvray dvkvm Kà svng téwa cíngràl nø vtoshì lúnlvm dvpvt íe. Rvzvngcerìò vjú vra rì svng tùbùm øpmà weí vruò we dvkvm kà írvt wè dvrárì svng vpø' nø cvndvgøm vdù we íe.

2. Shvngømréò Dvrá (6) Dang

(1) Nár nī nvng shvngømré bóy àngnī rì taq Missa Kàgvp bóydo svng nàtoshì. wā dvkvme.

(2) Tiqnøng taq cv'm vtv'ng Mvrà tiqboq  nàchv'ngshì. wā dvkvme.

(3) Cúnbóy rvtø taq Vkangpè Yesuò Kàgvp bóydo svng nàtoshì.wā dvkvme.

(4) Vm aq vnvtshì lvm nvng shaké vnvtshì lvm àngni rì svng cv'n dègøm leqlúnò.wā dvkvme.

(5) Gvray dvzømshú rì kaq svng tùbùm dvbang leqlúnò.wā dvkvme.

(6) Wur dvzøm, shvzøngkung wá màdu we lvngcha àngnī rì svng nayáshì. wànø  shvngømré Dvrá (6) dang taqkèní vkvtdø shvngømré rvzvngcerì kaq svng  dvkv'm we dvrá Mongkà íē.

Vpø íwe pèmè vnvmchvngmaq,
-(1) Nár nī taq shvngømrérì nø Noqngøm we bvnlì taq dvzaqshì lvm rvt Gvray gvsang ínø dvkvme. Nøngmaq shvngømré vdòng taq ring vtv'ng Noqngøm lòng nø Missa Kàgvp bóydo svng Noqngømì lòng íē.
   Wèrvt shvngømré rvzvngcerì shvngbe nø nár nī vrvm taq Missa Kàgvp bóydo lúm nø Mongkà tāshìlvm rvt dvkv'm kà døngjá vdá íe. Lvmā lādvng shvrúngshú pè mà-vl nìnø nár nī  lvban Noqgú vjúrøt lìpong taq lúm nø vjúrøt we, Mongkà tāshì we nvng Mvkun zaywa rì taqkèní shvgùn shvring we wá vdù we íe.

-(2) Dvrá vní Dang
 Mvrà gvba wá vdùvm kvt tiqdvshaqí mvrà vroqshì ràe. Kvmnønt tvrà taq kvmnønt te we rvzvngce í lvm dvpvt mvrà wá vdù bø vrvm vroqshì ràe.

-(3) Dvrá Vshøm Dang
 Vkangpè Yesuò Kàgvp bóydo nø gønshaq zi we muk vm pa Vharaq í rvt tiqnøng taq mvmè boq vtōshì lún ràe. Cunbóy rvtø lvngcha taq màchiq dø Vkangpè Yesuò Kàgvp bóydo svng vtoshì lún ràe.

-(4) Dvrá Vbi Dang 
Vsvng nø Vba dvtøl kèní èpvn èmvn yangshà dø tiqdvchá Vba svng vrá vtv'ng lvm dèkvm yangshà. Vkangpè Yesu dvshà mvhøt vhø'm lvm rvtø vzàng,
Cìpshìlvm kùmlà dvtán yangà we, Waqpú dvtølí màtshì we bóynī, Vkangpè Yesu shaq dvt we Nár Bunga nī vrvm yv'ng Vm aq vnvtshì we, shàké vnvtshì we cv'ndvgøm nø vjúrøt shì ràe. Vm aq vnvtshìe wàwe taq shvlkung tiqlòng svng shvyúm nø shvlkung tiqlòng svng vjáhøqshaq Vm shvlàe. Lvpat (18) nøng kèní lvpat (59) nøng mv-lìm shvngømré rì nø Vm aq vnvtshì we wá ràe. Lvpat (14) nøng vhøm bø we rvzvngce vrvm nø Vm aq vnvtshì vdù we íe. Vkangpè Yesuò vjang laqya shvlá svng lùshì nø nár Bunga nī vrvm gø Vm aq vnvtshì nø vjúrøtshì we bvnlì svng cvndvgøm vdù we íe.

-(5) Dvrá Bunga Dang
Shvngømré rì ínø  Dvzømshú rì kaq svng tùbùm dvbàng bvnlì wáshì lòng nø mongkà taq vl Gvray gvsangò dvkv'm Kà Dvrá rvt íe. ( 1 Kor 9:13-19 ) taq tøpni tøpràng dvtán shaq íe. Pvlàcè dang nvng sing we shvngøtshú bvnlìrì taq rvtødøp dvzaq dvkvngshì rì nø shagóng dvkúmshìlvm bvnlìrì svng wá mvlúnò. Wervt Shvngømré rìò shóngnønt kèní tùbùm dvbang lvm nø gvzà vchvknge wā dvkvme.

-(6) Dvrá Vchuk Dang taq nø,
Wur dvzøm shvzøngkung bóy svng ( Adventu ) dvgø'shì we rvtø lvngcha nvng Vm aq vnvtshì we rvtø lvngcha rì taq mv-wà lvm rvt dvkvme. Wè rvtø lvngcha taq nø Hkristu mast bóy nvng Cunbóy dvpvt àngdeò nønt mvsøn nvng Pvlàcè dvpvt mvdøng shvraí shì nø dvgø'shì rà we rvtø íe.

Wervt vpø íwe vnvmchvngmaq shvngømré dvrá, Gvray gvsang dvkv'm Kà Dvrá me rì svng cvndvgøm nø shagóng Pvlàcè kvmnønt nònggùn kūngà lùshì laqlúni wvng shvngømré Dvrá me (6) dang taqkèní dvshvt mvyøng we Mongkà íe.
  Shvngbeí Gvray mongzøl lòng vtoshì leqlúnøng.