Vsvng mvmèí cvndvgøm mvlúni we, phone battery nonggùn dwi we taq lv'ng shárà we mvtúrì

" Vsvng mvmèí cvndvgøm mvlúni phone battery nonggùn dwi we taq lv'ng shárà we mvtúrì "

Vpøí we pèmè vnvmchvngmaq; ya lvban taq nø Vsvng mvmèí cvndvgøm mvlúni we, phone battery nonggùn dwi we taq lv'ng shárà we mvtúrì mvzøngshì lúnlvm Paqzí vdè rì í dvshat nø nonggùn zi we mongkà taqkèní tiqdòngce dvtit tvlé nø nonggùn zí mvyøngè. Shvngkà ètashi nøng we vnvmchvngrì gø' vrvmi gø phone svng ni vrvm láng vdù na íe.

Vpøí we vnvmchvngmaq Nī vrvm phone lvngì we taq tiqni taqø tiqbaq mv-taq phone svng nonggùn dwiì weí lvngì we gø vlē. Phone battery nonggùn dwi lvm dang nvng singdø Paqzí zí we mongkà taq ya dø dvtánò nø dvshat we vlē. Phone nonggùn dwi lvm sømrī hø'ng svng palat bót yv'ngø rvtø gvzà vléhøq màkàshaq gvl we mv-wàlvm vyáshì ràe. Pàwálvm wani shíjø':ng we kok dø':ngò dvt nvng dvt tā svng vhøm lòng kvt nø svmi vkat sháòe wanø Paqzí zí we vlē. Vrá nø phone battery nonggùn dwi tvngí to-dø vrá sømrī høng svng tiqdvshaqí kàshì lún ràe, wā dvkvme. Vpøí we Vnvmchvngmaq Phone battery nonggùn svng 100% zø’ng høqshaq dwi shì lòng nø phone nonggùn téwa béyòrē wanø dvkvme.

Wervt nø phone nonggùn èdwi lú:ngò dvgvp 98% tv'ngte wā dwí nø tiqdvshaqí kàshì lún ràe, wànø paqzizí weí dvkvme. Vrá nø, Phone battery nonggùn svng be nø nārshì høqshaq video yvng we, came dó nø lvng we, phone nonggùn 10% lvpvng vja vm kvtwa phone svng nonggùn dwi shì lòng nø yòr yòr cèí phone battery gvyaq sháòe, wanø shønòe. Vpøí we vnvmchvngmaq, Phone nonggùn 20% lvpvng vja wèó tiqkvt dwi shì lòng nø phone battery àngò (detdán) lvpat svng téwa yvng dvzá:ròe, wanø paqzi zìe. Vrá nø, Phone svng pōyaq nonggùn dwishì lòng gø mvjò we íe. Vkvt dø nonggùn dwishì lòng nø phone battery svng tiq dvshaqí dètì:nò wèò vbóngè, wàe. phone battery nonggùn èdwiò taqsori èlángò ninø battery dèsháòe, wàe.

Wervt phone èdwiò taqsori màlvng lvm rvt gø gvzà vyáshì ràe. Phone nonggùn 30%, mvdvm vl dvgvp phone nonggùn dwi shì lòng gø phone tiqdvshaqí gvyaq yòrē, wanø dvkvme. Téwa nø, 20,20% Lvngpvng íbø kvtwā phone svng nonggùn dwi shì lòng nø shvlá vtvng íe wanø paqzi zí we vlē. Wervt Vpøí we vnvmchvngmaq àngdeò phone svng shvlá vtvng lvngshì lúnlvm rvt gø dvzaqshì laq lúnì. Vrá nø, Phone svng àngwa èdwiò we sømrī høng mø-í nø, dvgá yv'ngshì we sømrī høng ígø vwàwà dø dwi we bvtut wá mvdaq. Vrá nø, Phone gabā svng mà-lúshaq nonggùn dwi shì lòng gø phone vkatshì zidvng svng tiqdvshaqí vháng dvzá:ròe wàe. Wervt phone nonggùn dwishì dvgvp gabā svng lu tvngí dwíshì ràe wànø paqzizí we vlē.

Vpøí we vnvmchvngmaq, Lvngdøm taq Leptop nvng computer taqkèní tiq dvtáng phone svng nonggùn dwi shì lòng gø phone jòng dvzá:ròe, wanø dvkvme. Wervt nø, Vpø íwe vnvmchvngmaq àngdeò phone battery svng zv'nò dø shvlá vtvng lvngshi lúnlvm rvt.. Paqzí vdè rìí phone nvng singdø paqzizí we mongkàrì svng gø shøpshì nø cvndvgøm weí dvzaqshì laq lúnì wvng nonggùn zí mvyøngè. Shvngkà tvyø svng ètashi nøng we vnvmchvngrì gø vrvmí Gvray mongzøl lòng leq lún nøng. Shvngbe svng oqā.