Angpè Angmè nvng cv̀mrérì svng shvngøt we,

Dèni døngku lvmvng tiqyø taq nø, Efesu 6:1-4 vdòng taq vbá we Gvray Mongkà taq kèní vrāshi nø paqzí dvkøm mvyøngè. Angpè Angmè nvng cv̀mrérì svng shvngøt we, Mòngkà íē.

1 Cv̀mré rìé, Vkàngpè vdòng taq nvpè nvmè maq kà ètánøng; pàwálv́m wani, wedø wáshì lòng nø vdu we íe. wàe. Angpè angmèí vdècerì vháng vlúnlvm rvt shóngnøntni shvngøt dvtú we kà vrvm nø gvzà vpøe.Gvzà ringe, walòng svng yv'ng lúnshìe. We mvdvm angpè angmè nø Døngku vdòng Gvrayò dvzvr shvngøtshú dvzømshú nvmlat gø íe. Wervt Pvlace kvmnønt tvrà shvngøt dvtú lvm, vjvnglaqya dvcøp màlvm, Paqzí dang shvngøt dvtú dvté lúnlvm, vtoq-vtip vzømvzvp we àngdang shvngøt dvtú lvm døngjà vlē. Vrá nø angpè angmè nø vní gø wà gø Gvray gø íē. Shansherpè. Thomas Aquinas  Shøn we taq Angcø angcé rí vhvng vlún lvm rvt, vpnóngshì lúnò we angpè angmè nø kømzøp we døngkú íe, wàe. Vrá nø (John Paul ll) shøn yá:ngì we Mongkà taq, Vsvng tiq gøò lvpat vhvngvlúnlvm nø døngku taq mvdøng vchvt è, wàe. Wervt vdècerì vháng vlúnlvm rvt rvtø vrv'm vpnóngshì we angpè angmèmaqò shóngnønt svng Vpø shvríng laqlúnì, wvng vrāshi mvyøngè.

2-3 ciq taq,Dv́nkà zv̀n we dvkv́mkà nv̀mlat dang taq: “Namaqí shøtshú èlúnnøng nø, rvgaq tø̀mø mvme cúnshì lúnlv́m dvpvt nvpè nvmè maq svng nàpǿnøng,” wae. b Angpè angmèmaq svng vpøshì long nø Gvray dvkvmkà svng vpø nø cvndvgøm shì long íē. Gvray dvrá Mòngkà svng cvndvgøm we taq Pvlace kvmnønt tvrà nvng shagóng lvpat taq gø shøtshú dvnglunce vl-lún lvm íwe svng yvnglún shìe. (St.Thomas Aquinas). Gvray kvsang dvrà móngká rì svng vpø nø Shóngshi sháò gø dvpvt nø vnángè.Shvré sháó gø dvpvt nø gvzà vlí shíe, wàe. Wervt Gvray tvrà taq mà-zing dø Kvmnønt, shóngnøntni, Sher we nønt mvsøn vjvnglaqya taq kèní cvndvgøm nø nònggwøn lùshì laqlúnì.

4 Vrá angpè maqé, namaq angcèrì svng shv̀mná mèshèrínø̀ngni. Angmaq svng nø Vkàngpèí shvngøt dvtú we vdòng taq mv̀ng dèkùm dèténøng. wàe. Venderbilt university kèní cvmré dang nvng singdø kùndvtøp lúnò wē svng èyà:ngò dvgvp Angpè angmè maqí chá vlē dvrá shv-jvkò nø øpmo we cvmrérì nø, vdè svng vpøshì we nønt mà-vl, vdè svng vlømshi we nønt gø mà-vl wa nø shønò we vlē. Mongkà taq vbá dø tiqdvchà shóngnønt, cìpshìnøntnì cvmrérì svng angmaq vlømshi nønt lāvl lòng dø laqyàrì dvcøpmā nø dèkùm dvté ràe. Vrá nø, Cip shílóng nø chutchvng we tvràò angké lóng íe, wanø (St.Bennard) taq kèní gø shøn yàngà we kà vlē. Wervt angpè angmèmaq nø chutchvng wē tvrào nvmlat nvmpvng shvngøt dvtú we Svra gø íē. Vrá nø, Angcø angcé rí angdangdang taq vhvng vlún lvm rvt, a:pnóng shí lúnò we angpè angmè nø kømzøp we døngku íe, wadø tiqdvchà gvrayí zì we cvmrérìo Lvpat mvnggá vháng vlúnlvm rvt shóngnøntni shvngøt dvtú, tubùm laqlúnì wvng dvmvn we Mongkà svng yàyvng nāròē.